Anɛ E Sa Nɛ Ma Sɔle Kɛ Ha He Tsɔli (Saints) Lo?

Nɔ́ nɛ Baiblo ɔ de

Dɛbi. Baiblo ɔ de ke, waa sɔle kɛ ha Mawu pɛ, kɛ gu Yesu biɛ mi. Yesu de e kaseli ɔmɛ ke: “Nyɛɛ sɔle kaa kikɛ nɛ ɔ: Wa Tsɛ nɛ ngɛ hiɔwe; O biɛ ɔ he nɛ tsɔ.” (Mateo 6:9, Ngmami Klɔuklɔu ɔ) E de we e se nyɛɛli ɔmɛ kaa a sɔle kɛ ha he tsɔlɔ ko, aloo hiɔwe bɔfo ko, aloo nɔ kpa ko. Mohu ɔ, e fã mɛ kaa a sɔle kɛ ha Mawu pɛ.

Jehanɛ se hu ɔ, Yesu de e se nyɛɛli ɔmɛ ke: “Imi ji blɔ ɔ, imi ji anɔkuale ɔ, nɛ imi ji wami ɔ hulɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.” (Yohane 14: 6, Ngmami Klɔuklɔu ɔ) Yesu pɛ nɛ Yehowa ha lɛ he blɔ kaa e da mi ha wɔ ke wa ngɛ sɔlee.​—Hebri Bi 7:25.

Nɛ ke i sɔleɔ ha Mawu, nɛ jehanɛ ɔ se hu I sɔleɔ ha he tsɔli hu nɛɛ?

Mawu de ngɛ Kita Nyɔngma a mi ke: ‘Imi, NYƆMTSƐ o Mawu ɔ, i ji Mawu nɛ i jeɔ hunga.’ (2 Mose 20:5, NAB) Ngɛ mɛni blɔ nɔ nɛ Mawu “jeɔ hunga”? New American Bible ɔ sisi ningma a de ke, e suɔ nɛ “a ja lɛ pɛ.” Mawu suɔ nɛ wa ja lɛ pɛ, nɛ waa sɔle kɛ ha lɛ pɛ hulɔ.​—Yesaya 48:11.

Ke wa sɔleɔ kɛ haa nɔ kpa ko, he tsɔli jio, aloo hiɔwe bɔfohi jio ɔ, Mawu mi mi fuɔ wawɛɛ. Benɛ bɔfo Yohane bɔ mɔde kaa e ma kpla si konɛ e ja hiɔwe bɔfo ko ɔ, bɔfo ɔ tsi e nya nɛ e de lɛ ke: “Ko ja mi! Imi hu Nyɔmtsɛ ɔ tsɔlɔ ji mi kaa mo, kɛ o nyɛmimɛ ɔmɛ tsuo. Odase ɔ nɛ Yesu ye ɔ, I kɛ nyɛ tsuo lɛ wa he ye. Já Mawu mohu!”​—Kpo Jemi 19:10, Ngmami Klɔuklɔu ɔ.