Mɛni He Je Nɛ Yehowa Odasefohi Ngɔɛ Muɔ ɔ?

Juɛmi nɛ dɛ nɛ nihi hɛɛ

Nɔ́ Nɛ Nihi Deɔ: Yehowa Odasefohi yɛ hiɔ tsami he ejakaa a he we yi kaa dɔkitahi ma nyɛ maa ye bua mɛ.

Anɔkuale ɔ: Wa hlaa hiɔ tsami blɔ nɔ tomi nɛ hi pe kulaa kɛ haa wɔ nitsɛmɛ kɛ wa wekuhi. Ke wa be he wami ɔ, wa ya naa dɔkitahi nɛ a he be nɛ a ma tsa wɔ loo a ma gba wɔ nɛ a be wɔ muɔ hae. Wa bua jɔ hɛ mi yami nɛ ba ngɛ hiɔ tsami mi ɔ he. Ngɛ anɔkuale mi ɔ, a pee hiɔ tsami blɔ nɔ tomihi nɛ be hae nɛ a ha nɔ muɔ konɛ a kɛ ye bua Odasefohi, nɛ amlɔ nɛ ɔ, nihi babauu ngɛ he se náe. Ngɛ mahi fuu a nɔ ɔ, nɔ nɛ be he wami ɔ ma nyɛ ma kua muɔ ngɔmi konɛ e kɛ yu e he ngɛ oslaahi kaa muɔ mi hiɔ, muɔ nɛ kɛ e nɔ́ ɔ sɔɛ, kɛ dɔkitahi a hiɔ tsami mi tɔmihi nɛ ngɛ muɔ ngɔmi he ɔ he.

Nɔ́ Nɛ Nihi Deɔ: Yehowa Odasefohi he ye kaa ke nɔ ko be he wami ɔ, hemi kɛ yemi ma tsa lɛ.

Anɔkuale ɔ: Wa he we yi kaa jami mi hemi kɛ yemi ji nɔ́ nɛ tsaa nɔ.

Nɔ́ Nɛ Nihi Deɔ: Ke o kplɛɛ we nɛ a ha mo muɔ ɔ, o ma bɔ hiɔ wawɛɛ.

Anɔkuale ɔ: Hiɔ tsami blɔ nɔ tomihi nɛ a kɛ muɔ tsu we ní ɔ he jua wɛ.a

Nɔ́ Nɛ Nihi Deɔ: Odasefohi babauu nɛ jokuɛwi hu piɛɛ he ɔ gboɔ daa jeha akɛnɛ a ngɔɛ muɔ ɔ he je.

Anɔkuale ɔ: Anɔkuale ko be munyu nɛ ɔ mi. Nɔ gbami komɛ kaa tsui gbami, wu gbami, kɛ nɔmlɔ tso ɔ he ní komɛ a tsakemi ɔ yee, se dɔkitahi pɔɔ enɛ ɔmɛ peemi nɛ a ha we hiɔtsɛ ɔ muɔ.b Fɔli kɛ jokuɛwi nɛ a ngɔɛ muɔ ɔ náa nɔmlɔ tso mi he wami kpakpa pe nihi nɛ a ngɔɔ muɔ ɔ.c Nɔ ko be nyɛe ma de kɛ nɔ mi mami kaa ke nɔ ko ngɔɛ muɔ ɔ, e ma gbo, aloo ke e ngɔ muɔ ɔ, e maa hi wami mi.

Mɛni He Je Nɛ Yehowa Odasefohi Ngɔɛ Muɔ ɔ?

Sane nɛ ɔ kɔɔ jami he, se pi tsopa peemi he. Somi He ɔ kɛ Somi Momo ɔ tsuo gba mi kpoo kaa e sɛ nɛ waa ngɔ muɔ. (1 Mose 9:4; 3 Mose 17:10; 5 Mose 12:23; Bɔfo Ɔmɛ A Ní Tsumi 15:28, 29) Jehanɛ hu, Mawu buu muɔ kaa wami. (3 Mose 17:14) Lɔ ɔ he ɔ, pi tue bumi nɛ wa peeɔ kɛ haa Mawu ɔ pɛ he je nɛ wa ngɔɛ muɔ, mohu ɔ, wa buɔ Mawu kaa wa wami Halɔ.

Nihi a juɛmi ngɛ tsakee

Be ko nɛ be ɔ, tsopa peeli susu kaa ke a ha we nɔ ko muɔ ngɛ hiɔ tsami mi ɔ, e ma nyɛ maa hao nɔ ɔ, nɛ e ma nyɛ maa ngɔ e wami kɛ wo oslaa mi po. Se amlɔ nɛ ɔ, níhi tsake. Kaa nɔ hyɛmi nɔ́ ɔ, ngɛ jeha 2004 ɔ mi ɔ, munyu ko nɛ a ngma ngɛ dɔkitahi a tsɔsemi womi ko mi ɔ tsɔɔ kaa “blɔ slɔɔtohi a nɔ nɛ a guu nɛ a ha we Yehowa Odasefohi muɔ ngɛ hiɔ tsami mi ɔ ma ba pee blɔ titli nɛ a maa gu nɔ kɛ tsa nihi.”d Ngɛ jeha 2010 mi ɔ, munyu ko nɛ a ngma ngɛ womi nɛ ji, Heart, Lung and Circulation ɔ mi ɔ de ke, “‘nɔ gbami nɛ a kɛ muɔ tsu we ní’ ɔ ji blɔ titli nɛ e sa kaa a kɛ tsu ní daa ngɛ nɔ gbami mi kaa bɔ nɛ a peeɔ kɛ haa Yehowa Odasefohi ɔ.”

Amlɔ nɛ ɔ, dɔkitahi akpehi abɔ ngɛ je kɛ wɛ ɔ ngɔɔ nɔ gbami blɔ nɔ tomihi nɛ a kɛ baa muɔ yi ɔ kɛ tsuɔ ní ngɛ nɔ gbami nɛ yee mi. Ngɛ mahi nɛ kpaako a ngɛ hɛ mi yae ɔ po a mi ɔ, a gbaa nihi nɛ a ha we mɛ muɔ, nɛ nihi babauu nɛ a pi Yehowa Odasefohi ɔ tsɔɔ kaa a suɔ nɛ dɔkitahi nɛ a ngɔ hiɔ tsami blɔ nɔ tomi nɛ ɔ kɛ tsu ní ngɛ a blɔ fa mi.