NIHEWI KƐ YIHEWI BIƆ KE
Bɔ Nɛ Baiblo ɔ Ma Nyɛ Maa Ye Bua Mo Ha—Fã 1: Moo Kane Baiblo ɔ
“I ka kaa ma kane Baiblo ɔ, se bɔ nɛ ngmami ɔmɛ a nya kɛ ha a woɔ ye he gbeye!”—Briana, e ye jeha 15.
Anɛ mo hu e peeɔ mo jã lo? Munyu nɛ ɔ maa ye bua mo!
Mɛni he je nɛ e sa nɛ o kane Baiblo ɔ?
Anɛ o bua jɔɛ Baiblo ɔ kanemi he kpakpa ko lo? Ke jã a, sisi numi ngɛ he. Eko ɔ, o naa Baiblo ɔ kaa e ji womi ko nɛ e hɛɛ ba fahi babauu, e ningma amɛ ngɛ tsɔwitsɔwi nɛ fonihi be mi, nɛ o bua jɔɛ he kaa bɔ nɛ o bua jɔ TV kɛ videohi a hyɛmi he ɔ!
Se mo susu he ngɛ blɔ nɛ ɔ nɔ: Ke o ya na blema daka ko nɛ a kɛ juetli toɔ ngɛ mi ɔ, anɛ o be nya blie nɛ o hyɛ kaa mɛni ngɛ mi lo?
Baiblo ɔ ngɛ kaa daka ko nɛ a ngɔ juetli kɛ to ngɛ mi. Nile munyuhi babauu ngɛ mi nɛ maa ye bua mo
Konɛ o mwɔ yi mi kpɔhi nɛ da
Konɛ o kɛ o fɔli nɛ hi si saminya
Nɛ o hla huɛmɛ kpakpahi
Konɛ o nyɛ nɛ o da haomihi a nya
Mɛni he je nɛ blema womi nɛ ɔ ma nyɛ maa ye bua wɔ mwɔnɛ ɔ? E ma nyɛ maa ye bua wɔ, ejakaa “Ngmami ɔ tsuo je Mawu mumi mi.” (2 Timoteo 3:16) Enɛ ɔ tsɔɔ kaa ga womihi nɛ ngɛ Baiblo ɔ mi ɔ je Ga Wolɔ nɛ pe kulaa a ngɔ.
Baiblo ɔ ngɛ kaa daka ko nɛ a ngɔ juetli babauu to ngɛ mi
Mɛni blɔ nɔ o maa gu kɛ kane Baiblo ɔ?
Blɔ kake ji kaa o maa kane kɛ je sisije kɛ ya si nyagbe. Lɔ ɔ ma ha nɛ o maa le níhi nɛ ngɛ Baiblo ɔ mi. Blɔhi fuu ngɛ nɛ o ma nyɛ maa gu nɔ kɛ kane Baiblo ɔ. Blɔ enyɔ komɛ ji nɛ ɔmɛ nɛ:
O ma nyɛ maa kane Baiblo ɔ mi womihi 66 amɛ nyatsɔɔ kɛ je Mose Kekleekle Womi ɔ kɛ ya si Kpo Jemi.
O ma nyɛ maa kane Baiblo ɔ ngɛ bɔ nɛ níhi ya nɔ ha setsɔsetsɔ ɔ nya.
Nɔ́ ko nɛ maa ye bua: Munyu nɛ ji Appendix A7 nɛ ngɛ New World Translation ɔ mi ɔ tsɔɔ bɔ nɛ níhi ya nɔ ha setsɔsetsɔ ngɛ Yesu si himi mi ngɛ zugba a nɔ.
Blɔ enyɔne nɛ o ma nyɛ maa gu nɔ kɛ kane Baiblo ɔ ji kaa o maa da nyagba ko nɛ o kɛ ngɛ kpee ɔ nɔ kɛ hla sane ko nɛ ngɛ Baiblo ɔ mi nɛ e kɛ o si fɔfɔɛ ɔ kɔ konɛ o kane he ní. Nɔ hyɛmi nɔ́:
Anɛ o ngɛ huɛmɛ nɛ o ma nyɛ maa fiã kɛ fɔ a nɔ hlae lo? Moo kane Yonatan kɛ David a sane ɔ. (1 Samuel, yi 18-20) Lɔ ɔ se ɔ, moo da ní kasemi womi nɛ ji “How to Find Loyal Friends” ɔ nɔ kɛ kase níhi fuu ngɛ sane ɔ he.
Anɛ o suɔ nɛ o pee nɔ ko nɛ e ma nyɛ maa da kahi a nya lo? Moo kane bɔ nɛ Yosef tu ajuama bɔmi nya fo ha. (1 Mose, yi 39) Lɔ ɔ se ɔ, moo da ní kasemi womi nɛ ji “How to Resist Temptation . . . Joseph—Part 1” kɛ “Falsely Accused! Joseph—Part 2” ɔ nɔ kɛ kase níhi fuu ngɛ sane ɔ he.
Anɛ o suɔ nɛ o le bɔ nɛ sɔlemi ma nyɛ maa ye bua mo ha lo? Moo kane Nehemia níhi a si kpami ɔ. (Nehemia, yi 2) Lɔ ɔ se ɔ, moo da ní kasemi womi nɛ ji “God Answered His Prayer” ɔ nɔ kɛ kase níhi fuu ngɛ sane ɔ he.
Nɔ́ ko nɛ maa ye bua mo: Ke o maa kane Baiblo ɔ, hyɛ kaa he nɛ o maa kane ngɛ ɔ jɔ dii, nɛ nɔ́ ko be o juɛmi jee ngɛ nɔ.
Blɔ etɛne nɛ o ma nyɛ maa gu nɔ kɛ kane Baiblo ɔ ji kaa o maa hla Baiblo mi sane ko, aloo la ko ngɛ la womi ɔ mi konɛ o kane. Lɔ ɔ se ɔ, mo susu bɔ nɛ e kɔ o he ha a he. Ke o kane ta a, mo bi o he ke:
Mɛni he je nɛ Yehowa ha nɛ a ngma sane nɛ ɔ ngɛ Baiblo ɔ mi ɔ?
Mɛni enɛ ɔ tsɔɔ mi ngɛ Yehowa he?
Kɛ i kɛ nɔ́ nɛ i kase nɛ ɔ ma tsu ní ngɛ ye si himi mi ha kɛɛ?
Nɔ́ ko nɛ maa ye bua mo: Gblaa New World Translation study edition ɔ konɛ o na videohi, zugba he fonihi kɛ ní kpahi nɛ maa ye bua mo konɛ o ná o Baiblo kanemi ɔ he se.