David kɛ kã de matsɛ ɔ ke: “Nɔ ko nɔ ko kó ye tsui ngɛ Filisti no nɛ ɔ he.” Ngɛ anɔkuale mi ɔ, Goliat he gbeye pue matsɛ Saul kɛ e tabo ɔ tsuo nɔ nɛ a tsui po wawɛɛ. Eko ɔ, a ngɔ a he kɛ to oblai nɛ ɔ he nɛ a na kaa a pee tsɔwitsɔwi ngɛ e hɛ mi. A susu kaa oblai nɛ mia kɛ ta hwumi ní ngua nɛ ɔmɛ ɔ maa gbe mɛ ngɛ hɛngmɛfia kake pɛ mi. Se David lɛɛ e susu we ja. David susu sane ɔ he ngɛ blɔ kpa ko nɔ kulaa. Lɔ ɔ he ɔ, e bi konɛ a ha lɛ he blɔ nɛ e kɛ Goliat nɛ e ya kpe.​—1 Samuel 17:32.

David na bɔ nɛ Goliat je oblai ha, kɛ ta hwumi níhi nɛ e kpla a hulɔ. Se David ha we nɛ lɔ ɔ nɛ wo e he gbeye. E pee we e ni kaa bɔ nɛ Saul kɛ e ta buli ɔmɛ pee ɔ. David kɛ e he tui Goliat he. Mohu ɔ, e ngɔ Goliat kɛ to Yehowa he. Goliat kami ji nine mi blimi nyɔngma kɛ etɛ, e ka pe nɔ tsuaa nɔ ngɛ lejɛ ɔ. Se ke a ngɔ lɛ kɛ to je mluku ɔ tsuo Nɔ Yelɔ ɔ he ɔ, kɛ e klemi maa hi kɛɛ? Ngɛ anɔkuale mi ɔ, kaa bɔ nɛ adesahi tsuo ngɛ ngɛ Yehowa hɛ mi ɔ, e klemi sui tatu po. Nɛ Yehowa pee klaalo kaa e ma kpata e hɛ mi!

David sa fo konɛ e kɛ e he nyɛlɔ ɔ nɛ ya kpe. Benɛ e yaa, e ngɔ e nine kɛ wo kotoku nɛ e kpla a mi, nɛ e je tɛ kake. E ngɔ tɛ ɔ kɛ wo amlami ɔ mi nɛ e fɔ e nine kɛ bɔle e yi. Goliat bɔni nyɛɛmi kɛ yaa David ngɔ, eko ɔ, nɔ nɛ hɛɛ e tsɛ̃i ɔ ngɛ e hɛmi haa. Bɔ nɛ Goliat ka ha he je ɔ, nɔ nɛ hɛɛ e tsɛ̃i ɔ be nyɛe ma wo tsɛ̃i ɔ nɔ konɛ e kɛ po Goliat yi he piɛ. Se David hu to kaa e maa fɔ tɛ ɔ kɛ ya ná Goliat yi.​—1 Samuel 17:41.

1 | Anɛ nɔmlɔ ko kami ma nyɛ maa su nine mi blimi nyɔngma kɛ etɛ (mita 2.9) lo?

Baiblo ɔ tsɔɔ kaa Goliat kami maa pee “nine mi blimi nyɔngma kɛ etɛ (mita 2.9).” (1 Samuel 17:4) Ni komɛ tsɔɔ kaa Goliat be nyɛe maa ka jã, se moo lɛɛ mo susu he nɛ o hyɛ: Nɔmlɔ nɛ a le lɛ kaa e ka pe nɔ tsuaa nɔ ngɛ je ɔ mi mwɔnɛ ɔ kami ma pee nine mi blimi nyɔngma kɛ enyɔ (mita 2.7). Anɛ e sa nɛ e pee wɔ nyakpɛ kaa Goliat ka pe nyumu nɛ ɔ maa pee nine mi blimi kake pɛ lo? Goliat je Refaim wɛtso ɔ nɛ a le mɛ kaa a je oblai ɔ mi. Egipt bi a yi nɔ sane womi ko nɛ a ngma maa pee jeha 13 loko a fɔ Kristo ɔ tsɔɔ kaa ta hwuli kpanaa komɛ nɛ a hi Kanaan zugba a nɔ ɔ ka pe nine mi blimi nyɔngma kɛ kake (mita 2.4). Lɔ ɔ he ɔ, e ngɛ mi kaa Goliat ka wawɛɛ mohu lɛɛ, se e be nyakpɛ.