Anɛ Yehowa Odasefohi Heɔ Yesu Yeɔ Lo?

Ee, wa heɔ Yesu yeɔ. E de ke: “Imi ji blɔ ɔ, kɛ anɔkuale ɔ, kɛ wami ɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.” (Yohane 14:6) Wa heɔ yeɔ kaa Yesu je hiɔwe kɛ ba zugba a nɔ, nɛ e ngɔ e wami nɛ ye mluku ɔ kɛ sã afɔle kaa kpɔmi nɔ́. (Mateo 20:28) E gbenɔ kɛ e si temi ɔ bliɔ blɔ kɛ haa nihi nɛ a heɔ lɛ yeɔ ɔ konɛ a ná neneene wami. (Yohane 3:16) Wa he ye hu kaa amlɔ nɛ ɔ, Yesu ngɛ Matsɛ yee ngɛ Mawu Matsɛ Yemi ɔ mi, nɛ e be kɛe nɛ e maa ngɔ tue mi jɔmi kɛ ba je ɔ mi tsuo. (Kpojemi 11:15) Jehanɛ hu, wa he nɔ́ nɛ Yesu de ɔ ye. E de ke: ‘Tsɛ ɔ kle pe mi.’ (Yohane 14:28) Lɔ ɔ he ɔ, wa ja we Yesu ejakaa wa he ye kaa pi lɛ ji Mawu Ope ɔ.