Moo Tsɔɔ Kaa O Bua Jɔ Mawu Nike Ní Nɛ Se Be ɔ He
1. Mɛni ji yi mi tomi titli heje nɛ wa naa Yehowa si ngɛ?
1 Ngɛ ‘nike ní kpakpahi’ nɛ Yehowa kɛ ha wɔ ɔ, a kpɛti ɔ, e Bi ɔ nɛ e kɛ ha kaa kpɔmi nɔ́ ɔ ji nike ní nɛ se be. (Yak. 1:17) Kpɔmi nɔ́ ɔ ha nɛ wa nine su jɔɔmihi babauu a nɔ, eko ji yayami kɛ pami. (Efe. 1:7) Enɛ ɔ he ɔ, wa naa Yehowa si. E sa kaa wa susu nike ní nɛ he jua wa nɛ ɔ he, titli ɔ, ngɛ Kaimi ɔ Yemi be nɛ ɔ mi.
2. Mɛni blɔ nɔ wa maa gu kɛ ye bua wɔ nitsɛmɛ kɛ wa weku ɔ konɛ wa bua nɛ jɔ kpɔmi nɔ́ ɔ he?
2 Ye Bua O Weku ɔ Nɛ A Bua Nɛ Jɔ Kpɔmi Nɔ́ ɔ He: Mɛni heje nɛ o ngɔɛ nyɛ gbɔkuɛ Weku Mawu Jami be ɔ eko kɛ nylɔ we munyuhi nɛ kɔɔ kpɔmi nɔ́ ɔ he ɔ mi loko e su March 30 nɛ a maa ye Kaimi ɔ, konɛ o kɛ ye bua o weku ɔ nɛ a bua nɛ jɔ kpɔmi nɔ́ ɔ he? Jehanɛ se hu ɔ, daa ligbi ɔ, e sa nɛ weku ɔ tsuo nɛ pee kake kɛ kane Kaimi ɔ he Baiblo ngmamihi klɛdɛɛ nɛ a to he blɔ nya a. E sa nɛ wɔ kaa ni kakaakahi ɔ, wa susu bɔnɛ kpɔmi nɔ́ ɔ he ba se nami ha wɔ ha a he, kɛ bɔnɛ lɔɔ haa nɛ wa susuɔ Yehowa, wɔ nitsɛmɛ, ni kpahi, kɛ hwɔɔ se he ha a he. Jehanɛ se hu e maa hi kaa nyɛ maa kase la ehehi enyɔ nɛ ji la 8 kɛ la 109 nɛ a kɛ maa ye Kaimi ɔ.—La 77:12.
3. Mɛni blɔ nɔ wa maa gu kɛ tsɔɔ kaa wa bua jɔ kpɔmi nɔ́ ɔ he?
3 Moo Tsɔɔ Kaa O Bua Jɔ Kpɔmi Nɔ́ ɔ He: Bua jɔmi nɛ wa ngɛ ngɛ kpɔmi nɔ́ ɔ he ɔ woɔ wɔ he wami nɛ wa deɔ nihi níhi nɛ kɔɔ Yehowa he kɛ suɔmi agbo nɛ e je kpo kɛ ha wɔ kɛ gu e Bi ɔ nɛ e kɛ ha a nɔ. (La 145:2-7) Ngɛ March, April, kɛ May mi ɔ, weku komɛ tsɔɔ kaa a bua jɔ kpɔmi nɔ́ ɔ he kɛ gu blɔ nya nɛ a toɔ nɛ ke e hi kulaa a, weku ɔ mi nɔ kake ngɔɔ e he kɛ woɔ blɔ gbali a wami nítsumi ɔ mi ɔ nɔ. Ke o be nyɛe maa pee jã a, anɛ o ma nyɛ maa ngɔ be nɛ hiɛ kɛ tsu o sɔmɔmi nítsumi ɔ lo? (Efe. 5:16) Ke wa bua jɔ kpɔmi nɔ́ ɔ he ɔ, lɔɔ maa wo wɔ he wami nɛ wa maa ye bua ni kpahi konɛ a ba piɛɛ wa he kɛ ye Kaimi ɔ. (Kpoj. 22:17) Mo bɔni nihi nɛ o kpaleɔ kɛ ya slaa mɛ, nihi nɛ o kɛ mɛ kaseɔ Baiblo ɔ, o wekuli, nihi nɛ o kɛ mɛ tsuɔ ní, kɛ nihi nɛ o kɛ mɛ ngɛ kpɔ mi nɛ o maa fɔ mɛ nine ɔ a biɛ ngmami, konɛ lɔɔ se ɔ, o ngɔ o he kɛ wo Kaimi ɔ he nine fɔmi womi klɛdɛɛ ɔ gbami mi wawɛɛ.
4. Mɛni blɔhi a nɔ wa ma nyɛ maa ngɔ Kaimi ɔ Yemi be ɔ kɛ tsu ní ngɛ nile mi ngɛ?
4 Kaimi ɔ Yemi be ɔ ma ha wɔ he blɔ konɛ wa kɛ tsɔɔ kaa wa bua jɔ nike ní nɛ Yehowa kɛ ha adesahi ɔ he. Nyɛ ha nɛ waa ngɔ be nɛ ɔ kɛ wo bua jɔmi nɛ wa ngɛ ngɛ kpɔmi nɔ́ ɔ mi ɔ mi he wami, nɛ waa tsɔɔ nihi ‘ní kpakpahi nɛ wa ma ná ngɛ Kristo mi’ ɔ.—Efe. 3:8.