Ngɔɔ Otihi Kɛ Ma O Hɛ Mi Ngɛ Kaimi Be ɔ Mi

Daa jeha a, Yehowa we bi hyɛɛ blɔ wawɛɛ kaa a ma bua a he nya kɛ ye Kaimi ɔ. Ke e piɛ bɔɔ nɛ a maa ye Kaimi ɔ, kɛ jehanɛ ɔ se hu ke a ye Kaimi ɔ tã a, waa kɛ he blɔ fɛɛ he blɔ nɛ wa náa jeɔ Yehowa yi nɛ wa naa lɛ si ngɛ nike ní nɛ ji kpɔmi nɔ́ ɔ nɛ e kɛ ha wɔ ɔ he. (Efe 1:3, 7) Kaa nɔ hyɛmi nɔ́ ɔ, wa bɔɔ mɔde wawɛɛ nɛ wa fɔɔ nihi nine kɛ baa Kaimi ɔ. Ni komɛ hu peeɔ tsakemi ngɛ a si himi mi bɔ nɛ pee nɛ a sɔmɔ kaa blɔ gbali a wali nɛ a kɛ ngmlɛfia 30 loo 50 ma tsu ní ngɛ March loo April. Anɛ o suɔ nɛ o tsu babauu ngɛ fiɛɛmi ní tsumi ɔ mi ke e su Kaimi be ɔ lo? Mɛni maa ye bua mo konɛ o nyɛ nɛ o pee jã?

Behi fuu ɔ, wa nyɛɔ tsuɔ babauu kɛ ji kaa wa sɛ hlami nɛ wa to níhi a he blɔ nya kɛ fɔ si. (Abɛ 21:5) Akɛnɛ e be kɛe nɛ Kaimi be ɔ maa su he je ɔ, amlɔ nɛ ɔ ji be nɛ e sa kaa o bɔni níhi a he blɔ nya tomi. Mo susu blɔ nɔ nɛ o maa gu kɛ bli o sɔmɔmi ní tsumi ɔ mi ngɛ Kaimi be ɔ mi ɔ he, nɛ o hyɛ nɔ́ nɛ o ma nyɛ maa pee kɛ su otihi nɛ o kɛ ma o hɛ mi ɔ a he. Lɔ ɔ se ɔ, mo bi Yehowa nɛ e jɔɔ o mɔde bɔmi ɔ nɔ.​—1Yo 5:14, 15.

Anɛ o ma nyɛ ma susu blɔ kpahi a nɔ nɛ o maa gu kɛ bli o sɔmɔmi ní tsumi ɔ mi ngɛ Kaimi be ɔ mi ɔ he lo?