Nɔ́ Nɛ Maa Ye Bua Wekuhi

1. Mɛni blɔ nɔ lɛ wekuhi nɛ a hi Israel ɔ ná daa otsi Hejɔɔmi Ligbi yemi ɔ he se ngɛ?

¹ Wekuhi nɛ a hi Israel ɔ ná Hejɔɔmi Ligbi yemi he mlaa nɛ Yehowa je suɔmi mi nɛ e wo mɛ ɔ he se. Hejɔɔmi Ligbi ɔ ha nɛ Israelbi ɔmɛ jɔɔ a he nɛ a kɛ a he wui a daa ligbi nítsumihi a mi, enɛ ɔ ha nɛ a ná be kɛ susu Yehowa kpakpa peemi kɛ huɛ bɔmi nɛ hi a kɛ Yehowa a kpɛti ɔ he. Fɔli nyɛ nɛ a ngɔ he blɔ nɛ ɔ kɛ du Mawu Mlaa a kɛ wo a bimɛ ɔmɛ a tsui mi. (5 Mose 6:6, 7) Hejɔɔmi Ligbi ɔ ha nɛ daa otsi ɔ, Yehowa webi náa be kɛ susuɔ huɛ bɔmi nɛ ngɛ a kɛ Yehowa a kpɛti ɔ he.

2. Mɛni ji nɔ́ nɛ Hejɔɔmi Ligbi yemi ɔ tsɔɔ wɔ kɛ kɔ Yehowa he?

² Ngɛ anɔkuale mi ɔ, Yehowa hyɛ we blɔ hu kaa wekuhi nɛ a ye Hejɔɔmi Ligbi. Se mlaa nɛ ɔ nɛ wa Mawu ɔ wo ɔ tsɔɔ wɔ nɔ́ ko kɛ kɔ e he. Be tsuaa be ɔ, e suɔ nɛ e hi ha e webi konɛ huɛ bɔmi kpakpa nɛ hi e kɛ mɛ a kpɛti hulɔ. (Yes. 48:17, 18) Mwɔnɛ ɔ, gbɔkuɛ Weku Mawu Jami ɔ ji blɔ kake nɔ nɛ Yehowa guu nɛ e kɛ jeɔ suɔmi nɛ ɔ kpo kɛ tsɔɔ wɔ.

3. Mɛni ji yi mi tomi heje nɛ a to gbɔkuɛ Weku Mawu Jami ɔ sisi?

³ Mɛni Ji Yi Mi Tomi Heje Nɛ A To Gbɔkuɛ Weku Mawu Jami ɔ Sisi? Kɛ je January jeha 2009 ɔ, wa bɔni Asafo Womi Mi Nikasemi ɔ kɛ Teokrase Sɔmɔmi Sukuu ɔ kɛ Sɔmɔmi Kpe ɔ tsuo peemi ngɛ gbɔkuɛ kake nɔ. Yi mi tomi kake heje nɛ a pee tsakemi nɛ ɔ ngɛ ji, konɛ wekuhi nɛ a nyɛ nɛ a to gbɔkuɛ pɔtɛɛ ko daa otsi nɛ a kɛ ja Mawu konɛ huɛ bɔmi nɛ ngɛ a kɛ Yehowa a kpɛti ɔ mi nɛ wa. A wo weku tsuaa weku he wami kaa ke e maa hi ɔ, e pee e weku nikasemi ɔ ngɛ gbɔkuɛ nɛ be ko nɛ be ɔ a kɛ peeɔ womi mi nikasemi ɔ nɔ konɛ a to a tsui si kɛ susu Baiblo ɔ mi munyuhi a he, nɛ a ha nɛ a nikasemi ɔmɛ nɛ kɔ a weku ɔ mi hiami níhi a he.

4. Anɛ e sa kaa weku ɔ nɛ ngɔ ngmlɛfia kake pɛ kɛ pee a gbɔkuɛ Weku Mawu Jami ɔ lo? Moo tsɔɔ nya.

⁴ Be ko nɛ be ɔ, loko wa maa ya Asafo Womi Mi Nikasemi ɔ, e he hia nɛ wa dla wa he, nɛ waa sɛ lɔle loo waa nyɛɛ blɔ gagaa, nɛ waa pee ní kpahi hulɔ. Ngɛ wa ti nihi fuu wa blɔ fa mi ɔ, ngmlɛfia kake nikasemi nɛ ɔ nɛ wa maa ya a haa nɛ wa puɛɔ ngmlɛfiahi fuu jamɛ a gbɔkuɛ ɔ. Amlɔ nɛ ɔ, tsakemi nɛ a pee ngɛ bɔnɛ wa yaa asafo mi kpehi ha a mi ɔ ha nɛ wa ná gbɔkuɛ ko nɛ waa kɛ wa weku ɔ blaa kɛ jaa Yehowa. Enɛ ɔ he ɔ, e he hia we nɛ waa ngɔ ngmlɛfia kake pɛ kɛ pee wa gbɔkuɛ Weku Mawu Jami ɔ. Mohu ɔ, e sa nɛ wa susu wa weku mi bimɛ ɔmɛ a hiami níhi kɛ a gbɔjɔmihi a he konɛ waa da lɔɔ nɔ kɛ le be nɛ wa maa ye kɛ kase ní ɔ.

5. Anɛ e sa kaa weku ɔ nɛ bla kɛ susu níhi a he ngɛ be ɔ tsuo nɛ a kɛ peeɔ a gbɔkuɛ Weku Mawu Jami ɔ mi lo? Moo tsɔɔ nya.

⁵ Anɛ E Sa Kaa Weku ɔ Nɛ Bla Kɛ Susu Níhi A He Ngɛ Be ɔ Tsuo Nɛ A Kɛ Peeɔ A Gbɔkuɛ Weku Mawu Jami ɔ Mi Lo? Ke hunomɛ kɛ a yihi kɛ a bimɛ bla kɛ susu Ngmami ɔ he ɔ, lɔɔ yeɔ bua mɛ nɛ a woɔ a sibi he wami. (Rom. 1:12) Weku kpa kpakpa hii a kpɛti. Enɛ ɔ he ɔ, e sa kaa Ngmami ɔ mi níhi a he susumi nɛ pee nɔ́ nɛ he hia titli ngɛ gbɔkuɛ Weku Mawu Jami ɔ mi. Se nɔ tsuaa nɔ nɛ ngɛ weku ɔ mi ɔ hu ma nyɛ ma ná be kɛ pee lɛ nitsɛ e dɛhe nikasemi. Kaa nɔ hyɛmi nɔ́ ɔ, ke weku ɔ tsuo bla kɛ susu níhi a he ta a, a ma nyɛ maa ya nɔ maa hi si konɛ nɔ tsuaa nɔ ngɛ weku ɔ mi ɔ nɛ pee e dɛhe nikasemi. E ma nyɛ maa kase níhi nɛ a ma susu he ngɛ asafo mi kpe ɔ sisi ɔ, loo e kane womi tɛtlɛɛ ɔmɛ. Weku komɛ ma a juɛmi nya si kaa a be TV sue jamɛ a gbɔkuɛ ɔ.

6. Mɛni blɔ nɔ nyɛ ma nyɛ maa gu kɛ susu Ngmami ɔ mi munyu ɔmɛ a he?

⁶ Mɛni Blɔ Nɔ Nyɛ Ma Nyɛ Maa Gu Kɛ Susu Ngmami ɔ Mi Munyu Ɔmɛ A He? Pi be tsuaa be nɛ e sa kaa níhi nɛ nyɛ ma susu he ɔ nɛ pee sane bimi kɛ heto hami. Akɛnɛ weku komɛ suɔ kaa bua jɔmi nɛ hi a Weku Mawu Jami ɔ mi heje ɔ, a to a nikasemi ɔ he blɔ nya kaa bɔnɛ asafo ɔ to kpehi nɛ wa peeɔ ngɛ otsi ɔ mi ɔ he blɔ nya a. A gbaa nɔ́ nɛ a kaseɔ ɔ mi nɛ a guu blɔ slɔɔtoslɔɔtohi a nɔ kɛ susuɔ he. Kaa nɔ hyɛmi nɔ́ ɔ, a ma nyɛ ma bla kɛ kane Baiblo ɔ, nɛ a kase níhi nɛ a ma susu he ngɛ asafo mi kpehi a sisi ɔ, nɛ a nylɔ munyuhi nɛ a kɛ ma tsu ní ngɛ fiɛɛmi mi ɔ mi hulɔ. A ngɔ ga womi komɛ kɛ ha ngɛ bafa 6.

7. Kɛ e sa kaa fɔli nɛ a pee a gbɔkuɛ Weku Mawu Jami ɔ ha kɛɛ?

⁷ Kɛ E Sa Kaa Fɔli Nɛ A Pee A Gbɔkuɛ Weku Mawu Jami ɔ Ha Kɛɛ? Ke nyɛ ha nɛ nyɛ Weku Mawu Jami ɔ sisi ngɔ ɔ, lɔɔ ma ha nɛ nyɛ weku mi bimɛ ɔmɛ maa nu níhi nɛ a maa kase ɔ sisi saminya. Be komɛ ngɛ nɛ ke je mi tsɔ ɔ, nyɛ ma nyɛ maa kase ní ngɛ kpo nɔ. Ke nyɛ ngɛ ní ɔ kasee nɛ e he hia kaa nyɛɛ jɔɔ nyɛ he ɔ, nyɛ ma nyɛ maa pee jã faa. Weku komɛ ngɛ nɛ ke a gbe nikasemi ɔ nya a, a nuu ní kɛ jɔɔ a tsui he. E ngɛ mi kaa e sɛ nɛ fɔli nɛ kã a bimɛ ɔmɛ a hɛ mi loo a tsɔse mɛ ngɛ be mi nɛ a ngɛ gbɔkuɛ Weku Mawu Jami ɔ pee ɔ mohu lɛɛ, se ke a na kaa weku ɔ mi nɔ ko je su pɔtɛɛ ko kpo loo e kɛ haomi pɔtɛɛ ko ngɛ kpee ɔ, a ma nyɛ maa ngɔ be ɔ eko kɛ susu he. Se ke jokuɛ ko pee nɔ́ ko nɛ mi wa a, e maa hi wawɛɛ kaa nyɛɛ kɛ jamɛ a jokuɛ ɔ pɛ ma susu he be kpa ngɛ otsi ɔ mi konɛ zo nɛ ko gbe lɛ ngɛ e nyɛmimɛ ɔmɛ a hɛ mi. E sɛ nɛ nyɛ ha nɛ nyɛ gbɔkuɛ Weku Mawu Jami ɔ nɛ pee kpɛii, mohu ɔ, e pee nɔ́ nɛ ma ha nɛ nɔ tsuaa nɔ bua maa jɔ kaa bɔnɛ wa Mawu ɔ nɛ wa jaa lɛ ɔ hu bua jɔɔ e he ɔ.—1 Tim. 1:11, NW.

8, 9. Kɛ e sa kaa wekuyihi nɛ dla a he kɛ ha a Weku Mawu Jami ɔ ha kɛɛ?

⁸ Kɛ Wekuyi ɔ Ma Plɛ Kɛ Dla E He Kɛ Ha A Weku Mawu Jami ɔ Ha Kɛɛ? Ke wekuyi ɔ sɛɛ hlami nɛ e toɔ nɔ́ nɛ a maa kase ngɛ a gbɔkuɛ Weku Mawu Jami ɔ mi ɔ he blɔ nya, kɛ bɔnɛ a ma plɛ kɛ susu he ha a, weku ɔ náa he se wawɛɛ. (Abɛ 21:5) E sa nɛ huno ɔ kɛ e yo ɔ nɛ a pee kake kɛ susu enɛ ɔ he. (Abɛ 15:22) Wekuyihi, mɛni heje nɛ ke e ngɛ mi hluu ɔ, nyɛ bi we nyɛ bimɛ ɔmɛ konɛ a tsɔɔ níhi nɛ nyɛ ma nyɛ ma susu a he ngɛ nyɛ Weku Mawu Jami ɔ mi ɔ? Ke nyɛ pee jã a, lɔɔ ma ha nɛ nyɛ maa le níhi nɛ a bua jɔɔ he kɛ níhi nɛ hia mɛ.

⁹ E he be hiae kaa daa otsi ɔ, wekuyi ɔ nɛ ngɔ be fuu kɛ dla e he kɛ ha a Weku Mawu Jami ɔ. Eko ɔ, weku ɔ bua maa jɔ ní komɛ nɛ a peeɔ daa otsi ɔ a he, enɛ ɔ he ɔ, e he be hiae kaa wekuyi ɔ nɛ ngɔ nɔ́ ehe ko kɛ piɛɛ a nikasemi ɔ he. Akɛnɛ ke a gbe Weku Mawu Jami ɔ eko tsuaa eko nya a, weku ɔ Mawu jami mi hiami níhi hiɔ wekuyi ɔ juɛmi mi heje ɔ, e maa hi wawɛɛ kaa e ma dla e he kɛ ha Weku Mawu Jami nɛ a maa pee kɛ nyɛɛ se ɔ. Wekuyi komɛ ngmaa níhi nɛ a ma susu he ngɛ a Weku Mawu Jami ɔ mi ɔ nɛ a kɛ mɛtɛɛ hehi nɛ weku mi bimɛ ɔmɛ tsuo ma nyɛ maa na, kaa eko ɔ, a fridge sinyahi a he. Enɛ ɔ haa nɛ weku mi bimɛ ɔmɛ kɛ bua jɔmi hyɛɔ nɔ́ nɛ a ma susu he ɔ blɔ nɛ a náa be kɛ dlaa a he kɛ haa nikasemi ɔ.

10. Kɛ nihi nɛ mɛ pɛ lɛ a ngɛ kɛ nihi nɛ mɛ hu mɛ pɛ ji odasefoli ngɛ a weku ɔmɛ a mi ɔ ma plɛ kɛ ngɔ gbɔkuɛ Weku Mawu Jami be ɔ kɛ tsu ní ha kɛɛ?

¹⁰ Nɛ Ke Imi Pɛ Lɛ I Ngɛ Ye He Ko Aloo Imi Pɛ Ji Odasefono Ngɛ Ye Weku ɔ Mi Nɛɛ? Nihi nɛ mɛ pɛ lɛ a ngɛ ɔ ma nyɛ maa ngɔ gbɔkuɛ Weku Mawu Jami be ɔ kɛ pee a dɛhe nikasemi. Ní nɛ a ma nyɛ maa kase ngɛ a dɛhe ɔ ekomɛ ji, Baiblo ɔ nɛ a maa kane, níhi nɛ a ma susu he ngɛ asafo mi kpehi a sisi ɔ nɛ a maa sɛ hlami maa kase, kɛ Watchtower kɛ Awake! ɔ nɛ a maa kane. Fiɛɛli komɛ ngɔɔ be nɛ a kɛ peeɔ a dɛhe nikasemi ɔ kɛ toɔ enɛ ɔ nane mi. Be komɛ ɔ, a ma nyɛ maa fɔ fiɛɛlɔ kpa lo weku ko nine kɛ ba piɛɛ a he konɛ a kɛ mɛ nɛ susu Ngmami ɔ mi munyuhi a he kɛ wo a sibi he wami.

11, 12. Ke wa peeɔ Weku Mawu Jami ɔ daa a, mɛni se lɛ wa ma ná?

¹¹ Ke Wa Peeɔ Weku Mawu Jami ɔ Daa a, Mɛni Se Wa Ma Ná? Huɛ bɔmi gbagbanii hii Yehowa kɛ nihi nɛ a kɛ a tsui tsuo jaa lɛ ɔ a kpɛti. Jehanɛ se hu ɔ, weku kpa nɛ mi wa hii wekuhi nɛ a peeɔ kake kɛ jaa Yehowa a, a kpɛti. Huno ko kɛ e yo tsɔɔ jɔɔmihi nɛ a ngɛ náe, a ngma ke: “E ngɛ mi kaa wa ji blɔ gbali nɛ wa be bimɛ mohu, se waa kɛ wa gbɔkuɛ Weku Mawu Jami ɔ fiɛ we. Wa na kaa huɛ bɔmi kpakpa ngɛ wɔ ni enyɔ ɔmɛ wa kpɛti nɛ wa hɛ wɔ kɛ su wa hiɔwe Tsɛ ɔ he haa nitsɛ. Amlɔ nɛ ɔ, ngɛ ligbi nɛ wa peeɔ wa Weku Mawu Jami ɔ nɔ ɔ, ke wa te si mɔtu ɔ, wa biɔ wa sibi ke: ‘Anɛ o le nɔ́ nɛ wa maa pee gbɔkuɛ nɛ ɔ lo? Wa maa pee wa gbɔkuɛ Weku Mawu Jami ɔ!’”

¹² Blɔ nya nɛ a to kaa wekuhi nɛ a je gbɔkuɛ ko nɛ a kɛ ja Mawu ɔ hu ngɛ wekuhi nɛ a be deka a ye buae. Binyɛ ko nɛ lɛ nɔ kake pɛ lɛ e hyɛɛ e binyumuwi enyɔ a nɔ nɛ e ji daa blɔ gbalɔ ɔ ngma ke: “Be ko nɛ be ɔ, wa nyɛ we nɛ waa pee weku nikasemi. Ke e ngɛ mi hluu loko wa peeɔ si kake. I li bɔnɛ ma pee ha konɛ wa weku nikasemi ɔ nɛ ya nɔ daa. Enɛ ɔ he ɔ, i ngɛ nyɛ womi nɛ ɔ ngmae konɛ ma kɛ na nyɛ si wawɛɛ ngɛ gbɔkuɛ Weku Mawu Jami blɔ nya tomi ɔ he. Wa nyɛɔ nɛ wa peeɔ weku nikasemi daa, nɛ wa ngɛ he se náe.”

13. O weku ɔ ma ná blɔ nya tomi nɛ ɔ he se jio, a be he se náe jio, e daa si ngɛ mɛni nɔ?

¹³ Kaa bɔnɛ Hejɔɔmi Ligbi yemi ɔ ji nike ní nɛ wa hiɔwe Tsɛ ɔ kɛ ha nɛ́ e ye bua wekuhi ɔ, jã kɛ̃ lɛ e to Weku Mawu Jami ɔ he blɔ nya kɛ ha wɔ kaa nike ní konɛ e ye bua wekuhi. (Yak. 1:17) Huɛ bɔmi kpakpa maa hi Israelbi a wekuhi kɛ Mawu a kpɛti jio, huɛ bɔmi kpakpa be a kɛ Mawu a kpɛti hie jio ɔ, kulaa daa si ngɛ bɔnɛ a yeɔ Hejɔɔmi Ligbi ɔ ha a nɔ. Ke wɔ hu wa weku ɔmɛ ma ná Mawu tsɔsemi he se ɔ, e daa si ngɛ bɔnɛ wa maa ngɔ gbɔkuɛ nɛ a kɛ ha kaa wa kɛ pee wa Weku Mawu Jami ɔ kɛ tsu ní ha a nɔ. (2 Kor. 9:6; Gal. 6:7, 8; Kol. 3:23, 24) Ke o weku ɔ ngɔ blɔ nya tomi nɛ ɔ kɛ tsu ní saminya a, mɛ hu a ma nyɛ ma de nɔ́ nɛ la polɔ ɔ de ɔ, e ke: ‘Se imi lɛɛ e hi kaa ma hɛ kɛ su Mawu he. Ma ya sa we ngɛ Nyɔmtsɛ Yehowa ngɔ.’—La 73:28.

[Bua jɔmi munyu nɛ a ma nɔ mi ngɛ ba fa 5]

E sɛ nɛ nyɛ ha nɛ nyɛ gbɔkuɛ Weku Mawu Jami ɔ nɛ pee kpɛii, mohu ɔ, e pee nɔ́ nɛ ma ha nɛ nɔ tsuaa nɔ bua maa jɔ kaa bɔnɛ wa Mawu ɔ nɛ wa jaa lɛ ɔ hu bua jɔɔ e he ɔ

[Daka ngɛ ba fa 6]

MO KƐ TO

Gbɔkuɛ Weku Mawu Jami ɔ He Ga Womi Komɛ

Baiblo:

• Nyɛ bla kɛ kane daa otsi Baiblo kanemi ɔ fã ko. Ke ní kanemi ɔ biɔ nɛ nɔ ko nɛ e pee e he amaniɛ bɔlɔ konɛ ni kpahi hu nɛ a kane munyuhi nɛ ni komɛ ngɛ Baiblo ɔ mi ɔ tu ɔ, nyɛ ma nyɛ ma gba kɛ ha nyɛ he nɛ nyɛɛ kane lɛ jã.

• Nyɛɛ pee fã komɛ nɛ nyɛ kane ngɛ Baiblo ɔ mi ɔ he peemi kɛ tsɔɔ.

• Nyɛ ha nɛ weku mi bimɛ ɔmɛ a ti nɔ tsuaa nɔ nɛ e kane Baiblo ɔ mi womi ɔ yi komɛ kɛ sɛ hlami nɛ e ngma sane bimi kake loo enyɔ nɛ e ngɛ ngɛ nɔ́ nɛ e kane ɔ he. Lɔɔ se ɔ, nyɛ bla kɛ hla nɔ tsuaa nɔ sane bimi ɔmɛ a heto.

• Daa otsi ɔ, nyɛɛ ngma Baiblo ngmami kake kɛ fɔ womi nɔ nɛ nyɛɛ bɔ mɔde kaa nyɛ maa kase ngmami ɔ kɛ wo nyɛ yi mi nɛ nyɛ be womi ɔ nɔ hyɛe kɛ kane, konɛ nyɛɛ kase bɔnɛ nyɛ ma plɛ kɛ tsɔɔ jamɛ a ngmami ɔ nya ha hulɔ. Nyɛ bua womihi nɛ nyɛ ngma Baiblo ngmami ɔmɛ kɛ fɔ a nɔ ɔ nya konɛ daa otsi ɔ, nyɛɛ ka nyɛ juɛmi nɛ́ nyɛɛ hyɛ ngmamihi abɔ nɛ nyɛ ma nyɛ ma kai.

• Nyɛɛ fia Baiblo ɔ nɛ a kane kɛ wo CD nɔ ɔ nɛ nyɛɛ bu tue konɛ nyɛɛ kane ngɛ nyɛ Baiblo ɔ mi kɛ nyɛɛ se.

Kpehi:

• Nyɛ bla kɛ kase níhi nɛ nyɛ ma ya kase ngɛ kpe ɔmɛ a sisi ɔ fã ko.

• Nyɛɛ kase Matsɛ Yemi lahi nɛ a ma la ngɛ kpehi nɛ a maa pee ngɛ otsi nɛ maa ba a sisi ɔ.

• Ke weku ɔ mi nɔ ko ngɛ nítsumi ngɛ Teokrase Sɔmɔmi Sukuu ɔ loo Sɔmɔmi Kpe ɔ mi ɔ, nyɛ susu bɔnɛ e maa pee lɛ ha a he, loo nyɛ ha nɛ e pee bɔnɛ e maa pee lɛ ha a kɛ tsɔɔ weku ɔ.

Weku ɔ Mi Hiami Níhi:

• Nyɛ susu níhi a he kɛ je Young People Ask loo Learn From the Great Teacher womi ɔmɛ a mi.

• Nyɛ ha nɛ a pee bɔnɛ a ma plɛ kɛ tsu sanehi nɛ a kɛ ma nyɛ maa kpe ngɛ sukuu ɔ he ní ha a he peemi kɛ tsɔɔ.

• Nyɛ ha nɛ fɔli ɔmɛ nɛ a pee a ní kaa jokuɛwi konɛ jokuɛwi ɔmɛ hu nɛ a pee a ní kaa fɔli konɛ a kɛ tsɔɔ níhi a mi. Jokuɛwi ɔmɛ nɛ a ya hla níhi a mi ngɛ sane ko he konɛ a kɛ fɔli ɔmɛ nɛ ba susu he.

Sɔmɔmi Nítsumi ɔ:

• Nyɛɛ pee bɔnɛ nyɛ ma plɛ kɛ ngɔ asafo ɔ womi ɔmɛ kɛ ha Hɔ kɛ Hɔgba ha a he peemi kɛ tsɔɔ.

• Nyɛ susu otihi nɛ weku ɔ kɛ ma nyɛ maa ma e hɛ mi bɔnɛ pee nɛ e nyɛ nɛ e tsu babauu ngɛ sɔmɔmi nítsumi ɔ mi ngɛ Kaimi ɔ yemi be ɔ loo blɔ hami be ɔ a he.

• Nyɛ ha weku ɔ mi nɔ tsuaa nɔ hɛngmɛfia bɔɔ konɛ e kɛ hla níhi a mi ngɛ bɔnɛ e ma plɛ kɛ ha sane bimi kpahi nɛ eko ɔ, nihi ma bi lɛ ngɛ fiɛɛmi nítsumi ɔ mi ɔ a hetohi ha, konɛ nyɛɛ pee he peemi kɛ tsɔɔ.

Ga Womi Kpahi:

• Nyɛ bla kɛ kane womi tɛtlɛɛ ɔmɛ nɛ a ba ehe ɔ a mi munyu ko.

• Nyɛ ha nɛ weku ɔ mi nɔ tsuaa nɔ nɛ e kane womi tɛtlɛɛ ɔmɛ nɛ a ba ehe ɔ a mi munyu ko nɛ e bua jɔ he kɛ sɛ hlami, konɛ e tsɔɔ níhi nɛ e kadi ngɛ nɔ́ nɛ e kane ɔ mi.

• Ke e ngɛ mi hluu ɔ, nyɛɛ fɔ fiɛɛlɔ ko loo nyɛminyumu ko kɛ e yo nine konɛ a ba piɛɛ nyɛ he kɛ pee nyɛ gbɔkuɛ Weku Mawu Jami ɔ, nyɛ ma nyɛ ma bi mɛ munyu.

• Nyɛɛ hyɛ wa video ɔ eko nɛ nyɛ susu he.

• Nyɛ bla kɛ susu Awake! mi munyuhi nɛ ji, “Young People Ask” (Sane Nɛ Nihewi Kɛ Yihewi Bi) loo “For Family Review” (Munyu Nɛ Weku Ma Susu He) ɔ a he.

• Nyɛ bla kɛ susu Watchtower mi munyuhi nɛ ji, “Teach Your Children” (Moo Tsɔɔ O Bimɛ Ɔmɛ Ní) loo “For Young People” (Munyu Kɛ Ha Jokuɛwi) ɔ a he.

• Nyɛɛ kane Yearbook ehe loo womi ehe nɛ a je kpo ngɛ kpe ngua a sisi ɔ fã ko konɛ nyɛ susu he.

• Ke nyɛ ya kpe wayo loo kpe ngua a nɛ nyɛ ba a, nyɛ susu munyu otihi nɛ nyɛ kadi ɔ a he.

• Nyɛ yɔse nɔ́ ko nɛ Yehowa bɔ konɛ nyɛ susu nɔ́ nɛ jamɛ a nɔ́ ɔ tsɔɔ nyɛ ngɛ Yehowa he ɔ he.

• Nyɛ bla kɛ pee Baiblo ɔ mi nɔ́ ko he nɔ, loo kɛ susu sanehi a nya tsɔɔmi dakahi, loo zugbahi a he fonihi a he.