O Kɛ Kã Nɛ Ye Odase Ngɛ Nítsumi Hehi
1. Mɛni heje nɛ e sɛ nɛ wa kɔni mi nɛ jɔ ke wa yeɔ gbeye kaa wa maa ye odase ngɛ nítsumi hehi?
1 Anɛ o yeɔ gbeye kaa o maa ye odase ngɛ nítsumi hehi lo? Ke o yeɔ gbeye ɔ, ko ha nɛ lɔɔ nɛ ha nɛ o kɔni mi nɛ jɔ, ejakaa e biɔ nɛ Paulo nɛ lɛ po e fiɛɛɔ kɛ kã nɛ e yi gbeye ɔ, nɛ ‘pee kã’ konɛ e nyɛ nɛ e fiɛɛ. (1 Tes. 2:2) Ngɛ kukuhi nɛ nyɛɛ se ɔ a mi ɔ, wa ma susu ní komɛ nɛ woɔ wa he gbeye ngɛ odase nɛ wa maa ye ngɛ nítsumi hehi kɛ ga womi kpakpa komɛ nɛ maa ye bua wɔ ɔ a he.
2. Mɛni heje nɛ e sɛ nɛ waa ye tsui kaa ke wa ye ní tsuli ɔmɛ odase ɔ, lɔɔ ma ha a mi mi ma fu ɔ?
2 Anɛ Ke Wa Ye Ní Tsuli Ɔmɛ Odase ɔ, A Mi Mi Ma Fu Lo? Ngɛ nítsumi hehi fuu ɔ, ní tsuli kɛ ma mi bi yeɔ jua, enɛ ɔ he ɔ, ní tsuli hyɛɛ blɔ kaa nihi ma bi mɛ munyu. Akɛnɛ a ma nyɛ maa bu mo kaa o ji nɔ ko nɛ e kɛ mɛ yeɔ jua heje ɔ, a ma nyɛ ma je bumi kpo ha mo. Ke o wo tade nɛ sa, nɛ o je huɛ bɔmi su kɛ suɔmi kpo kɛ tsɔɔ mɛ ɔ, lɔɔ ma ha nɛ a maa bu mo.
3. Mɛni o maa pee konɛ o ko wo nihi nɛ ní tsuli ɔmɛ kɛ mɛ ngɛ jua yee ɔ, a mi mi la?
3 Anɛ E He Maa Hia Nɛ Ma Ye Ní Tsuli Ɔmɛ Odase Ngɛ A Jua Yeli Fuu A Hɛ Mi Lo? Ke e maa hi ɔ, moo ya tsuapohi a mi ngɛ be mi nɛ nihi pi ngɛ ní tsuli ɔmɛ a nɔ tsɔ, kaa nɔ hyɛmi nɔ́ ɔ, benɛ a bli tsuapo ɔ nɔuu. Moo mlɛ kɛ ya si benɛ nɔ ko be nítsumitsɛ ɔ loo ní tsuli ɔmɛ a nya dalɔ ɔ ngɔ loko o ya e ngɔ. Koo tu munyu gagaaga.
4. Mɛni wa ma nyɛ ma de ke wa ngɛ odase yee ngɛ nítsumi hehi?
4 Mɛni Ma De? Ke ní tsuli ɔmɛ a he hiɛ ɔ, o kɛ a nya dalɔ ɔ nɛ tu munyu. O ma nyɛ ma de ke: “Wa pɔɛ ní tsuli nami ngɛ a wehi a mi, enɛ ɔ he ɔ, wa ba nyɛ nítsumi he ɔ. I le kaa nyɛ ngɛ ní tsue, enɛ ɔ he ɔ, ma po ye munyu ɔ kpiti.” Bɔnɛ pee nɛ nihi nɛ a ko bu wɔ kaa wɔ hu wa ji ní juali ɔ, e maa hi wawɛɛ kaa wa be yemi kɛ buami blɔ nya tomi ɔ nɔ ta woe, ja a bi wɔ blɔ nɔ nɛ wa guu kɛ náa sika kɛ hyɛɔ wa fiɛɛmi nítsumi ɔ nɔ. O ma nyɛ ma bi nítsumitsɛ ɔ blɔ kaa o kɛ ní tsuli ɔmɛ maa tu munyu kpiti ke nítsumi ɔ si fɔfɔɛ maa ngmɛ blɔ kaa o pee jã. Moo tu munyu kaketoo ɔ nɔuu kɛ tsɔɔ mɛ. Ke o na kaa ní tsulɔ ko be deka a, poo o munyu ɔ kpiti nɛ o ha lɛ dɛ womi. Ke o nyɛ we nɛ o kɛ ní tsuli ɔmɛ nɛ tu munyu ɔ, eko ɔ, a maa ngmɛ mo blɔ nɛ o si womihi ha mɛ ngɛ he nɛ ní tsuli ɔmɛ jɔɔ a he ngɛ ɔ.
5. Mɛni yi mi tomihi a heje nɛ e sa kaa waa ye odase ngɛ nítsumi hehi kɛ kã a?
5 Yesu kɛ Paulo fiɛɛ kɛ tsɔɔ nihi ngɛ a nítsumi hehi kɛ kã, enɛ ɔ he ɔ, mo hu o ma nyɛ maa pee jã. (Mat. 4:18-21; 9:9; Níts. 17:17) Mo bi Yehowa nɛ e ye bua mo nɛ e je fɔ̃ ngɛ o mi konɛ o ko ye gbeye. (Níts. 4:29) Wa pɔɔ nihi fuu nami ngɛ a nítsumi hehi, enɛ ɔ heje ɔ, mɛni heje mɔ nɛ o yi odase ngɛ lejɛ ɔmɛ konɛ e wo yiblii?