‘Moo Nyɛɛ Ngɛ Hemi Kɛ Yemi Nya, Se Pi Níhi Nɛ A Naa a Nya’

Loko a ma sa Yerusalem ma a yi nɛ a ma kpata e hɛ mi ɔ, bɔfo Paulo ngma ke, e sa nɛ Kristofohi nɛ a ji Kristo ta buli kpakpahi ɔ nɛ a hyɛ blɔ kaa a kɛ si himi nɛ mi wa maa kpe. E de hu kaa a ko ngɔ níhi nɛ ma ha mɛ bua jɔmi ɔ kɛ pee nɔ́ titli ngɛ a si himi mi. (2 Tim. 2:3, 4) Akɛnɛ e be kɛe nɛ a ma kpata je yaya nɛ ɔ hɛ mi he je ɔ, ja wa hemi kɛ yemi mi wa loko wa ma nyɛ maa ngɔ mumi níhi kɛ pee nɔ́ titli ngɛ wa si himi mi. (2 Kor. 4:18; 5:7) Hyɛ ‘Walk by Faith, Not by Sight’ video ɔ. (Yaa jw.org, nɛ o ya PUBLICATIONS > VIDEOS.) Moo to nɔ́ nɛ ba Naham kɛ Abital a nɔ benɛ a ya di he lo nya níhi a se ɔ he hɛ. Lɔ ɔ se ɔ, mo ha sane bimi nɛ ɔmɛ a heto.

(1) Mɛni ji “ní hiemi nɔ́” nɛ maa si ngɛ he klɔuklɔu ɔ ngɛ kaseli ɔmɛ a be ɔ mi ɔ? Nɛ mɛni nɛ e sa kaa Kristofohi nɛ a ngɛ Yerusalem jamɛ a be ɔ mi ɔ nɛ a pee? (Mat. 24:15, 16) (2) Mɛni he je nɛ e sa nɛ nihi nɛ a maa je ma a mi ɔ nɛ a ná hemi kɛ yemi ɔ? (3) Mɛni ji níhi nɛ e sa kaa a kɛ sã afɔle konɛ a nyɛ nɛ a je ma a mi? (4) Mɛni he je nɛ Naham kɛ Abital a kpɛ se kɛ je ma a mi ɔ? (Mat. 24:17, 18) (5) Mɛni hemi kɛ yemi he ka kpa ko nɛ Rahel kɛ kpe benɛ e ngɛ Yerusalem ma a mi jee ɔ? (Mat. 10:34-37; Mar. 10:29, 30) (6) Mɛni nɛ wa ma nyɛ maa kase ngɛ blɔ nɔ nɛ Etan gu kɛ je hemi kɛ yemi kpo, nɛ e ngɔ e hɛ kɛ fɔ Yehowa nɔ ɔ mi? (7) Mɛni si himi nɛ mi wa nɛ Kristofohi nɛ a hi Pella a kɛ kpe? (8) Mɛni blɔ nɔ Naham kɛ Abital a hemi kɛ yemi ɔ mi gbɔjɔ bɔɔbɔɔbɔɔ? (9) Kɛ Yehowa plɛ kɛ hyɛ Kristofohi nɛ a hi Pella a, a nɔ ha kɛɛ? (Mat. 6:33; 1 Tim. 6:6-8) (10) Kɛ wa ma plɛ kɛ kase Abraham kɛ Sara a nɔ hyɛmi nɔ́ ɔ ngɛ nyagbe be nɛ ɔ mi kɛɛ? (Heb. 11:8-10) (11) Mɛni nɛ Naham kɛ Abital a susu nɛ lɔ ɔ ha nɛ a kpale a se kɛ ho Yerusalem ya a, se mɛni he je nɛ a susumi ɔ dɛ ɔ? (Luka 21:21) (12) Benɛ Naham kɛ Abital kpale a se kɛ ho Yerusalem ya a, kɛ ma a si fɔfɔɛ ngɛ kɛɛ? (13) Mɛni he je nɛ e sa kaa wa hemi kɛ yemi mi nɛ wa amlɔ nɛ ɔ loko je nɛ ɔ nyagbe nɛ ba a?​—Luka 17:31, 32; 21:34-36.

Hemi kɛ yemi nya nɛ wa maa nyɛɛ ngɛ ɔ biɔ nɛ (1) wa ná hɛ kɛ nɔ fɔmi ngɛ Yehowa blɔ tsɔɔmihi a mi, (2) waa ngɔ e blɔ tsɔɔmihi kɛ tsu ní ngɛ wa si himi mi (3) wa bua nɛ jɔ mumi mi níhi a he pe he lo nya níhi. Nyɛ ha nɛ waa ya nɔ nɛ waa nyɛɛ ngɛ hemi kɛ yemi nya, nɛ waa le kaa “je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa. Se nɔ nɛ peeɔ Mawu suɔmi nya ní ɔ, lɛɛ e ngɛ kɛ yaa neneene.”​—1 Yoh. 2:17.