Maria Ngɔ Hɔ Be Mi Nɛ A Tsu We E He Ní Lolo

Amlɔ nɛ ɔ, Maria hɔ ɔ ye nyɔhiɔ eywiɛ. Mo kai kaa benɛ e ngɔ hɔ pɛ ɔ, e ya e weku no Elizabet ngɔ ngɛ Yudea, nɛ e ya ye be saii ngɛ lejɛ ɔ. Se amlɔ nɛ ɔ lɛɛ Maria kpale kɛ ba e we mi ngɛ Nazaret. E be kɛe nɛ e mi ɔ maa je kpo, nɛ nɔ tsuaa nɔ maa na kaa hɔ ngɛ e he. Mo susu bɔ nɛ e maa hao wawɛɛ ha a he nɛ o hyɛ!

Nɔ́ nɛ pa puɛ sane ɔ kulaa ji kaa, kapitɛ ko nɛ a tsɛɛ lɛ Yosef bi e si nɛ e maa ngɔ lɛ. Maria le kaa Mlaa nɛ Mawu kɛ ha Israel bi ɔmɛ ɔ tsɔɔ kaa ke yiheyo ko nɛ a bi e si kaa a maa ngɔ lɛ kɛ e he ya ha nyumu kpa nɛ e kɛ lɛ ná bɔmi ɔ, a fiaa lɛ tɛ nɛ e gboɔ. (5 Mose 22:23, 24) E ngɛ mi kaa Maria bɛ e je mi basabasa mohu lɛɛ, se eko ɔ, e li bɔ nɛ e ma plɛ kɛ bɔ Yosef amaniɛ ha kaa hɔ ngɛ e he, nɛ e li bɔ nɛ Yosef maa pee e ní ha hulɔ.

Maria hia blɔ nyɔhiɔ etɛ, lɔ ɔ he ɔ, e ngɛ heii kaa Yosef hɛ ngɛ jae ngɛ e he. Benɛ a na a sibi ɔ, e maa pee kaa Maria de Yosef si fɔfɔɛ nɛ e ya je mi ɔ, nɛ e bɔ mɔde kaa e maa tsɔɔ lɛ níhi a nya kaa e ngɔ hɔ kɛ gu Mawu mumi klɔuklɔu ɔ nɔ. Se kaa bɔ nɛ o le ɔ, e he maa wa kɛ ha Yosef kaa e maa nu lɛ sisi nɛ e ma he munyu nɛ ɔ maa ye.

Yosef le kaa Maria ji yo kpakpa, nɛ nihi buu lɛ saminya. Enɛ ɔ he ɔ, Yosef suɔ lɛ wawɛɛ. Se ngɛ nɔ́ nɛ Maria de lɛ ɔ tsuo se ɔ, e pee Yosef kaa nyumu kpa ko lɛ wo Maria hɔ. Yosef sume nɛ a fiaa Maria tɛ nɛ a gbe lɛ, loo a pue e hɛ mi si ngɛ magbɛ nɔ; lɔ ɔ he ɔ, e pee e juɛmi kaa e maa ngmɛɛ e he kpoo. Ngɛ jamɛ a be ɔ mi ɔ, ke nyumu ko bi yo ko si nɛ e maa ngɔ lɛ ɔ, a buu mɛ kaa nɔ kɛ e yo, nɛ ke nyumu ɔ be yo ɔ ngɔe hu ɔ, e biɔ nɛ e ya ngmɛɛ yo ɔ he ngɛ mlaa nya.

Yosef ya susu sane ɔ he hluu nɛ e nɔ mahe mi. Yehowa bɔfo ko je e he kpo kɛ tsɔɔ lɛ ngɛ nlami mi, nɛ e de lɛ ke: ‘Koo ye gbeye kaa o kɛ Maria maa hi si kaa o yo; hɔ nɛ e hɛɛ nɛ ɔ je mumi klɔuklɔu ɔ mi. E ma fɔ binyumu, nɛ o maa wo lɛ biɛ ke Yesu, ejakaa e ma he e ma a yi wami kɛ je a he yayami ɔmɛ a mi.’​​—Mateo 1:20, 21.

Benɛ Yosef hɛ tsɛ̃ ɔ, e bua jɔ kaa sane ɔ mi tɛ ha lɛ! E to we tsle ngɛ nɔ́ nɛ bɔfo ɔ de lɛ kaa e pee ɔ he. E ya tsu Maria he ní, nɛ e kɛ lɛ ya e we mi. Nɔ́ nɛ Yosef pee nɛ ɔ ji odase kɛ ha ma bi kaa Yosef kɛ Maria ba pee nɔ kɛ e yo. Se benɛ Maria hɛɛ Yesu hɔ ɔ tsuo ɔ, Yosef kɛ lɛ ná we bɔmi.

Nyɔhiɔ komɛ a se benɛ Maria mi ɔ wa a, e he ba hia nɛ Yosef kɛ lɛ nɛ hia blɔ. Se amlɔ nɛ ɔ nɛ e piɛ bɔɔ nɛ Maria ma fɔ ɔ, jije a yaa?