NÍ KASEMI 10

Mo Tsake O Gbi ɔ Mi

Abɛ 8:4, 7

OTI: Mo wo o gbi nɔ, moo ba o gbi ɔ si, moo tu munyu blɛuu, aloo moo tu munyu mlamlaamla kɛ je oti ɔmɛ kpo konɛ tue buli ɔmɛ a bua nɛ jɔ munyu ɔ he.

BƆ NƐ O MAA PEE LƐ HA:

Mo wo o gbi ɔ nɔ aloo moo ba o gbi ɔ si. Ke o suɔ nɛ o ma otihi a nɔ mi nɛ o wo tue buli ɔmɛ he wami ɔ, mo wo o gbi nɔ. Mo wo o gbi nɔ ke o ngɛ kojomi sɛ gbi ko kanee ngɛ Baiblo ɔ mi. Ke o ngɛ hlae nɛ tue buli ɔmɛ nɛ a hyɛ nɔ́ ko blɔ, aloo a na kaa nɔ́ nɛ o ma demi ɔ ngɛ gbeye ɔ, moo ba o gbi ɔ si.

Koo hi o gbi nɔ woe kpamisaa konɛ tue buli ɔmɛ ko susu kaa o ngɛ a hɛ mi kãe. Ko wo o gbi ɔ nɔ tsɔ konɛ o ko gbla tue buli ɔmɛ a juɛmi kɛ ba o nɔ.
Ha nɛ o gbi ɔ kɛ si fɔfɔɛ ɔ nɛ kɔ. Ke e maa hi ngɛ o je gbi mi ɔ, ngɔɔ gbi nɛ nya wa kɛ tsu ní kɛ je bua jɔmi kpo aloo kɛ tsɔɔ nɔ́ ko klemi loo e kami. Ngɔɔ gbi nɛ nya wɛ kɛ tsu ní kɛ tsɔɔ nɔ ko nɛ e hao, aloo níhi nɛ a ngɛ aywilɛho.
Moo tu munyu blɛuu aloo mlamlaamla. Moo tu munyu mlamlaamla kɛ tsɔɔ kaa o bua jɔ. Mo ná tsui kɛ tu munyu ke o ngɛ otihi a nɔ mi mae.

Ko tsake o gbi si kake too konɛ tue buli ɔmɛ a tsui ko po. Koo tu munyu mlamlaamla tsɔ hulɔ konɛ o nyɛ nɛ o tsɛ munyungu ɔmɛ saminya.