NÍ KASEMI 7

Munyu Nɛ Da Nɛ Plɛɔ Nɔ Yi Mi

Luka 1:3

OTI: Ngɔɔ munyuhi nɛ odase ngɛ he kɛ tsu ní kɛ ye bua tue buli ɔmɛ konɛ mɛ nitsɛmɛ a nyɛ nɛ a ma sane ɔ nya si saminya.

Ngɔɔ womihi nɛ a mi munyuhi da kɛ tsu ní. Ngɔɔ o munyu ɔ kɛ da Mawu Munyu ɔ nɔ. Ke e maa hi ɔ, moo kane munyu ɔ kɛ je Baiblo ɔ mi tɛɛ. Ke o suɔ nɛ o ngɔ je mi si kpali a níhi a mi hlami ko, amaniɛ bɔmi ko, níhi a si kpami ko, aloo odase kpa ko kɛ tsu ní ɔ, moo sɛ hlami nɛ o hyɛ kaa loloolo ɔ, e ji anɔkuale lo.
Ngɔɔ womihi kɛ tsu ní ngɛ blɔ nɛ da nɔ. Ke o ngɛ ngmami ɔ mi tsɔɔe ɔ, ha nɛ e kɛ kuku kpahi nɛ ngɛ jamɛ a ngmami ɔ mi, kɛ Baiblo ɔ tsuo, kɛ womihi nɛ “tsɔlɔ anɔkualetsɛ kɛ ní lelɔ ɔ” pee ɔ nɛ kɔ. (Mat. 24:45) Ke o maa ngɔ womi ko mi munyu kɛ tsu ní ɔ, o munyu ɔ ko je ekpa ngɛ nɔ́ nɛ womi ngmalɔ ɔ de ɔ he.

Koo wo munyuhi nɛ odase ngɛ he aloo yibɔhi a he zã. Hyɛ saminya nɛ o ko tsake munyu ko kaa “ni komɛ” kɛ pee “nihi babauu,” aloo “be komɛ” kɛ pee “be fɛɛ be,” aloo “e ma nyɛ maa pee kaa” kɛ pee “eko ɔ.”
O kɛ tue buli ɔmɛ nɛ susu odase ɔ he. Ke o kane ngmami ko aloo o tsɛ munyu ko se kɛ je womi ko mi ɔ, mo bi sanehi aloo o kɛ nɔ́ he tomi nɔ́ ko nɛ tsu ní kɛ tsɔɔ munyu ɔ mi kɛ ye bua o tue buli ɔmɛ nɛ a mwɔ sane ɔ nya.