NÍ KASEMI 13

Tsɔɔ Se Nami Nɛ Ngɛ Munyu ɔ He

Abɛ 3:21

OTI: Moo ye bua o tue buli ɔmɛ nɛ a na bɔ nɛ o munyu ɔ maa ye bua mɛ ha, nɛ́ o tsɔɔ mɛ bɔ nɛ a kɛ nɔ́ nɛ a kase ɔ ma tsu ní ha.

Mo susu o tue buli ɔmɛ a he. Mo bi o he ke, ‘Mɛni he je nɛ e sa nɛ ye tue buli ɔmɛ nɛ a nu munyu nɛ ɔ, nɛ mɛni nɛ ngɛ munyu nɛ ɔ mi nɛ e maa ye bua mɛ wawɛɛ?’
O munyu ɔ nɛ tsɔɔ tue buli ɔmɛ nɔ́ nɛ e sa kaa a pee. Ke o je o munyu ɔ sisi pɛ ɔ, e sa nɛ tue buli ɔmɛ a ti nɔ fɛɛ nɔ nɛ na kaa munyu ɔ kɔ e he. Ke o ngɛ oti ɔmɛ a mi tsɔɔe ɔ, tsɔɔ bɔ nɛ a kɛ ma tsu ní ha, mohu pe nɛ o maa tu munyu ɔ gbajaa, loo o kɛ maa lɔgɔ si.

Moo je suɔmi mi kɛ tsɔɔ mɛ bɔ nɛ a kɛ Baiblo sisi tomi mlaahi ma tsu ní ha konɛ a na kaa o susuɔ a he. Koo tu munyu nɛ ma ha nɛ o tue buli ɔmɛ a he nile maa hao mɛ. Mohu ɔ, ha nɛ a hemi kɛ yemi kɛ suɔmi nɛ a ngɛ kɛ ha Yehowa a mi nɛ wa, nɛ́ o ná nɔ mi mami kaa a maa pee nɔ́ nɛ da.