NÍ KASEMI 2

Munyu ɔ Nɛ Pee Ní Sɛɛmi

2 Korinto Bi 2:17

OTI: Moo je o tsui mi kɛ tu munyu konɛ o tue buli ɔmɛ nɛ a na bɔ nɛ o naa mɛ ha, kɛ bɔ nɛ o bua jɔ munyu ɔ he ha.

Moo sɔle nɛ o dla o he saminya. Moo sɔle konɛ o nyɛ nɛ o ngɔ o juɛmi kɛ ma munyu ɔ nɔ, se pi mo nitsɛ o nɔ. Ha nɛ otihi nɛ o maa tu he munyu ɔ nɛ hi o juɛmi mi. Ngɔɔ mo nitsɛ o munyu kɛ tsɔɔ níhi a mi mohu pe nɛ o maa kane nɔ́ nɛ a ngma a.

Ke o to kaa o maa kane munyu ko ngɛ Baiblo ɔ aloo Baiblo kasemi womi ko mi ɔ, moo kane lɛ si abɔ konɛ ke o ngɛ kanee ha o tue buli ɔmɛ ɔ, o nya ko tɛ si. Ke o tsɛ nɔ ko munyu se ɔ, moo ngɔ he numi nɛ sa kɛ kane munyu ɔ, se koo wo he zã.
Moo tu munyu kɛ je o tsui mi. Mo susu tue buli ɔmɛ a he. Bi o he ke, ‘Mɛni he je nɛ e sa nɛ a nu munyu nɛ ɔ?’ Ngɔɔ o juɛmi kɛ ma a nɔ. Kɛkɛ ɔ, bɔ nɛ o maa da si ha, bɔ nɛ o ma je o nine ha, kɛ bɔ nɛ o maa pee o hɛ mi ha a ma ha nɛ a na kaa o susuɔ a he.

Ke a ke o kɛ tue buli ɔmɛ nɛ sɛɛ ní ɔ, lɔ ɔ tsɔɔ we kaa o kɛ tue buli ɔmɛ maa tu munyu bɔ nɛ o suɔ. E sa nɛ bumi nɛ hi o munyu ɔ mi. Moo tu gbi ɔ kaa bɔ nɛ a tuɔ lɛ ɔ, nɛ e sisi numi ko ye.
Hyɛ tue buli ɔmɛ a hɛ mi. Moo hyɛ a hɛ mi ke tɔmi ko be he kaa o maa pee jã. Ke o ní tsumi ɔ ji munyu tumi ɔ, moo hyɛ tue buli ɔmɛ a hɛ mi kakaaka mohu pe nɛ o maa hyɛ mɛ tsuo si kake.