NÍ KASEMI 02
Baiblo ɔ Haa Nɛ Wa Náa Hɛ Kɛ Nɔ Fɔmi
Nihi nɛ a ngɛ je ɔ mi tsuo ɔ kɛ nyagbahi fuu kpeɔ. Nyagba nɛ ɔmɛ haa nɛ a naa nɔ, nɛ a haoɔ. Anɛ o kɛ si fɔfɔɛ ko kaa jã kpe hyɛ lo? Eko ɔ, hiɔ ha nɛ o ngɛ nɔ́ nae, aloo o suɔlɔ ko gbenɔ ha nɛ o ngɛ aywilɛho yee. Eko ɔ, o biɔ o he ke, ‘Anɛ si himi ɔ ma ba hi ligbi ko lo?’ Heto nɛ Baiblo ɔ ha ngɛ sane bimi nɛ ɔ he ɔ taa nɔ tsui he wawɛɛ.
1. Mɛni si nɛ Baiblo ɔ wo kɛ kɔ hwɔɔ se he?
Baiblo ɔ tsɔɔ nɔ́ he je nɛ ní yayamihi ngɛ nɔ yae ngɛ je ɔ mi, nɛ e tsɔɔ hu kaa e be kɛe nɛ ní nɛ ɔmɛ tsuo a se maa po. Si womihi nɛ ngɛ Baiblo ɔ mi ɔ ma nyɛ ma ha nɛ waa hyɛ “ní kpakpahi” blɔ. (Kane Yeremia 29:11, 12.) Si womi nɛ ɔmɛ ma nyɛ maa ye bua wɔ konɛ wa nyɛ nɛ waa da wa nyagba amɛ a nya, nɛ́ wa ná bua jɔmi amlɔ nɛ ɔ. Jehanɛ se hu ɔ, si womi nɛ ɔmɛ haa nɛ wa náa nɔ mi mami kaa wa ma ná bua jɔmi kɛ ya neneene.
2. Kɛ Baiblo ɔ wo si kaa hwɔɔ se si himi maa hi ha kɛɛ?
Baiblo ɔ wo si kaa hwɔɔ se ɔ, “gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu.” (Kane Kpo Jemi 21:4.) Waa kɛ nyagbahi fuu kpeɔ mwɔnɛ ɔ nɛ haa nɛ si himi ɔ mi he waa. Ekomɛ ji ohia, dami sane nɛ a yi, hiɔ, kɛ gbenɔ. Se Baiblo ɔ wo si kaa nyagba nɛ ɔmɛ tsuo a se maa po. E wo si hu kaa adesahi ma ná bua jɔmi kɛ ya neneene ngɛ Paradeiso ɔ mi ngɛ zugba a nɔ.
3. Kɛ o ma plɛ kɛ ná nɔ mi mami kaa si womihi nɛ ngɛ Baiblo ɔ mi ɔ maa ba mi kɛɛ?
Nihi babauu hyɛɛ ní kpakpahi blɔ, se a be nɔ mi mami kaa níhi nɛ a ngɛ blɔ hyɛe ɔ maa ba mi. Se Baiblo ɔ mi si womi ɔmɛ lɛɛ a maa ba mi kokooko. Ke wa “kpaa Ngmami ɔ mi saminya” a, e ma ha nɛ hemi kɛ yemi nɛ wa ngɛ ngɛ Baiblo ɔ mi si womi ɔmɛ a mi ɔ mi maa wa. (Ní Tsumi 17:11) Ke o ya nɔ nɛ o kase Baiblo ɔ, o ma nyɛ maa ma o juɛmi nya si kaa o ma he nɔ́ nɛ e de kɛ kɔ hwɔɔ se he ɔ maa ye aloo o be hee ye.
MOO KASE BABAUU
Moo kase ní komɛ nɛ Baiblo ɔ wo a he si kɛ kɔ hwɔɔ se he ɔ a he ní, nɛ́ o hyɛ bɔ nɛ hɛ nɔ kami nɛ Baiblo ɔ kɛ ha a ngɛ nihi babauu ye buae ha.
4. Baiblo ɔ wo si kaa wa ma nyɛ maa hi si kɛ ya neneene nɛ wa be nɔ́ nae
Moo hyɛ ní slɔɔtohi nɛ Baiblo ɔ wo a he si nɛ nyɛɛ se ɔ. A kpɛti te nɛmɛ nɛɛ lɛ o bua jɔ he wawɛɛ? Nɛ mɛni he je?
Nyɛɛ kane ngmamihi nɛ a tsɛ se nɛ kɔɔ si womi nɛ ɔmɛ a he ɔ, nɛ nyɛ susu sane bimihi nɛ nyɛɛ se nɛ ɔmɛ a he:
Anɛ o susu kaa ngmami nɛ ɔmɛ ma nyɛ ma ha nɛ o ná hɛ kɛ nɔ fɔmi lo? Anɛ ngmami nɛ ɔmɛ ma nyɛ maa ye bua o weku li kɛ o huɛmɛ konɛ a ná hɛ kɛ nɔ fɔmi lo?
Ngɔɔ lɛ kaa o ngɛ je ko kaa kikɛ nɛ ɔ mi
JE NƐ NƆ KO . . . |
NƆ FƐƐ NƆ . . . |
|---|---|
|
|
|
|
|
|
|
|
|
|
5. Baiblo ɔ mi si womi ɔmɛ ma nyɛ ma tsake o si himi
Nyagbahi nɛ ngɛ je ɔ mi mwɔnɛ ɔ haa nɛ ni komɛ a kɔni mi jɔ̃ɔ, nɛ a mi mi fuɔ. Ni komɛ bɔɔ mɔde kaa a ma tsake bɔ nɛ níhi ngɛ nɔ yae ha ngɛ je ɔ mi ɔ konɛ je ɔ mi si himi nɛ pee kpakpa. Moo hyɛ bɔ nɛ si nɛ Baiblo ɔ wo kaa níhi maa ya nɔ saminya hwɔɔ se ɔ ngɛ nihi ye buae ha amlɔ nɛ ɔ. Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
Ngɛ video ɔ mi ɔ, mɛni ji nɔ́ ko nɛ ngɛ nɔ yae nɛ gba Rafika nya?
E ngɛ mi kaa dami sane nɛ a yi ɔ se pui mohu lɛɛ, se kɛ Baiblo ɔ ye bua lɛ ha kɛɛ?
Hɛ kɛ nɔ fɔmi nɛ Baiblo ɔ haa wɔ ɔ ma nyɛ maa ye bua wɔ konɛ wa kɔni mi nɛ ko jɔ̃, nɛ́ wa nyɛ nɛ́ waa da wa nyagba amɛ a nya. Nyɛɛ kane Abɛ 17:22 kɛ Roma Bi 12:12, nɛ nyɛ susu sane bimihi nɛ nyɛɛ se nɛ ɔmɛ a he:
Anɛ o susu kaa sɛ gbi nɛ ngɛ Baiblo ɔ mi ɔ ma nyɛ ma ha nɛ o si himi nɛ pee kpakpa lo? Mɛni he je nɛ o de jã a?
NI KOMƐ DEƆ KE: “Baiblo ɔ mi si womi ɔmɛ be mi bae.”
Mɛni he je nɛ o susu kaa e sa nɛ mo nitsɛ o kase níhi nɛ maa nɔ mi kaa Baiblo ɔ mi si womi ɔmɛ maa ba mi ɔ he ní ɔ?
NYA MWƆMI
Si womihi fuu ngɛ Baiblo ɔ mi nɛ tsɔɔ kaa wa ma ná bua jɔmi hwɔɔ se. Si womi nɛ ɔmɛ haa nɛ wa náa hɛ kɛ nɔ fɔmi, nɛ wa si himi hu peeɔ kpakpa amlɔ nɛ ɔ.
Mi Nylɔmi
Mɛni he je nɛ nihi hia hɛ kɛ nɔ fɔmi ɔ?
Mɛni Baiblo ɔ de kɛ kɔ hwɔɔ se si himi he?
Kɛ hɛ kɛ nɔ fɔmi nɛ o ma ná kaa níhi maa hi hwɔɔ se ɔ maa ye bua mo amlɔ nɛ ɔ ha kɛɛ?
NÍ KPAHI NƐ MAA YE BUA MO
Moo kase babauu kɛ kɔ bɔ nɛ hɛ kɛ nɔ fɔmi yeɔ bua nihi ha a he.
“Jije Wa Ma Nyɛ Ma Ná Hɛ Kɛ Nɔ Fɔmi Ngɛ?” (O Hɛ Nɛ Tsɛ̃!, April 22, 2004)
Moo hyɛ bɔ nɛ hwɔɔ se si himi he hɛ kɛ nɔ fɔmi ɔ maa ye bua nihi nɛ a nu hiɔ nɛ be tsaba a ha.
“Ke O Nu Hiɔ Nɛ Be Tsaba a, Anɛ Baiblo ɔ Ma Nyɛ Maa Ye Bua Mo Lo?” (Munyu nɛ ɔ ngɛ Intanɛti ɔ nɔ)
Ke o ngɛ video nɛ ɔ hyɛe ɔ, moo po he foni kaa o kɛ o weku ɔ nyɛ ngɛ ngɔɔmi yee ngɛ Paradeiso nɛ Baiblo ɔ wo he si ɔ mi.
Moo kane bɔ nɛ hɛ kɛ nɔ fɔmi nɛ Baiblo ɔ tu he munyu ɔ ye bua nɔ ko nɛ e bɔ mɔde kaa e ma tsake bɔ nɛ níhi yaa nɔ ha ngɛ je ɔ mi ɔ.
“I Nui He Hu Kaa E Sa Nɛ Ma Tsake Je ɔ” (Hwɔɔmi Mɔ ɔ mi munyu)