BAIBLO MI SANE BIMIHI NƐ A HA HETO

Anɛ a ma nyɛ maa ngɔ wa yayamihi kɛ pa wɔ lo?

Baiblo ɔ tsɔɔ kaa adesahi tsuo ɔ, yayami peeli ji mɛ. Adam nɛ ji kekleekle nɔmlɔ nɛ a bɔ ɔ lɛ ngɔ yayami kɛ sã wɔ. Enɛ ɔ he ɔ, be komɛ ɔ, wa peeɔ ní yayahi nɛ pee se ɔ, wa piaa wa he. Mawu Bi nɛ ji Yesu Kristo ɔ gbo kɛ wo wa yayamihi a he hiɔ. E kpɔmi afɔle sami ɔ heje ɔ, a ma nyɛ maa ngɔ wa yayamihi kɛ pa wɔ. E ji nike ní nɛ je Mawu ngɔ.—Kane Romabi 3:23, 24.

Ni komɛ pee yayamihi nɛ ngɛ hɛdɔ, nɛ a susu kaa Mawu kɛ be mɛ pae. Bua jɔmi sane ji kaa Mawu Munyu ɔ deɔ ke: “E Bi Yesu Kristo muɔ ɔ maa tsukɔ wa he, nɛ e ma je wa he yayami ɔmɛ tsuo.” (1 Yohane 1:7) Ke wa pee yayamihi nɛ hɛdɔ ngɛ a he, nɛ wa pia wa he kɛ je wa tsui mi ɔ, Yehowa kɛ maa pa wɔ.—Kane Yesaya 1:18.

Mɛni e sa kaa waa pee konɛ a ngɔ wa yayami kɛ pa wɔ?

Ke wa suɔ nɛ Yehowa Mawu nɛ ngɔ wa yayami kɛ pa wɔ ɔ, e sa nɛ waa kase e he ní, nɛ waa le e blɔ ɔmɛ, nɛ waa bu e ga womi tue, nɛ waa ye e mlaahi a nɔ. (Yohane 17:3) Yehowa jeɔ mi mi himi mi nɛ e kɛ nihi nɛ a tsake a tsui ɔ a yayami paa mɛ.—Kane Bɔfo Ɔmɛ A Nítsumi 3:19.

Wa ma nyɛ maa pee níhi nɛ ma ha nɛ Mawu maa kplɛɛ wa nɔ. Yehowa le wa gbɔjɔmi ɔmɛ. E naa nɔ mɔbɔ nɛ e mi mi hi. Anɛ e suɔmi nɛ se pui ɔ wui mo he wami nɛ o kase níhi nɛ o maa pee konɛ o sa e hɛ mi lo?—Kane La 103:13, 14.