BAIBLO MI SANE BIMIHI NƐ A HA HETO

Mɛni ma nyɛ ma ha bua jɔmi maa hi gba si himi mi?

Ga womihi nɛ ngɛ Baiblo ɔ mi nɛ kɔɔ bɔnɛ gba si himi mi he piɛɛli ma nyɛ ma ha nɛ bua jɔmi nɛ hi a gba si himi ɔ mi ɔ hi kɛ pi si, ejakaa e je Yehowa Mawu, Nɔ nɛ to gba si himi sisi ɔ ngɔ. Baiblo ɔ tsɔɔ wɔ suhi nɛ ke wa kase ɔ, bua jɔmi maa hi wa gba si himi ɔ mi, kɛ suhi nɛ ke wa jeɔ kpo ɔ, wa gba si himi ɔ ma puɛ. Jehanɛ se hu ɔ, Baiblo ɔ tsɔɔ wɔ bɔnɛ ke waa kɛ wa hunomɛ kɛ wa yihi sɛɛɔ ní ha a, bua jɔmi maa hi wa gba si himi ɔ mi.​—Kane Kolosebi 3:8-10, 12-14.

E sa nɛ gba si himi mi he piɛɛli nɛ a bu a sibi. Ke a ti nɔ tsuaa nɔ tsu e blɔ nya nítsumi nɛ Mawu kɛ ha lɛ ɔ he ní ngɛ gba si himi ɔ mi ɔ, a ma nyɛ ma ná bua jɔmi.—Kane Kolosebi 3:18, 19.

Mɛni haa nɛ gba si himi yeɔ manye?

Ke gba si himi mi he piɛɛli suɔ a he ɔ, a ma nyɛ maa hi si daa. Mawu tsɔɔ wɔ bɔnɛ e sa kaa wa suɔ wa he ha. E kɛ e Bi Yesu pee suɔmi he nɔ hyɛmi nɔ́ nɛ hi kɛ pi si ha wɔ.​—Kane 1 Yohane 4:7, 8, 19.

Ke hunomɛ kɛ yigbayihi buɔ gba si himi kaa e ji blɔ nya tomi nɛ je Mawu ngɔ ɔ, a gba si himi ɔ maa ye manye. Mawu to gba si himi he blɔ nya konɛ nyumu kɛ yo nɛ a hi si daa bɔnɛ pee nɛ wekuhi nɛ a hi si slɔkee. Gba si himi ma nyɛ maa ye manye, ejakaa Mawu bɔ nyumu kɛ yo kaa a ye kɛ bua a sibi ngɛ helo nya, nɛ a je suɔmi kpo kɛ ha a sibi. Jehanɛ se ɔ, Mawu bɔ nyumu kɛ yo ngɛ e subai nɔ, lɔɔ he ɔ, gba si himi mi he piɛɛli ngɛ nyɛmi nɛ a kɛ maa kase Yehowa suɔmi ɔ.​—Kane 1 Mose 1:27; 2:18, 24.