BAIBLO MI SANE BIMIHI NƐ A HA HETO

Anɛ yi mi tomi ko he je nɛ a bɔ zugba a lo?

A bɔ zugba a konɛ e nyɛ nɛ e baa wami yi. Nyu babauu ngɛ nɔ́ nɛ ma nyɛ maa baa wami yi. Bɔ nɛ zugba a plɛɔ e he nɛ e bɔleɔ pu ɔ ha a hi wawɛɛ. Kaa zugba a pee we jã a, jinɛ e nɔ maa jɔ tsɔ, nɛ pahi kɛ wo ɔ tsuo maa pee aisi, aloo e nɔ maa dɔla tsɔ, nɛ pahi kɛ wo ɔ tsuo maa si. Kɔɔhiɔ nɛ bɔle zugba a, kɛ he wami nɛ jeɔ zugba a sisi kɛ yaa hiɔwe ɔ, poɔ wa he piɛ kɛ jeɔ níhi nɛ ma nyɛ maa ye wɔ awi ɔ a he. Jehanɛ se hu ɔ, bɔ nɛ lohwehi náa tsohi a he se, nɛ tsohi hu náa lohwehi a he se ha a, ngɛ nyakpɛ nitsɛnitsɛ. Ní nɛ ɔmɛ a he je ɔ, nihi fuu ma nya si kaa a bɔ zugba a ngɛ yi mi tomi ko he je.​—Kane Yesaya 45:18.

Se eko ɔ, o ma bi ke, ‘Anɛ nɔ́ nami kɛ ní yayami peemi hu piɛɛ yi mi tomi nɛ a kɛ bɔ zugba a he lo?’​—Kane 5 Mose 32:4, 5.

Anɛ yi mi tomi nɛ a kɛ bɔ zugba a maa ba mi lo?

A bɔ zugba a konɛ nihi nɛ a ngɛ bumi kɛ ha a sibi, nɛ a suɔ a Bɔlɔ ɔ, nɛ a hi nɔ kɛ bua jɔmi. Enɛ ɔ tsɔɔ kaa adesahi a nɔ kuɔ kulaa pe tsohi kɛ lohwehi. Wa ma nyɛ maa kase wa Bɔlɔ ɔ he ní konɛ waa le lɛ. Wa ma nyɛ maa kase e su komɛ kaa suɔmi kɛ dami sane yemi hulɔ.​—Kane Fiɛlɔ 12:13; Mika 6:8.

Wa Bɔlɔ ɔ ma nyɛ ma tsu e yi mi tomihi tsuo a he ní. Enɛ ɔ he ɔ, wa ngɛ nɔ mi mami kaa e maa po nɔ́ nami se. E ma ha nɛ adesahi maa ye dami sane, nɛ e ma dla zugba a saminya kɛ ha wɔ konɛ waa kɛ bua jɔmi nɛ hi nɔ.​—Kane La 37:11, 29; Yesaya 55:11.