HƐ MI MUNYU | ANƐ MAWU SUSUƆ O HE LO?
Mawu Nuɔ Mo Sisi
‘Yehowa, o hyɛ ye mi tsuo, nɛ o le bɔ nɛ i ngɛ.’—LA 139:1.
‘Benɛ a ná we nɛ a fɔ mi lolo po ɔ, o le mi.’—LA 139:16
NƆ́ HE JE NƐ NI KOMƐ HE WE YI: Nihi fuu susuɔ kaa Mawu naa adesahi kaa a ji yayami peeli nɛ a sɛ, nɛ a he be se nami ko. Enɛ ɔ he ɔ, a susu kaa Mawu susuu we a he. Kendra, nɛ e hao wawɛɛ ɔ yi mi kojoɔ lɛ, ejakaa e nyɛ we nɛ e pee níhi nɛ Mawu ngɛ hlae ngɛ e dɛ ɔ pɛpɛɛpɛ. Enɛ ɔ he ɔ, Kendra de ke: “I kpa sɔlemi.”
NƆ́ NƐ BAIBLO Ɔ TSƆƆ: Yehowa hyɛ we mluku nɛ o yi ɔ kulaa. E nu mo sisi wawɛɛ. Baiblo ɔ de ke: “E le wa bɔ su; e le kaa zu kɛkɛ ji wɔ.” Jehanɛ se hu ɔ, ‘e wui wa he yayami ɔmɛ a he hiɔ bɔ nɛ sa wɔ.’ Mohu ɔ, ke wa pee yayami ko, nɛ wa pia wa he ɔ, e naa wɔ mɔbɔ, nɛ e kɛ wa he yayami ɔ paa wɔ.—La 103:10, 14.
Mo susu Matsɛ David nɛ wa tu e he munyu ngɛ munyu nɛ sɛ hlami ɔ mi ɔ he nɛ o hyɛ. David sɔle ha Mawu ke: ‘Benɛ a na we nɛ a fɔ mi lolo po ɔ, a ngma ye wami be ɔ tsuo ngɛ o womi ɔ mi momo. Mawu, hyɛ ye tsui mi nɛ o le mi.’ (La 139:16, 23) Niinɛ, e ngɛ mi kaa David tɔ̃ tɔmihi nɛ ngɛ hɛdɔ mohu lɛɛ, se e ngɛ nɔ mi mami kaa akɛnɛ e tsake e tsui he je ɔ, Yehowa kɛ pa lɛ.
Yehowa nu mo sisi pe bɔ nɛ adesa ko maa nu mo sisi. Baiblo ɔ de ke: ‘Nɔmlɔ lɛɛ nɔ hɛ mi e hyɛɛ; se imi Yehowa lɛɛ tsui mi i hyɛɛ.’ (1 Samuel 16:7) Mawu le nɔ́ he je nɛ o peeɔ o ní ngɛ blɔ ko nɔ ɔ. E le kaa su komɛ ngɛ nɛ a kɛ fɔ mo, nɛ ekomɛ hu ngɛ nɛ o ná ngɛ he nɛ a tsɔse mo ngɛ ɔ. E ngɛ mi kaa be komɛ ɔ, o tɔ̃ɔ mohu lɛɛ, se ke o ngɛ mɔde bɔe kaa o maa pee nɔ́ nɛ da a, Yehowa le.
Ke Yehowa le ‘nɔmlɔ tutuutu nɛ o ji’ ɔ, lɛɛ mɛni blɔ nɔ e guɔ kɛ woɔ o bua mɔ?