Anɛ E Hi Kaa Kristofohi Yeɔ Bloonya Lo?

Nimli ayɔhi abɔ nɛ a ngɛ je ɔ mi tsuo ɔ heɔ yeɔ kaa Bloonya ji gbijlɔ nɛ a kɛ kaiɔ Yesu Kristo fɔmi ligbi. Se anɛ o susu he hyɛ ke ji kekleekle jeha lafa a mi Kristofo ɔmɛ ye Bloonya lo? Nɛ o le nɔ́ nɛ Baiblo de ngɛ fɔmi ligbi yemi he lo? Sane bimi nɛ ɔmɛ a heto maa ye bua wɔ nɛ wa maa le ke ji e sa kaa Kristofohi nɛ a ye Bloonya.

Kekleekle ɔ, Baiblo ɔ de we ke Yesu aloo Mawu sɔmɔli anɔkualetsɛmɛ nɛ a hi si ɔ ye a fɔmi ligbi. Ni enyɔ komɛ nɛ a ye a fɔmi ligbi ɔ he munyu pɛ nɛ Baiblo ɔ tu. Mɛ tsuo a ja we Yehowa nɛ ji Mawu nɛ ha nɛ a ngma Baiblo ɔ, nɛ ní yayamihi ya nɔ ngɛ a fɔmi ligbi yemi ɔ sisi. (1 Mose 40:20; Marko 6:21) Womi nɛ ji Encyclopædia Britannica tsɔɔ kaa, kekleekle jeha lafa a mi Kristofo ɔmɛ kua “wɔ jami kusumi nɛ ji fɔmi ligbi yemi.”

Baiblo ɔ tsɔɔ we be tutuutu nɛ a fɔ Yesu. Womi nɛ ji McClintock and Strong’s Cyclopedia a de ke: “O be ligbi nɛ a fɔ Yesu ɔ nae ngɛ Somi He ɔ mi, aloo ngɛ womi kpa ko mi.” Ngɛ anɔkuale mi ɔ, kaa Kristo suɔ nɛ e kaseli ɔmɛ nɛ a ye e fɔmi ligbi ɔ, jinɛ eko tsɔɔ mɛ be nɛ a fɔ lɛ.

Nɔ́ nɛ ji enyɔ ɔ, Baiblo ɔ tsɔɔ we kaa Yesu aloo e kaseli ɔmɛ a ti nɔ ko ye Bloonya. Womi nɛ ji New Catholic Encyclopedia a de ke: “Roma bi a kalenda ko nɛ biɛ ji Chronograph, nɛ nyumu ko nɛ a tsɛɛ lɛ ke Philocalus pee ngɛ jeha 336 mi” ɔ nɔ ji he nɛ a wo Bloonya yemi ta ngɛ kekleekle. E ngɛ heii kaa jamɛ a be ɔ mi ɔ, a ngma Baiblo ɔ tsuo ta, nɛ Yesu hu ho hiɔwe ya jeha lafahi abɔ. Lɔ ɔ he ɔ, McClintock kɛ Strong de ngɛ womi nɛ a ngmaa mi ke, “pi Mawu nɛ e to Bloonya yemi sisi, nɛ e be Somi He ɔ hu mi.”a

Yesu nɛ e ji Tsɔɔlɔ Ngua a kɛ blɔ tsɔɔmihi nɛ a ngɛ tɛɛ ha e kaseli ɔmɛ ngɛ Baiblo ɔ mi ngɛ nɔ́ nɛ e ngɛ hlae kaa a pee ɔ he. Se Bloonya yemi piɛɛ we blɔ tsɔɔmi nɛ ɔmɛ a he. Kaa bɔ nɛ tsɔɔlɔ ko sume nɛ e sukuu bimɛ nɛ a je e blɔ tsɔɔmi se nɛ a ya pee nɔ́ kpa a, jã nɔuu nɛ Yesu hu sume kaa e kaseli ɔmɛ nɛ a “je nɔ́ nɛ a ngma a se ya pee nɔ́ ko” nɛ be Ngmami Klɔuklɔu ɔ mi.​—1 Korinto Bi 4:6.

Gbijlɔ kake ko nɛ e he hia wawɛɛ nɛ kekleekle Kristofo ɔmɛ ye. Lɔ ɔ ji Yesu Gbenɔ ɔ Kaimi ɔ. Yesu nitsɛ tsɔɔ e kaseli ɔmɛ be kɛ bɔ nɛ e sa kaa a ye gbijlɔ nɛ ɔ ha. A ngma blɔ tsɔɔmi nɛ ɔ, kɛ be tutuutu nɛ e sa kaa a kai e gbenɔ ɔ ngɛ Baiblo ɔ mi.​—Luka 22:19; 1 Korinto Bi 11:25.

Kaa bɔ nɛ wa na kɛ se hlami ɔ, Bloonya ji fɔmi ligbi yemi, nɛ kekleekle Kristofohi nyɛɛ we wɔ jami kusumi nɛ ɔ se. Kɛ piɛɛ he ɔ, a wui ta ngɛ Baiblo ɔ mi he ko kaa Kristo aloo nɔ ko ye Bloonya. Enɛ ɔ he ɔ, Kristofohi ayɔhi abɔ nɛ a ngɛ je ɔ mi mwɔnɛ ɔ ma a juɛmi nya si kaa a be Bloonya yee.