Moo Ngɔ jw.org Kɛ Tsu Ní Ngɛ Fiɛɛmi Mi

Wa Intanɛti ní tsumi he ɔ ma nyɛ maa ye bua wɔ nɛ waa fiɛɛ sane kpakpa a ‘kɛ ya su je ɔ nyagbe he tɔɔ.’ (Níts. 1:8) Nihi fuu li kaa he ko ngɛ nɛ a tsɛɛ ke jw.org. Ja fiɛɛlɔ ko tsɔɔ mɛ loko a leɔ.

Kpɔ mi nɔ hyɛlɔ ko gbla video nɛ ji Mɛni He Je Nɛ E Sa Kaa Waa Kase Baiblo ɔ? ngɛ jw.org nɔ kɛ fɔ e mobile phone nɔ, nɛ e jeɔ kɛ tsɔɔ nihi be tsuaa be nɛ e ma ná he blɔ. Kaa nɔ hyɛmi nɔ́ ɔ, ke e ya wehi a mi fiɛɛmi ɔ, e deɔ wetsɛ ɔ ke: “I ba slaa mo konɛ ma ye bua mo nɛ o ná sane bimi etɛ komɛ a heto. Sane bimi ɔmɛ ji: Mɛni he je nɛ je ɔ mi hyi tɔ kɛ haomihi ɔ? Mɛni blɔ nɔ nɛ Mawu maa gu kɛ tsu a he ní? Mɛni blɔ nɔ nɛ wa maa gu kɛ da haomi ɔmɛ a nya amlɔ nɛ ɔ? Video kpiti nɛ ɔ ha sane bimi nɛ ɔmɛ a heto.” E bi we wetsɛ ɔ ke ji e maa suɔ kaa e maa hyɛ video ɔ, mohu ɔ, e jeɔ kɛ tsɔɔ lɛ tɛɛ nɛ e hyɛɛ bɔ nɛ wetsɛ ɔ maa pee e ní ha ngɛ video ɔ he. Akɛnɛ video ɔ ngɛ bua jɔmi he je ɔ, nihi fuu hyɛɛ. Lɔ ɔ se ɔ, kpɔ mi nɔ hyɛlɔ ɔ deɔ nɔ ɔ ke: “Kaa bɔ nɛ o nu nɛ a de ɔ, o ma nyɛ ma bi ngɛ Intanɛti ɔ nɔ nɛ a kɛ mo ba kase Baiblo ɔ. Se nɛ i ngɛ hiɛ ɔ, ma nyɛ ma tsɔɔ mo bɔ nɛ a peeɔ lɛ ha a kpiti.” Ke wetsɛ ɔ kplɛɛ ɔ, e kɛ Sane Kpakpa womiyo ɔ peeɔ bɔ nɛ waa kɛ nihi kaseɔ Baiblo ɔ ha a he nɔ hyɛmi nɔ́ kɛ tsɔɔ lɛ. Ke wetsɛ ɔ be deka a, e kɛ lɛ toɔ blɔ nya nɛ e ya slaa lɛ be kpa. Ke e kpa fiɛɛmi nɛ e ya ngɛ e he mi jɔɔe ngɛ ní yemi he ko, nɛ nɔ ko ba hi e kasa nya a, e kɛ nɔ ɔ jeɔ ní sɛɛmi sisi jã a nɔuu. Anɛ o kɛ jw.org ngɛ ní tsue ngɛ o fiɛɛmi ní tsumi ɔ mi lo?