Wa Internet Nítsumi He ɔ—A Pee Konɛ Waa Kɛ Ni Kpahi Nɛ Ná He Se

Yesu fa wɔ ke waa fiɛɛ sane kpakpa nɛ kɔɔ Matsɛ Yemi ɔ he ɔ “kɛ kpa je ɔ mi tsuo, bɔnɛ pee nɛ je ma amɛ tsuo nɛ a nu.” (Mat. 24:14) Bɔnɛ pee nɛ wa nyɛ nɛ waa ‘gbe wa sɔmɔmi ɔ nya kulaa’ a, a bla watchtower.org, jw-media.org, kɛ jw.org ɔ tsuo nɛ a pee lɛ ehe nɛ ji, jw.org.—2 Tim. 4:5.

“Je ɔ Mi Tsuo”: Ke a gba nimli ngɛ zugba a nɔ ɔ mi etɛ ɔ, e mi kake kɛ Internet ɔ tsuɔ ní. E ji he titli nɛ nihi fuu naa munyuhi nɛ a ngɛ hlae ngɛ, nɛ nihewi kɛ yihewi lɛ a kɛ tsuɔ ní wawɛɛ. Wa Internet nítsumi he ɔ haa nihi nɛ a guɔ Internet ɔ nɔ kɛ biɔ Baiblo mi sanehi ɔ hetohi nɛ da. E haa nɛ a ba leɔ Yehowa asafo ɔ, nɛ e yi ha mɛ kaa a ma bi nɛ a kɛ mɛ nɛ kase Baiblo ɔ. Enɛ ɔ haa nɛ sane kpakpa a suu hehi nɛ nihi na we he blɔ nɛ a maa nu Matsɛ Yemi ɔ he sɛ gbi ɔ ngɛ ɔ.

“Je Ma Amɛ Tsuo”: E sa nɛ waa fiɛɛ Baiblo mi anɔkuale ɔ ngɛ gbi slɔɔtohi a mi bɔnɛ pee nɛ “je ma amɛ tsuo” nɛ a nu. Nihi nɛ a yaa jw.org ngɛ Internet ɔ nɔ ɔ maa na munyuhi ngɛ gbi maa pee 400 mi ngɛ blɔ nɛ e he wɛ nɔ pe Internet nítsumi he kpa ko.

Kɛ Tsu Ní Saminya: Pi fiɛɛmi kɛ ha nihi nɛ a pi odasefoli pɛ ji yi mi tomi heje nɛ a pee jw.org Internet nítsumi he ehe nɛ ɔ ngɛ. A pee konɛ Yehowa Odasefoli hu nɛ a kɛ tsu ní. Ke o ngɛ Internet ɔ eko ɔ, wa ngɛ mo he wami woe nɛ o kase bɔnɛ a kɛ jw.org ɔ tsuɔ ní ha. Bɔnɛ a kɛ ma tsu ní ha a he blɔ tsɔɔmi komɛ lɛ ngɛ sisi ɔ nɛ.

[Munyu mi tsɔɔmi daka ngɛ bafa 3]

(Ke o ngɛ bɔnɛ a to nya ha a hlae ɔ, hyɛ womi ɔ nitsɛ mi)

Kaa Nɛ O Hyɛ

1 Moo ngma www.jw.org ngɛ he nɛ a ngmaa Internet adrɛs ngɛ ɔ ngɛ o computer a nɔ.

2 Moo nyɛ munyuyi ɔmɛ, níhi nɛ ngɛ, kɛ he nɛ ke o nyɛ ɔ, e kɛ mo maa ya he kpahi ɔ nɔ.

3 Hyɛ kaa o ma nyɛ maa ngɔ o mobile phone loo klama kpa ko nɛ o ma nyɛ kɛ maa ya Internet ɔ nɔ ɔ kɛ bli jw.org ɔ lo. A to he blɔ nya bɔnɛ e kɛ klama tsɔwihi nɛ a kɛ yaa Internet ɔ nɔ ɔ a hɛ mi ma kɔ, se munyu ɔ lɛɛ jã nɔuu.