Wa Bɔlɔ Nɛ Ngɛ Suɔmi ɔ Susuɔ Wa He

1. WA BƆLƆ Ɔ HAA NƐ PU TSOƆ HA WƆ

Ke pu be ɔ, kɛ si himi ngɛ zugba a nɔ maa hi ha kɛɛ? Pu ɔ haa tsohi he wami nɛ a tsɛ̃ɔ ba, a woɔ mɔmɔ, nɛ a woɔ tso yiblii kɛ ní kpahi. Jehanɛ se hu ɔ, e yeɔ bua tsohi nɛ a poku ɔ nyɛɔ gblaa nyu kɛ jeɔ zu mi kɛ suɔ e ba amɛ a he nɛ lɔ ɔ se ɔ, nyu ɔ sɛɔ kɔɔhiɔ mi.

Tea ngmɔ nɛ a pee ngɛ yoku ko he nɛ a da kɔɔhiɔ mi kɛ po.

2. WA BƆLƆ Ɔ HAA NƐ HIƆMI NƐƆ

Mawu haa nɛ hiɔmi nɛɔ, nɛ enɛ ɔ haa nɛ zugba a baa ní nɛ wa naa niye ní nɛ wa yeɔ. Mawu haa nɛ hiɔmi nɛɔ ha wɔ kɛ jeɔ hiɔwe, e haa nɛ wa náa niye ní babauu ngɛ be nɛ sa mi, nɛ enɛ ɔ haa nɛ wa bua jɔɔ wawɛɛ.

Lohwe pɛlitsɛ ko nɛ e maa si ngɛ tso kɔni ko nɔ nɛ e ngɛ e kuɛ mi kpae konɛ e mi tso yiblii ko nɛ ma zugba nɔ mi.

3. WA BƆLƆ Ɔ HAA WƆ NIYE NÍ KƐ HEHA NƆ́

Tsɛmɛ fuu haoɔ ngɛ bɔ nɛ a ma plɛ kɛ ná niye ní kɛ tade kɛ ha a weku ɔ he. Ngmami ɔ de ke: “Nyɛɛ to hiɔwe lohwe pɛlitsɛmɛ a he hɛ saminya; a du we ní, nɛ a kpa we ní, nɛ a bua we níhi a nya kɛ wui nito hehi, se kɛ̃ ɔ, nyɛ Tsɛ nɛ e ngɛ hiɔwe ɔ haa mɛ niye ní. Anɛ nyɛ he jua wɛ hluu pi mɛ lo?”—Mateo 6:25, 26.

“Nyɛɛ kase ní kɛ je nga nɔ mɔmɔhi a ngɔ, nyɛɛ hyɛ bɔ nɛ a waa ha . . . ; se i ngɛ nyɛ dee ke ngɛ [Matsɛ] Solomon hɛ mi nyami babauu ɔ tsuo se ɔ, e he dlami sui mɔmɔ nɛ ɔmɛ a kpɛti kake. Ke Mawu dlaa nga nɔ huhi . . . kikɛ nɛ ɔ, lɛɛ anɛ e be nyɛ heha nɔ́ hae po pe jã lo?”—Mateo 6:28-30.

Akɛnɛ Mawu nyɛɔ haa wɔ niye ní, kɛ heha nɔ́ he je ɔ, e ngɛ heii kaa e ma nyɛ ma ha wɔ ní kpahi nɛ wa hia ngɛ wa si himi mi ɔ. Ke wa suɔ kaa wa maa pee Mawu suɔmi nya ní ɔ, e ma nyɛ maa ye bua wɔ nɛ ke wa pee ngmɔ ɔ wa ma ná niye ní kɛ je mi, aloo e ma nyɛ maa ye bua wɔ nɛ́ waa na ní tsumi konɛ wa ná nɔ́ ko kɛ je mi nɛ wa kɛ he níhi nɛ hia wɔ ɔ.—Mateo 6:32, 33.

Ke wa susu pu ɔ, hiɔmi nɛ nɛɔ, lohwe pɛlitsɛmɛ kɛ mɔmɔhi a he ɔ, e ma ha nɛ́ waa na kaa wa ngɛ ní kpakpahi nɛ wa maa da nɔ kɛ suɔ Mawu. Munyu nɛ nyɛɛ se ɔ maa ye bua wɔ konɛ waa na blɔ nɔ nɛ wa Bɔlɔ ɔ gu nɛ e kɛ adesahi tu munyu.