Sane Bimihi Nɛ Je Ní Kaneli A Ngɔ
Baiblo ɔ de ngɛ 3 Mose 19:16 ke, “koo ye lakpa odase kɛ si o nyɛmi, nɛ́ a pue e muɔ si yaka gu.” Mɛni nɛ munyu nɛ ɔ tsɔɔ, nɛ mɛni wa ma nyɛ maa kase kɛ je mi?
Yehowa de Israel bi ɔmɛ kaa a pee klɔuklɔu. Bɔ nɛ pee nɛ a nyɛ nɛ a pee klɔuklɔu ɔ, e de ke: ‘Koo pee o he sieku yelɔ kɛ hi yae kɛ hi bae ngɛ o ma mi bi ɔmɛ a kpɛti. Koo ye lakpa odase kɛ si o nyɛmi, nɛ́ a pue e muɔ si yaka gu. Imi ji Yehowa.’—3 Mose 19:2, 16.
A ma nyɛ maa tsɔɔ Hebri munyu nɛ a tsɔɔ sisi ke “koo ye lakpa odase kɛ si o nyɛmi, nɛ́ a pue e muɔ si yaka gu” ɔ sisi hu ke “koo ngɔ o nyɛmi wami kɛ wo oslaa mi.” Ke a ke “koo ngɔ o nyɛmi wami kɛ wo oslaa mi” ɔ, mɛni e tsɔɔ? Yuda bi a womi ko nɛ e tu Mose Womi Nɛ Ji Etɛ ɔ he munyu ɔ de ke: “Kuku nɛ ɔ fã nɛ ɔ sisi tsɔɔmi be gbɔjɔɔ, ejakaa wa li nɔ́ nɛ Hebri aguase mi gbi nɛ a kɛ tsu ní ɔ tsɔɔ.”
Ní leli komɛ tsɔɔ kaa tsakpa ko ngɛ munyu nɛ ɔ kɛ kuku 15 ɔ a kpɛti. Lejɛ ɔ de ke: “Nyɛɛ ye dami sane ngɛ kojomi mi; nyɛ ko hyɛ nɔ ko hɛ mi, ohiatsɛ ji lɛ jio, niatsɛ ji lɛ jio.” (3 Mose 19:15) Lɛɛ ke jã a, fami nɛ ngɛ kuku 16 nɛ e ke koo ngɔ o nyɛmi wami kɛ wo oslaa mi ɔ ma nyɛ maa tsɔɔ kaa e sa nɛ Israel bi ɔmɛ nɛ a ye dami sane ngɛ kojomi mi, ngɛ ní tsumi sanehi a mi, loo ngɛ weku ɔ mi hulɔ. Nɛ e sɛ nɛ Israel nɔ ko nɛ e fo lɛ pɛ e nɔ́ mi nɛ e sisi nɔ ko. Ngɛ anɔkuale mi ɔ, e sɛ nɛ waa pee níhi kaa jã. Se wa ma nyɛ maa nu munyu nɛ ngɛ kuku 16 sisi ngɛ blɔ kpa ko nɔ.
Mo susu nɔ́ nɛ Baiblo ɔ de ngɛ kuku 16 sisije ɔ ngɛ New World Translation Baiblo ɔ mi ɔ he nɛ o hyɛ. Mawu fã e we bi kaa a ko pee a he nɔ he guɛ gbeli kɛ hi yae kɛ hi bae. E ji anɔkuale kaa ke nɔ ko ye nɔ ko he sieku ɔ, lɔ ɔ hu ma nyɛ maa ngɔ nyagba kɛ ba. Se ke nɔ ko gbe nɔ ko he guɛ ɔ, nyagba nɛ e kɛ baa a nya wa wawɛɛ pe nyagba nɛ sieku yemi kɛ baa a. (Abɛ 10:19; Fiɛlɔ 10:12-14; 1 Tim. 5:11-15; Yak. 3:6) Behi fuu ɔ, nɔ he guɛ gbelɔ jeɔ blɔ deɔ ní komɛ nɛ pi anɔkuale kɛ kɔɔ nɔ kpa he. Nɔ he guɛ gbelɔ ma nyɛ maa ye lakpa odase kɛ si nɔ ko, ke lɔ ɔ ma ha nɛ a gbe nɔ ɔ po. Mo kai kaa nɔ he guɛ gbeli ye lakpa odase kɛ si Nabot, nɛ lɔ ɔ ha nɛ a fiaa Nabot tɛ nɛ e gbo. (1 Ma. 21:8-13) Enɛ ɔ he ɔ, kaa bɔ nɛ a de ngɛ 3 Mose 19:16 nyagbe ɔ, nɔ he guɛ gbelɔ ma nyɛ maa ngɔ e nyɛmi wami kɛ wo oslaa mi.
Jehanɛ hu ɔ, ke nɔ ko nyɛɔ nɔ ko ɔ, e ma nyɛ ma ha nɛ e gbe nɔ ɔ he guɛ. Baiblo ɔ de ngɛ 1 Yohane 3:15 ɔ ke: “Nɔ fɛɛ nɔ nɛ e nyɛɔ e nyɛmi ɔ, e ji nɔmlɔ gbelɔ, nɛ nyɛ le kaa nɔmlɔ gbelɔ ko nɔmlɔ gbelɔ ko be neneene wami ngɛ e mi.” Benɛ Mawu de ngɛ kuku 16 ke: “Koo ye lakpa odase kɛ si o nyɛmi nɛ́ a pue e muɔ si yaka gu” ɔ, e tsa nɔ nɛ e de ngɛ kuku nɛ nyɛɛ se ɔ mi ke: “Koo nyɛ o nyɛmi ngɛ o tsui mi.”—3 Mose 19:17.
Enɛ ɔ he ɔ, munyu nɛ ngɛ 3 Mose 19:16 ji kɔkɔ bɔmi nɛ hɛdɔ ngɛ he kɛ ha Kristofohi. E sa nɛ wa kua susumihi nɛ dɛ konɛ wa ko gbe nɔ ko he guɛ kɔkɔɔkɔ. Ke wa pee nɔ́ ko nɛ maa ‘ngɔ wa nyɛmi wami kɛ wo oslaa mi,’ aloo wa gbe nɔ ko he guɛ akɛnɛ wa sume e sane aloo wa hɛ kɔ̃ɔ e nɔ he je ɔ, e ma nyɛ maa pee odase nɛɛ tsɔɔ kaa wa nyɛ nɔ ɔ. E sɛ nɛ Kristofohi nɛ a nyɛ nɔ ko kɔkɔɔkɔ.—Mat. 12:36, 37.