Anɛ O Ngɛ Hemi Kɛ Yemi Lo?

Ja wa ngɛ hemi kɛ yemi loko wa ma nyɛ maa sa Yehowa hɛ mi. Se kɛ̃ ɔ, Baiblo ɔ tsɔɔ kaa “pi nihi tsuo nɛ a ngɛ hemi kɛ yemi.” (2 Tɛs. 3:2) Munyu nɛ ɔ nɛ bɔfo Paulo tu ɔ kɔɔ “awi yeli kɛ nimli yayamihi” nɛ a ngɛ lɛ yi mi wae ɔ a he. Se nɔ́ nɛ e de ɔ kɔɔ ni kpahi a he hulɔ. Ni komɛ sume kaa a maa kplɛɛ odasehi nɛ tsɔɔ heii kaa Mawu lɛ bɔ níhi tsuo ɔ nɔ. (Rom. 1:20) Eko ɔ, ni komɛ hu ma de kaa a ngɛ hemi kɛ yemi ngɛ nɔ́ ko loo he wami ko nɛ e nɔ kuɔ ɔ mi. Se jamɛ a hemi kɛ yemi ɔ be nyɛe ma ha nɛ a sa Yehowa hɛ mi.

E sa nɛ wa ná nɔ mi mami kaa Yehowa ngɛ, nɛ e jɔɔ nihi nɛ a ngɛ hemi kɛ yemi nɛ mi wa ngɛ e mi ɔ. (Heb. 11:6) Hemi kɛ yemi piɛɛ Mawu mumi ɔ yiblii ɔ he. Ke wa sɔle kɛ ha Yehowa a, wa ma nyɛ ma ná e mumi klɔuklɔu ɔ. (Luka 11:​9, 10, 13) Nɔ́ titli nɛ maa ye bua wɔ konɛ wa nine nɛ su mumi klɔuklɔu ɔ nɔ ji kaa wa maa kane Mawu Munyu ɔ nɛ a je mumi mi kɛ ngma a. Lɔ ɔ se ɔ, wa ma nyɛ ma pue wa yi mi tɛ ngɛ nɔ́ nɛ wa kane ɔ he nɛ wa kɛ tsu ní. Yehowa mumi ɔ ma nyɛ ma ná wa si himi mi nɔ he wami, nɛ e maa ye bua wɔ konɛ wa ná hemi kɛ yemi nɛ mi wa nɛ ma ha nɛ waa sa e hɛ mi.