Sane Bimihi Nɛ Je Ní Kaneli A Ngɔ
Mɛni “susumi” nɛ e be kɛe nɛ Yehowa kɛ maa wo je ma amɛ a tsui mi?
Kpo Jemi 17:16, 17 ɔ tsɔɔ nɔ́ ko nɛ maa ya nɔ nɛ ma kadi amanehlu ngua a sisije. Lejɛ ɔ de ke: “Nɛ koli nyɔngma amɛ nɛ o na a kɛ lohwe awi yelɔ ɔ maa nyɛ yaholɔ ɔ, nɛ a ma kpɔ̃ nɔ́ fɛɛ nɔ́ ngɛ e dɛ, nɛ e maa hɛɛ e he gu, nɛ a maa ye e he lo ɔ, nɛ a kɛ la maa sã lɛ kulaa. Ejakaa Mawu ngɔ kɛ wo a tsui mi kaa a tsu e susumi ɔ he ní, ee, kaa a tsu a susumi kake ɔ he ní kɛ gu a matsɛ yemi ɔ nɛ a kɛ ma ha lohwe awi yelɔ ɔ nɔ.” Be ko nɛ be ɔ, wa womi ɔmɛ tsɔɔ nya kaa “susumi” nɛ Yehowa kɛ maa wo je ma amɛ a tsui mi ɔ ji, nɛ a kpata lakpa jami hɛ mi.
Se e he ba hia nɛ waa pee tsakemi ngɛ sisi numi nɛ ɔ he. “Susumi” nɛ Yehowa kɛ maa wo je ma amɛ a tsui mi ɔ ji kaa, a maa ‘ngɔ a matsɛ yemi ɔ kɛ ha lohwe awi yelɔ ɔ.’ Sane bimihi nɛ nyɛɛ se nɛ ɔmɛ maa ye bua wɔ konɛ waa nu bɔ nɛ gbami nɛ ɔ ma plɛ kɛ ba mi ha a sisi saminya.
Mɛnɔmɛ a he munyu titli nɛ gbami ɔ tu? A tsɛ “Yaholɔ” ɔ hu ke “Babilon Ngua a”; nɛ e daa si kɛ ha je ɔ mi lakpa jami blɔ nya tomi ɔ. “Lohwe awi yelɔ tsutsuutsu” ɔ daa si ha League of Nations ɔ. A to kuu nɛ ɔ sisi ngɛ jeha 1919 ɔ mi konɛ a kɛ ha nɛ tue mi jɔmi nɛ hi je ɔ mi. Amlɔ nɛ ɔ, a tsɛɛ lɛ ke Je Ma Amɛ A Kake Peemi Kuu. [United Nations] (Kpoj. 17:3-5) “Koli nyɔngma amɛ” daa si kɛ ha nɔ yemihi tsuo nɛ a ngɛ he wami nɛ a fĩ lohwe awi yelɔ ɔ se ɔ.
Mɛni tsakpa lɛ ngɛ yaholɔ ɔ kɛ lohwe awi yelɔ tsutsuutsu ɔ a kpɛti? Yaholɔ ɔ “hii si ngɛ” lohwe awi yelɔ ɔ nɔ, nɛ tsɔɔ kaa e fĩ e se nɛ e suɔ kaa e maa ye e nɔ.
Mɛni maa ba yaholɔ ɔ nɔ? Lohwe awi yelɔ ɔ kɛ koli nyɔngma amɛ nɛ a fĩ e se ɔ “maa nyɛ yaholɔ ɔ.” Enɛ ɔ ma ha nɛ a kpɔ̃ nɔ́ fɛɛ nɔ́ nɛ e ngɛ ɔ ngɛ e dɛ, nɛ́ a ha nɛ nihi tsuo nɛ a na e yiwutso ní peepee ɔ. Nɛ a ma kpata e hɛ mi kaa bɔ nɛ Yehowa de ɔ pɛpɛɛpɛ. (Kpoj. 17:1; 18:8) Enɛ ɔ maa pee lakpa jamihi tsuo a nyagbe. Se kɛ̃ ɔ, loko enɛ ɔ maa ba mi ɔ, Yehowa ma ha nɛ je ma amɛ nɛ a pee nɔ́ ko nɛ eko bɛ hyɛ ngɛ adesa nɔ yemi mi.
Mɛni Yehowa ma ha nɛ je ma amɛ nɛ a pee? Yehowa maa ngɔ “e susumi” kɛ wo koli nyɔngma amɛ a tsui mi, nɛ ji kaa a maa “ngɔ a he wami ɔ kɛ a blɔ nya a kɛ ha lohwe awi yelɔ [tsutsuutsu] ɔ,” nɛ ji Je Ma Amɛ A Kake Peemi Kuu ɔ. (Kpoj. 17:13) Mɛni enɛ ɔ tsɔɔ? Anɛ adesa nɔ yemi ɔmɛ nitsɛ lɛ a maa mwɔ a yi mi kpɔ kaa a maa ngɔ a he wami kɛ a blɔ nya a kɛ ha lohwe awi yelɔ ɔ lo? Dɛbi! Gbami ɔ tsɔɔ kaa Mawu nitsɛ lɛ ma ha nɛ a pee jã. (Abɛ 21:1; kɛ to Yesaya 44:28 ɔ he.) Anɛ tsakemi nɛ ɔ maa ya nɔ bɔɔbɔɔbɔɔ lo? Dɛbi! E maa ba mi tlukaa. Kɛkɛ ɔ, lohwe awi yelɔ ɔ ma kpata lakpa jamihi tsuo a hɛ mi si kake nyɔngloo.
Mɛni e sa nɛ waa hyɛ blɔ? Wa hyɛ we blɔ kaa wa maa nu amaniɛ bɔmihi nɛ tsɔɔ kaa nɔ yemi ɔmɛ ngɛ Je Ma Amɛ A Kake Peemi Kuu ɔ se fĩe bɔɔbɔɔbɔɔ. Se nɔ́ nɛ wa ma nyɛ maa hyɛ blɔ ji nɛ ɔ nɛ: Yehowa maa ngɔ kɛ wo je ma amɛ a tsui mi, nɛ a maa ngɔ a he wami ɔ kɛ ha lohwe awi yelɔ ɔ tlukaa. Ke ní nɛ ɔmɛ bɔni mi bami pɛ ɔ, wa maa na kaa e be kɛe nɛ amanehlu ngua a maa je sisi. Se loko jamɛ a be ɔ maa su ɔ, “nyɛ ha nɛ waa fɔ nyɔ nɛ wa hɛ nɛ hi wa he nɔ” ejakaa e be kɛe nɛ tsakemihi maa ba tlukaa!—1 Tɛs. 5:6.