Nyɛɛ Ngɔ Nyɛ “Mumi Mi Nike Ní” ɔ Kɛ Tsu Ní

Ke wa ná deka kɛ ha wa nyɛmimɛ Kristofohi nɛ wa wo wa sibi he wami ɔ, e haa nɛ wa bua jɔɔ. Se bɔ nɛ pee nɛ waa wo wa sibi he wami saminya a, e he hia nɛ waa pee babauu pe deka nɛ wa ma ná kɛ ha wa sibi kɛkɛ. Baiblo ɔ tu nyɛmi nɛ wa ngɛ nɛ waa kɛ woɔ wa sibi hemi kɛ yemi ɔ mi he wami ɔ he munyu kaa e ji “mumi mi nike ní.” (Rom. 1:​11, 12) Ngɛ mɛni blɔ nɔ wa ma nyɛ maa ngɔ nike ní nɛ ɔ kɛ tsu ní saminya?

Moo ngɔ o nyami munyu kɛ wo nihi he wami. Kaa nɔ hyɛmi nɔ́ ɔ, ke o ngɛ munyu heto hae ngɛ asafo mi kpe sisi ɔ, moo bɔ mɔde kaa o be o níhi a si kpamihi kɛ o susumihi a he munyu tue tsɔ̃. Mohu ɔ, moo pɔ Yehowa, Baiblo ɔ kɛ Yehowa sɔmɔli anɔkualetsɛmɛ a he munyu tumi. Ke waa kɛ wa nyɛmimɛ Kristofohi ngɛ ní sɛɛe ɔ, wa ma nyɛ maa tu Baiblo ɔ mi munyu ko nɛ woɔ nɔ he wami ɔ he munyu.

Moo ngɔ o ní peepee kɛ yi mi kpɔhi nɛ o mwɔ ɔ kɛ wo ni kpahi he wami. Kaa nɔ hyɛmi nɔ́ ɔ, e ngɛ mi kaa ni komɛ kɛ haomihi ngɛ kpee mohu lɛɛ, se loloolo ɔ, a suɔ kaa a maa ya nɔ ma tsu be tsuo sɔmɔmi ní tsumi ɔ. Ni komɛ hu be deka ngɛ a ní tsumi mi aloo hiɔ ngɛ a nya gbae mohu lɛɛ, se a yaa asafo mi kpe nɛ a peeɔ ngɛ otsi ɔ mi ɔ be fɛɛ be.

Anɛ o ngɔɔ o munyu tutui kɛ woɔ nyɛmimɛ Kristofohi he wami lo? Anɛ o yɔseɔ bɔ nɛ o nyɛmimɛ Kristofohi guɔ a munyu tutui kɛ a ní peepee nɔ kɛ woɔ mo he wami ɔ lo?