1 Տարեգրություն

11 Որոշ ժամանակ անց բոլոր իսրայելացիները հավաքվեցին Դավթի մոտ՝ Քեբրոնում,+ ու ասացին. «Մենք քո միսն ու արյունն ենք:*+ 2 Այն ժամանակ, երբ Սավուղն էր թագավոր, դու էիր Իսրայելին առաջնորդում ռազմարշավների:*+ Եվ քո Աստված Եհովան ասաց քեզ. «Դու ես հովվելու իմ ժողովրդին՝ Իսրայելին, դու ես դառնալու իմ ժողովրդի՝ Իսրայելի առաջնորդը»»:+ 3 Իսրայելի բոլոր երեցները եկան թագավորի մոտ՝ Քեբրոն, և Դավիթ թագավորը այնտեղ նրանց հետ դաշինք կապեց Եհովայի առաջ: Դրանից հետո նրանք Դավթին օծեցին Իսրայելի թագավոր,+ ինչպես որ Եհովան ասել էր Սամուելի միջոցով:+

4 Ավելի ուշ Դավիթը և ամբողջ Իսրայելը գնացին պատերազմելու Երուսաղեմի, այսինքն՝ Հեբուսի դեմ,+ որտեղ հեբուսացիներն+ էին բնակվում: 5 Հեբուսի բնակիչները ծաղրեցին Դավթին՝ ասելով. «Դու երբեք չես մտնի այստեղ»:+ Դավիթը, սակայն, գրավեց Սիոնի ամրոցը,+ որն այժմ կոչվում է Դավթի քաղաք:+ 6 Դավիթն ասաց. «Ով առաջինը հարձակվի հեբուսացիների վրա, նա զորագլուխ և իշխան կդառնա»: Առաջինը հարձակվեց Հովաբը՝+ Շարուհեայի որդին, և նա զորագլուխ դարձավ: 7 Դավիթը բնակություն հաստատեց այդ ամրոցում: Դա է պատճառը, որ այն կոչեցին Դավթի քաղաք: 8 Նա սկսեց շինարարական աշխատանքներ կատարել քաղաքի տարբեր հատվածներում՝ Թումբից* մինչև դրա հարակից տարածքները, իսկ Հովաբը վերակառուցեց քաղաքի մնացած մասը: 9 Դավիթը գնալով հզորանում էր,+ և Զորքերի տեր Եհովան նրա հետ էր:

10 Սրանք են Դավթի զորեղ ռազմիկները, որոնք բոլոր իսրայելացիների հետ մեծապես աջակցեցին նրան և օգնեցին թագավոր դառնալ, ինչպես որ Եհովան ասել էր Իսրայելի առնչությամբ:+ 11 Ահա Դավթի զորեղ ռազմիկների ցուցակը. առաջինը Հաքեմոնյանների տոհմից Հեսբաամն էր,+ որը երեքի մեջ գլխավորն էր:+ Մի անգամ նա իր նիզակով 300 մարդ սպանեց:+ 12 Նրանից հետո Եղիազարն էր՝+ Աքուքի+ սերնդից Դոդայի որդին: Նա երեք զորեղ ռազմիկներից մեկն էր: 13 Նա Դավթի հետ էր Փեսդոմմիմում,+ որտեղ փղշտացիները հավաքվել էին պատերազմելու: Փեսդոմմիմում մի արտ կար, որում առատորեն գարի էր ցանված: Իսրայելացիները փախան փղշտացիներից: 14 Բայց Եղիազարը կանգնեց արտի մեջտեղում ու սկսեց պաշտպանել այն՝ կռվելով փղշտացիների դեմ, և Եհովան մեծ հաղթանակ* պարգևեց իր ժողովրդին:+

15 Երբ փղշտացիների զորքը ռաֆայիմների հովտում+ բանակ էր դրել, 30 զորավարներից երեքը իջան դեպի ժայռը՝ Դավթի մոտ՝ Ոդողոմի քարայր:+ 16 Դավիթն այդ ժամանակ ապաստարանում էր, իսկ փղշտացիների կայազորներից մեկը՝ Բեթլեհեմում: 17 Դավիթը իր փափագն արտահայտեց՝ ասելով. «Ա՜խ, երանի՜ թե ջուր խմեի Բեթլեհեմի+ դարպասի մոտի ջրհորից»: 18 Այդ ժամանակ երեք զորեղ ռազմիկները ներխուժեցին փղշտացիների բանակատեղի, Բեթլեհեմի դարպասի մոտի ջրհորից ջուր հանեցին ու բերեցին Դավթին: Բայց նա հրաժարվեց խմել այդ ջրից և այն թափեց Եհովայի առաջ: 19 Նա ասաց. «Անհնա՛ր է, որ ես այս բանն անեմ, որովհետև Աստծու տեսանկյունից դա անընդունելի է: Ինչպե՞ս կարող եմ խմել այս մարդկանց արյունը, որոնք իրենց կյանքը վտանգի են ենթարկել:+ Նրանք իրենց կյանքը վտանգելո՛վ այս ջուրը բերեցին»: Եվ նա չխմեց ջրից: Ահա այս բաներն են արել Դավթի երեք զորեղ ռազմիկները:

20 Աբեսսան՝+ Հովաբի եղբայրը,+ երեքհոգանոց մեկ այլ խմբում գլխավորն էր: Մի անգամ նա իր նիզակով 300 մարդ սպանեց: Աբեսսան առաջին երեքի նման մեծ համբավ ուներ:+ 21 Նա իր երեքհոգանոց խմբում մյուս ռազմիկներից ավելի շատ էր աչքի ընկնում և նրանց գլխավորն էր, բայց առաջին երեքին չէր հասնում:

22 Բանեան՝+ Հովիադայի որդին, խիզախ մարդ էր,* որը շատ սխրանքներ էր գործել Կաբեսելում:+ Նա սպանել էր մովաբացի Արիելի երկու որդիներին: Նաև մի ձյունոտ օր իջել էր հորի մեջ և առյուծի էր սպանել:+ 23 Բացի այդ՝ նա սպանել էր մի աժդահա եգիպտացու, որի հասակը հինգ կանգուն* էր:+ Չնայած եգիպտացու ձեռքին ջուլհակահաստոցի* գլանի նման նիզակ էր եղել,+ Բանեան ձեռնափայտով հարձակվել էր նրա վրա, ձեռքից խլել էր նիզակը և հենց նրա նիզակով էլ սպանել էր նրան:+ 24 Այս բաներն էր արել Հովիադայի որդի Բանեան: Առաջին երեք զորեղ ռազմիկների նման նա էլ մեծ համբավ ուներ: 25 Թեև նա 30-ի մեջ ավելի շատ էր աչքի ընկնում, բայց այդ երեքին չէր հասնում:+ Սակայն Դավիթը նրան նշանակեց իր թիկնապահների պետ:

26 Զորքի հզոր ռազմիկներն էին Ասայելը՝+ Հովաբի եղբայրը, Ելեանան՝ բեթլեհեմցի Դոդայի որդին,+ 27 հարորացի Սամոթը, փելոնացի Քելեսը, 28 Իրան՝+ թեկուեցի Եկգեսի որդին, անաթոթացի Աբիեզերը,+ 29 հուսացի Սիբակը,+ Աքուքի սերնդից Ելին, 30 նետոֆացի Մաարան,+ Ալադը՝+ նետոֆացի Բաանահի որդին, 31 Եթթին՝ Բենիամինյանների+ Գաբաայից Ռիբայի որդին, փարաթոնցի Բանեան, 32 Հուրան՝ Գաասի+ գետահովիտներից,* բեթարաբացի Աբիելը, 33 բահարումացի Ազամոթը, սալաբիմացի Ելիաբան, 34 գեզոնացի Հասեմի որդիները, Հովնաթանը՝ հարարացի Սագեի որդին, 35 Աքիամը՝ հարարացի Սաքարի որդին, Ելիֆալը՝ Ուրի որդին, 36 մեքուրաթացի Օֆերը, փելոնացի Աքիան, 37 կարմեղոսցի Եզրոն, Նաարան՝ Ազբիայի որդին, 38 Հովելը՝ Նաթանի եղբայրը, Մաբարը՝ Ագարի որդին, 39 ամմոնացի Սելեկը, բերոթացի Նահարան՝ Շարուհեայի որդի Հովաբի զինակիրը, 40 հեթերացի Իրան, հեթերացի Գարեբը, 41 քետացի Ուրիան,+ Զաբադը՝ Աղայիի որդին, 42 Ադինան՝ Ռուբենի սերնդից Սիզայի որդին, որը Ռուբենյանների գլխավորն էր, և նրա հետ՝ 30 մարդ, 43 Հանանը՝ Մաաքայի որդին, մաթանացի Հոսափատը, 44 աստարոթացի Օզիան, Սաման ու Հեյելը՝ արոերացի Քոթամի որդիները, 45 Հեդիելը՝ Սամարիի որդին, նրա եղբայր թիսացի Հովքան, 46 մահավացի Ելիելը, Հերիբային ու Հոսավիան՝ Ելնաամի որդիները, մովաբացի Եթեման, 47 Ելիելը, Օբեդը և մեսոբացի Հեսիելը: