16 ’n Mens berei die gedagtes van sy hart voor,
maar die antwoord wat hy gee, kom van Jehovah af.+
2 ’n Mens dink dat alles wat hy doen, reg is,+
maar Jehovah kyk na die rede waarom hy dit doen.+
3 Vertrou alles wat jy doen, aan Jehovah toe,+
dan sal jou planne suksesvol wees.
4 Jehovah laat alles tot sy voorneme bydra,
selfs die goddeloses op die dag van rampspoed.+
5 Elkeen wat trots is, is vir Jehovah afskuwelik.+
Wees verseker dat hy nie ongestraf sal bly nie.
6 Deur lojale liefde en getrouheid is vergifnis van sonde moontlik,+
en vrees vir Jehovah laat ’n mens slegte dinge vermy.+
7 As Jehovah gelukkig is met die manier waarop ’n man lewe,
gee hy hom selfs vrede met sy vyande.+
8 Dit is beter om min te hê en regverdig te wees+
as om ’n groot inkomste te hê en oneerlik te wees.+
9 ’n Man kan in sy hart beplan wat hy wil doen,
maar Jehovah rig sy voetstappe.+
10 God se besluite moet op die lippe van ’n koning wees.+
Hy moet altyd met geregtigheid optree.+
11 ’n Akkurate weegskaal kom van Jehovah,
en al die gewigte in die sak is deur hom gemaak.+
12 Konings haat goddelose dade,+
want die troon word stewig gevestig deur regverdigheid.+
13 Woorde van regverdigheid is vir konings aangenaam.
Hulle is lief vir mense wat die waarheid praat.+
14 Die koning se woede is soos ’n boodskapper van die dood,+
maar die wyse man laat dit bedaar.+
15 ’n Koning se goedkeuring beteken lewe.
Sy goedkeuring is soos ’n reënwolk in die lente.+
16 Dit is baie beter om wysheid te verkry as goud!+
En om verstandigheid te verkry, is beter as silwer.+
17 Die grootpad van dié wat reg lewe, lei hulle weg van wat sleg is.
Die een wat seker maak dat hy op die regte pad bly, bewaar sy lewe.+
18 Trots lei tot ondergang,
en hoogmoed kom voor ’n val.+
19 Dit is beter om nederig te wees saam met nederige mense+
as om te deel in die rykdom van hoogmoedige mense.
20 Die een wat met insig optree, sal suksesvol wees,
en gelukkig is die een wat op Jehovah vertrou.
21 Die persoon met ’n wyse hart, sal verstandig genoem word,+
en die een wat vriendelik praat, het die vermoë om ander te oorreed.+
22 Insig is ’n fontein van die lewe vir dié wat dit besit,
maar dwase word gestraf deur hulle eie dwaasheid.
23 ’n Wyse persoon kies sy woorde versigtig,+
en daarom kan sy woorde mense oorreed.
24 Aangename woorde is soos heuning,
soet vir die siel en genesend vir die liggaam.+
25 Daar is ’n weg wat vir ’n mens reg lyk,
maar op die ou end lei dit na die dood.+
26 ’n Werker se eetlus motiveer hom om hard te werk,
want sy honger spoor hom aan.+
27 ’n Slegte man grawe slegte dinge op.+
Sy woorde is soos ’n vernietigende vuur.+
28 ’n Moeilikheidmaker veroorsaak onenigheid,+
en ’n lasteraar dryf goeie vriende uitmekaar.+
29 ’n Gewelddadige man mislei ander
en laat hulle die verkeerde pad volg.
30 Hy knip sy oog terwyl hy slegte dinge beplan.
Hy pers sy lippe saam terwyl hy slegte dinge doen.
31 Grys hare is ’n pragtige kroon+
wanneer dit op die weg van regverdigheid gevind word.+
32 Die een wat nie gou kwaad word nie,+ is beter as ’n sterk man,
en hy wat sy woede beheer, as die een wat ’n stad verower.+
33 Die lot word in die skoot gewerp,+
maar elke besluit daardeur kom van Jehovah af.+