Is jy ’n liefderyke ouer?

HET jy jou kinders lief? Is jy trots op hulle? Dink jy dat elkeen spesiaal, uniek en onvervangbaar is? Die meeste ouers dink so. Maar sê jy vir jou kinders dat jy so dink? Prys jy hulle, veral as hulle goed vaar in iets? En toon jy jou liefde op ander maniere—deur liefdevol met hulle te speel, deur ’n gerusstellende aanraking en liefdevolle drukkies?

“Maar dit is net nie my geaardheid nie”, maak party dalk beswaar. “Ek toon nie my gevoelens so openlik nie.” Dit is waar, nie almal is van nature demonstratief nie. Maar om liefderyk teenoor jou kinders op te tree, is dalk belangriker as wat jy ooit besef het.

’n Groep wetenskaplikes het onlangs ’n studie voortgesit wat in 1951 van 400 kleuterskoolkinders gemaak is. Hulle het onder die 94 mans en vroue wat hulle kon opspoor insiggewende gedragspatrone gevind. Volgens The New York Times het dié kinders wat liefderyke ouers gehad het oor die algemeen as volwassenes beter gevaar. Hulle het ’n suksesvolle huwelik gehad, kinders grootgemaak, hulle werk geniet en hegte vriendskappe onderhou. Dr. Carol Franz, onder wie se leiding die studie gedoen is, het aan die koerant gesê dat hulle “nie sielkundige probleme ondervind het nie en lewensvreugde en selfvoldoening getoon het”.

In teenstelling hiermee het dr. Franz gevind dat “dié met liefdelose, terughoudende ouers later in hulle lewe in alle opsigte die meeste gesukkel het—in hulle werk, om sosiaal aan te pas en op sielkundige gebied”. Om die waarheid te sê, die studie het te kenne gegee dat ’n gebrek aan die betoning van ouerlike liefde kinders op die lang duur dalk selfs meer benadeel as ’n egskeiding, alkoholisme of armoede in die gesin.

Dit behoort opregte Bybelstudente nie te verbaas nie. Hulle is goed bekend met die manier waarop Jesus kinders behandel het. Hulle was vir hom belangrik, hy het sy arms om hulle gesit en sy toegeneentheid teenoor hulle getoon (Markus 10:13-16; Lukas 9:46-48; 18:15-17). Hy het natuurlik net sy hemelse Vader in hierdie opsig nagevolg—die Een wat ’n Vader vir die vaderlose seun word (Psalm 68:5, NW). Jehovah is die volmaakte Ouer; tot die vreugde van diegene wat hom liefhet, kan hy vir enige tekortkoming in onvolmaakte menslike ouers vergoed.—2 Korinthiërs 6:18.