Gewete, waarom teister jy my so?

“O LAFHARTIGE gewete, hoe teister jy my tog!” Daardie welbekende woorde van koning Richard III in Shakespeare se toneelstuk met dieselfde naam beskryf die wroeging wat die mensegewete kan veroorsaak. Die gewete het inderdaad al baie mense se lewe beïnvloed en verander.

Die krag wat die gewete uitoefen, kan duidelik gesien word uit wat onlangs met ’n jong Italianer gebeur het. Sy werk as ’n veiligheidswag het behels dat hy groot somme geld vervoer. Dit het goed gegaan tot hy op ’n dag voor die versoeking geswig het en ’n sak met 300 000 000 lire (R792 000) gesteel het. Aangesien hy saam met twee kollegas gewerk het en dit onmoontlik was om te bepaal watter een van hulle dit geneem het, is al drie afgedank.

Hy het die gesteelde geld weggesteek met die doel om dit te gebruik wanneer dinge eers bedaar het. In plaas daarvan het ’n onverwagse teistering begin: Hy kon nie help om gedurig te dink oor hoe sy onskuldige werkmaats die trekpas gekry het nie. Sy gewete het hom geen rus gegee nie. Hy kon nie slaap nie. Hy kon nie eet nie. Daar was met hom geen huis te hou nie.

Hy het uiteindelik, nadat hy deur sy skuldgevoelens oorweldig is en deur sy gemoedstryd uitgeput is, na die polisie gegaan en die gesteelde geld aan hulle oorhandig. Hy het vir hulle gesê: “Die wroeging was te erg. Ek kan dit nie langer verduur nie!” Hy het bygevoeg: “Dis beter om in die tronk te wees en te weet jy is eerlik as om vry te wees, maar ’n gewete te hê wat jou as ’n dief veroordeel.”

Die gewete is God se gawe aan alle mense. Dit kan ons beskuldig of verontskuldig. As ons daarna luister, kan dit voorkom dat ons foute begaan en ernstige oortredings rasionaliseer. In plaas daarvan dat ons dus sy prikkels ignoreer of gebelg daarteen uitvaar soos Shakespeare se koning Richard III gedoen het, moet ons ons gewete koester en beskerm.—Romeine 2:14, 15.

As jy graag meer inligting oor die Bybel en sy praktiese raad wil hê, kan jy gerus met Jehovah se Getuies by jou plaaslike Koninkryksaal in verbinding tree of na die naaste adres op bladsy 5 skryf.