Jongmense spreek hulle waardering uit

DIE jongmense op hierdie foto is almal Nigeriese hoërskoolleerlinge. In ’n brief aan die takkantoor van Jehovah se Getuies in Nigerië het hulle geskryf: “Ons wil julle graag bedank vir die bedagsaamheid wat julle teenoor ons jongmense betoon het deur die boek Vrae wat jongmense vra—Antwoorde wat werk uit te gee.

“Hierdie publikasie het ons gehelp om die druk van die wêreld te weerstaan en onskriftuurlike leringe te weerlê. Dit dek ’n wye spektrum van sake waaroor jongmense besorg is, en die raad daarin is altyd op die Bybel gebaseer. Die gedeelte wat portuurdwang bespreek, het ons veral gehelp om die Bybel se wysheid te verstaan met betrekking tot sy raad om met wyse persone om te gaan en assosiasie met dwase persone te vermy. Die ander leerlinge in ons skool is verbaas om te sien hoe ons in liefde met mekaar oor die weg kom en hoe ons ywerig daarna streef om die eenheid van die gees in die verenigende band van vrede te bewaar.

“Terwyl ons altyd goeie gedrag onder die leerlinge in ons skool probeer handhaaf, verkondig ons die Koninkrykshoop ywerig aan alle leerlinge wat na ons wil luister, ten spyte van diegene wat moontlik ’n verkeerde invloed op ons probeer uitoefen.”

Die brief is geteken: “Van jong Getuies van Jehovah, All Saints-hoërskool, Aba, Abia-staat, Nigerië.”

As jy graag inligting wil hê oor hoe jy ’n eksemplaar kan bekom van die boek Vrae wat jongmense vra—Antwoorde wat werk of as jy ’n gratis tuisbybelstudie wil hê, kan jy gerus skryf aan Wagtoring, Privaatsak X2067, Krugersdorp, 1740 of na die gepaste adres op bladsy 5.