‘Die eksperiment het misluk’
IN HIERDIE wêreld, ’n globale dorp wat vinnig kleiner word, word die kloof tussen die rykes en die armes na bewering al hoe groter. ’n Internasionale aktivistegroep het kommentaar gelewer oor die pogings om ’n globale ekonomie op te bou en gesê: “Ná 50 jaar is hierdie eksperiment besig om in duie te stort. Pleks dat dit tot ekonomiese voorspoed vir alle mense gelei het, het dit die planeet tot op die randjie van ’n omgewingsramp gebring, ongekende maatskaplike onrus veroorsaak, die ekonomieë van die meeste lande ontwrig en armoede, honger, grondloosheid, migrasie en maatskaplike ontwrigting laat toeneem. ’n Mens kan nou maar sê dat die eksperiment misluk het.”
Wat het skeef geloop? Wanneer die mens selfsugtige doelwitte najaag, is dit hoogs waarskynlik dat hulle skade gaan aanrig. Die belegger-finansier George Soros sê: “Die markte maak handelsartikels van alles, insluitende mense (arbeid) en die natuur (grond).” Menslike onvolmaaktheid speel ook ’n rol. Soros is dit eens met die filosoof Karl Popper se menings en sê: “Ons begrip is in wese onvolmaak; die absolute waarheid, die volmaakte ontwerp vir die gemeenskap is buite ons bereik.”
Ekonomiese ongelykheid is niks nuuts nie. ’n Bybelskrywer het agt eeue voor Christus van diegene gepraat “wat die armes verdruk, die behoeftiges hard behandel” (Amos 4:1). Nadat ’n eertydse staatsman ongeveer 3 000 jaar gelede soortgelyke onregte gesien het, het hy geskryf: “Die een mens heers oor die ander tot sy ongeluk.”—Prediker 8:9.
Wat is die oplossing? Kan mense-instellings die diepgewortelde ekonomiese ongelykheid deur internasionale samewerking oplos? Soros sê: “Ons het nie voldoende internasionale instellings om persoonlike vryhede, menseregte en die omgewing te beskerm, of om maatskaplike geregtigheid te bevorder nie—wat nog te sê van die vrede bewaar. Die meeste instellings wat ons het, is bondgenootskappe tussen state, en state stel gewoonlik hulle eie belange bo gemeenskaplike belange. Die Verenigde Nasies is hoegenaamd nie daartoe in staat om die beloftes in die inleiding tot sy handves na te kom nie.”
Moet ons moed verloor? Nee. ’n Regverdige wêreldregering is om die draai! Dit was die tema van Jesus se predikingswerk. Hy het dit “die koninkryk van God” genoem, en hy het sy volgelinge geleer om daarvoor te bid (Lukas 11:2; 21:31). God se Koninkryk is in die hemel opgerig, en dit sal binnekort alle ongeregtigheid van hierdie aarde af verwyder (Openbaring 11:15, 18). Dit sal nie net ’n tydelike eksperiment met heerskappy wees nie, maar sal vir ewig bestaan (Daniël 2:44). Dit sal probleme soos armoede en verdrukking vir goed oplos. Wat ’n wonderlike vooruitsig is dit tog vir die armes en die verdruktes—eintlik vir almal!
[Prent op bladsy 13]
Die globale ekonomie het nie die probleme van die armes opgelos nie—miljarde lewe nog steeds sonder lopende water of elektrisiteit