Keuses wat jou gesondheid raak

DIT is dikwels ’n uitdaging om reg te eet en fiks te bly. Weens die druk waaronder mense vandag verkeer, is dit blykbaar geriefliker om eerder verpakte “trooskos” te eet as om vars kos voor te berei en makliker om vrye tyd voor die TV of rekenaar deur te bring as om aan fisiese aktiwiteite deel te neem. Maar hierdie keuses veroorsaak moontlik dat ’n toenemende aantal volwassenes en kinders ernstige gesondheidsprobleme ontwikkel.

In Asië, berig die tydskrif Asiaweek, “veroorsaak diëte wat uit ryk kos bestaan en die feit dat mense ’n al hoe minder aktiewe lewe lei, ’n suikersiekte-epidemie”. Dit is kommerwekkend dat die siekte al hoe jonger lede van die gemeenskap tref. En in Kanada “het navorsers gevind dat slegs een uit sewe preadolessente genoeg vrugte en groente eet [en] dat net bietjie meer as die helfte genoeg speel om selfs net te begin sweet”, berig The Globe and Mail. So ’n lewenswyse sal daartoe lei dat hierdie jongmense “hartkwale sal hê teen die tyd dat hulle hulle dertigerjare bereik”, berig die verslag.

Slaapdeskundiges sê eweneens dat volwassenes moontlik elke nag ongeveer agt uur slaap nodig het en dat jongmense moontlik selfs meer nodig het. Trouens, in ’n studie deur die Universiteit van Chicago het gesonde jong mans wat ses opeenvolgende nagte net vier uur slaap gekry het, tekens van mediese probleme begin toon wat gewoonlik onder senior burgers gevind word. Hoewel baie mense kosbare ure van slaaptyd prysgee ter wille van werk, skool of plesier, kan die gevolge teenproduktief wees. James Maas, slaapnavorser aan New York se Cornell-universiteit, sê: “Dit is een ding om bloot te funksioneer, maar iets heeltemal anders om wakker en kreatief te wees en nie op die snelweg agter die wiel aan die slaap te raak nie.”

Ander faktore het natuurlik ook ’n invloed op ons fisiese welsyn. ’n Positiewe uitkyk kan byvoorbeeld ons gesondheid bevoordeel. En ’n ware doel in die lewe kan ons aanspoor om keuses te maak wat ons sal help om gesond te bly.