Lewer bewys van ’n goeie gewete en verheerlik God
DEUR ONTWAAK!-MEDEWERKER IN DIE OEKRAÏNE
OP PAD huis toe ná ’n Christelike vergadering het die Tsjibisof-gesin, Getuies van Jehovah in die Oekraïne, ’n beursie met waardevolle items daarin gevind, waaronder ’n bestuurderslisensie, kredietkaarte en ongeveer R3 000 in plaaslike geld. In hierdie gesin van vyf het net die man ’n werk gehad. Hy het ongeveer R420 per maand verdien. Hierdie geld kon vir hulle dus baie gehelp het. Wat het hulle gedoen?
Die moeder vertel: “Ons dogters het onmiddellik koppe bymekaar gesit oor hoe om die beursie aan sy eienaar terug te besorg, wat volgens die bestuurderslisensie ’n vrou was. Ek en my man was bly om te sien hoe ons kinders bewys lewer dat hulle ’n goed opgeleide gewete het. Die volgende dag het ek die vrou gebel wat die beursie verloor het. Olha het gekom en ons met trane van blydskap vertel dat sy en haar man ’n paar klein winkels in ons dorp besit. Die geld in die beursie was die maandelikse salarisse vir hulle werknemers. Boonop was een van die finansiële dokumente baie belangrik vir haar onderneming se rekeninge.
“Olha het ons gevra waar ons die beursie gevind het. Ons het vir haar gesê en het ook verduidelik dat ons in daardie omgewing was omdat ons van ons Christelike vergadering af teruggekeer het. Toe ons vir haar Bybellektuur aanbied, het sy dit beleefd geneem.
“’n Paar weke later het ’n mede-Getuie in ons gemeente ons vertel dat sy besig was om Bybellektuur aan verbygangers op straat aan te bied toe ’n vrou aan haar verduidelik het dat sy voorheen nooit na Jehovah se Getuies sou geluister het nie. Maar sy was nou nie net bereid om te luister nie, maar ook om lektuur te neem. Sy het gesê dit is omdat die Getuies haar dogter se beursie aan haar terugbesorg het.”
[Prent op bladsy 31]
Die Tsjibisof-gesin