“Ek het vertroosting van u nodig”

● Die takkantoor van Jehovah se Getuies in Mexiko het die volgende brief ontvang van ’n vrou wat by ’n skool werk wat spesiale aandag aan gestremdes en sielsiekes skenk. Sy het geskryf: “Op 9 Mei is my dierbare ma oorlede. Ek kan nie die verlies wat ek voel, beskryf nie. ’n Paar maande voordat sy gesterf het, het ek vir my werk navorsing gedoen oor die onderwerp van tanatologie, die studie van die dood en hoe om dit sielkundig te verwerk. Ek het gedink dat dit my ook sou help, maar dit het nie.”

Toe sy eendag baie bedroef gevoel het, het sy tot God gebid en gesê: “Ek het vertroosting van u nodig.” “Daardie aand”, het sy gesê, “het ek die brosjure Wanneer ’n geliefde sterf gelees. Ek het gevoel dat dit vir my geskryf is. Dit wys dat daar niks mee verkeerd is om te huil nie. In die deel ‘Hoe kan ek my smart verwerk?’ sê dit: ‘[Moenie] die waarde van gebed onderskat nie. . . . Die hulp wat God voorsien, maak beslis ’n verskil. . . . Goddelike hulp neem nou wel nie die pyn weg nie, maar dit kan dit makliker maak om dit te verduur. Dit beteken nie dat jy nie meer sal huil of dat jy jou geliefde sal vergeet nie. Maar jy kan herstel.’ Hierdie woorde maak werklik ’n verskil.”

As jy ’n geliefde aan die dood afgestaan het en ’n vertroostende woord nodig het, sal jy of iemand wat jy ken, dit moontlik vertroostend vind om die brosjure met 32 bladsye Wanneer ’n geliefde sterf te lees.

Jy kan ’n eksemplaar aanvra deur die bygaande koepon in te vul en dit na die adres op die koepon of na die gepaste adres op bladsy 5 van hierdie tydskrif te pos.

□ Lewer asseblief ’n eksemplaar van hierdie brosjure by my af, sonder enige verpligting.

□ Tree asseblief met my in verbinding in verband met ’n gratis tuisbybelstudie.