Eerlikheid bring ware sukses mee

“Selfs wanneer iemand oorvloed het, spruit sy lewe nie voort uit die dinge wat hy besit nie.”—Lukas 12:15.

OM ’N inkomste te verdien, is ’n noodsaaklike deel van die lewe. Ons het ’n godgegewe verantwoordelikheid om vir onsself en ons gesin te sorg.—1 Timoteus 5:8.

Maar gestel geld en die dinge wat dit kan koop, word vir jou meer as net ’n middel om in jou behoeftes te voorsien? Gestel die verkryging daarvan word jou doel in die lewe? Diegene wat die najaging van rykdom hulle hoofdoel in die lewe maak, trap makliker in die strik om oneerlik te wees. Hulle kom soms te laat tot die besef dat oneerlikheid hulle van ware sukses beroof. Wat meer is, liefde vir geld besorg mense baie pyn, soos die Bybel sê.—1 Timoteus 6:9, 10.

Let op die voorbeeld van vier persone vir wie sukses meer beteken as om net rykdom te vergaar.

Selfrespek

“’n Hele paar jaar gelede het ek ’n onderhoud gevoer met ’n potensiële kliënt wat ’n lewensversekeringspolis van ’n miljoen dollar wou uitneem. My kommissie sou duisende dollars beloop. Hy het vir my gesê dat hy slegs die polis sou uitneem as ek vir hom die helfte van my kommissie gee. Wat hy gevra het, was nie net oneties nie, maar ook onwettig, en ek het dit vir hom gesê.

“Ek het met hom probeer redeneer deur hom te vra of hy werklik sy vertroulike persoonlike en finansiële inligting aan ’n oneerlike persoon sou wou gee. Ek het my standpunt herhaal en vir hom gesê om my te kontak as hy wou hê dat ek sy agent moet wees. Ek het nooit weer van hom gehoor nie.

“As ek sy aanbod aanvaar het, sou ek my onkreukbaarheid prysgegee het en my selfrespek as ’n Christen verloor het. Ek sou die slaaf geword het van ’n man wat my gemanipuleer het om deel te wees van ’n bedrogspul.”—Don, VSA.

Gemoedsrus

Soos in die eerste artikel van hierdie reeks genoem is, is Danny ’n groot bedrag omkoopgeld aangebied as hy bereid sou wees om te lieg oor die geskiktheid van ’n potensiële verskaffer se fabriek. Hoe het hy gereageer?

“Ek het die bestuurder bedank vir die ete en toe die koevert met die geld vir hom teruggegee. Hy het my probeer oorreed en gesê dat hy my selfs meer geld sal gee indien sy fabriek goedgekeur word. Ek het geweier.

“As ek die geld aanvaar het, sou ek heeltyd bang gewees het dat iemand sou uitvind. Later het my baas op die een of ander manier hiervan te hore gekom. Ek was so bly en verlig dat ek niks oneerliks gedoen het nie. Spreuke 15:27 het by my opgekom: ‘Wie onregverdige wins maak, stort sy eie huis in die ongeluk, maar wie geskenke [of omkoopgeld] haat, sal bly lewe.’”—Danny, Hongkong.

Gesinsgeluk

“Ek werk vir myself in die boubedryf. Daar is baie geleenthede om kliënte te kul of belasting te ontduik. Maar ek en my gesin het baat gevind by my vasbeslotenheid om eerlik te wees.

“’n Eerlike persoon sal in elke aspek van sy lewe eerlik wees, nie net wanneer hy by die werk is of sake doen nie. Die wete dat jou man of vrou nie God se standaarde van eerlikheid sal skend nie, dra by tot groter vertroue in die gesin. Jou huweliksmaat voel veilig in die wete dat jy altyd eerlik is, nie net wanneer dit jou pas nie.

“Al besit jy die grootste maatskappy in die wêreld, sal jou geld jou nie help om gesinsprobleme op te los nie. As een van Jehovah se Getuies vind ek dat ek ’n balans kan handhaaf deur Bybelbeginsels te volg. Ek het tyd om my gesin te geniet, sonder om vasgevang te word in die dolle gejaag van hierdie wêreld wat deur geld en gierigheid beheer word.”—Durwin, VSA.

’n Goeie verhouding met God

“My werk sluit in dat ek voorraad vir my maatskappy aankoop. Verkoopsagente maak soms die voorstel dat hulle my ’n persentasie sal gee van die bedrag van my maatskappy se aankope in plaas daarvan om my maatskappy die volle afslag te gee. Maar dit sal daarop neerkom dat ek van my maatskappy steel.

“Ek verdien nie ’n groot salaris nie en kan doen met ekstra geld. Maar niks kan met ’n skoon gewete en ’n goedgekeurde posisie voor Jehovah God vergelyk word nie. In elke transaksie volg ek dus die Bybelbeginsel in Hebreërs 13:18: ‘Ons wil ons in alles eerlik gedra.’”—Raquel, Filippyne.

[Venster/Prente op bladsy 9]

Beginsels vir eerlike sakegebruike

Aanvaarde standaarde van sake-etiek verskil van plek tot plek. Bybelbeginsels kan jou egter help om etiese besluite te neem. Eerlike sakegebruike word deur die volgende ses dinge gekenmerk:

Eerlikheid

Beginsel: “Moenie vir mekaar lieg nie.”—Kolossense 3:9.

Betroubaarheid

Beginsel: “Laat julle woord Ja eenvoudig Ja beteken, julle Nee, Nee.”—Matteus 5:37.

Vertroulikheid

Beginsel: “Moenie die vertroulike gesprek van ’n ander openbaar nie.”—Spreuke 25:9.

Beginselvastheid

Beginsel: “Jy mag nie ’n omkoopgeskenk aanvaar nie, want die omkoopgeskenk verblind skerpsiendes.”—Eksodus 23:8.

Regverdigheid

Beginsel: “Alles wat julle dan wil hê dat die mense aan julle moet doen, moet julle ook net so aan hulle doen.”—Matteus 7:12.

Wettigheid

Beginsel: “Gee aan almal wat hulle toekom: aan hom wat die belasting verlang, die belasting.”—Romeine 13:7.

[Venster/Prente op bladsy 9]

Hoe om eerlik te wees wanneer jy sake doen

● Bepaal wat jou prioriteite is. Wat is byvoorbeeld vir jou die belangrikste: die verkryging van rykdom of ’n goeie posisie voor God?

● Besluit vooraf. Dink aan situasies wat jou eerlikheid op die proef kan stel, en beplan hoe jy sal reageer.

● Maak jou standpunt bekend. Aan die begin van ’n nuwe sakeverhouding moet jy ander taktvol inlig oor jou standaarde.

● Kry die ondersteuning van ander. Wanneer jy voor ’n versoeking of ’n etiese dilemma te staan kom, kan jy raad vra by iemand wat dieselfde waardes as jy het.

[Prent op bladsy 8]

As jy eerlik is, sal jy gemoedsrus hê