Die probleem met woede
’n Man het ’n toebroodjie by ’n kitskosrestaurant bestel. Hy het smoorkwaad geraak toe hy gemeen het dat hy te lank vir sy kos wag. Hy het die restaurant binnegestorm, ’n werknemer gedreig, hom teen ’n toonbank vasgedruk en hom geklap. Toe het die woedende man sy toebroodjie gegryp en by die restaurant uitgeloop.
ONS word almal nou en dan kwaad. Woede is immers deel van ons emosionele samestelling, net soos liefde, hoop, angs, hartseer en vrees. As woede beheers word, kan ’n mens op ’n gepaste manier daaraan uiting gee en kan dit ’n nuttige doel dien. Woede kan byvoorbeeld nuttig wees as dit ’n mens meer vasbeslote maak om sekere struikelblokke of probleme te oorkom.
Soos die voorbeeld hierbo toelig, het woede ook ’n donker sy. Party mense word gouer en meer dikwels kwaad en ondervind intenser woede as ander. Wanneer iemand hulle kwaad maak, sal hulle hom moontlik met woorde of selfs fisies aanval. Hulle word in werklikheid deur hulle woede beheer, terwyl dit andersom behoort te werk. Sulke onbeheerste woede is gevaarlik, en daarom word dit dikwels “probleemwoede” genoem.a
Diegene met woedeprobleme bring nie net hartseer oor hulleself nie, maar ook oor almal om hulle. As iemand sukkel om sy woede te beheers, kan selfs dinge wat onbenullig lyk, tot ’n woedeuitbarsting met tragiese gevolge lei. Beskou die volgende voorbeelde:
’n Man wat saam met ’n groep vriende in ’n besige straat gestap het, is in die nek geskiet nadat een van sy vriende se sportsak teen ’n ander man geskuur het.
’n Negentienjarige man het sy verloofde se elf maande oue baba doodgeslaan. Die man het ’n gewelddadige videospeletjie gespeel en het sy humeur verloor toe die baba aan die speletjie se kontrolepaneel geraak het en hy die speletjie verloor het.
Soortgelyke berigte van regoor die wêreld toon dat al hoe meer mense ’n probleem met woede het. Waarom is woede aan die toeneem?
[Voetnoot]
a Die brosjure Boiling Point—Problem Anger and What We Can Do About It beskryf “probleemwoede” as “enige disfunksionele manier om op woede te reageer en dit te hanteer wat herhaaldelik ernstige probleme veroorsaak in ’n persoon se lewe, in hulle denke, gevoelens, gedrag en verhoudings”.
[Venster op bladsy 3]
Woede is deel van ons emosionele samestelling. Daar is dus tye wanneer dit moontlik gepas sal wees om op ’n beheerste manier aan woede uiting te gee. Hierdie artikels handel egter oor ongesonde woede, wat ons en ander emosioneel, fisies en geestelik skade kan berokken.