Voltydse bedienaars aan die spits van die predikingswerk
Die eerste getuie van Jehovah wat jou besoek het, was moontlik ’n voltydse pionierbedienaar of ’n sendeling. Aangesien Jehovah se Getuies nie besoldigde bedienaars het nie, wonder jy dalk hoe hierdie mense voltyds aan die bediening kan deelneem.
Al Jehovah se Getuies wat toegewy en gedoop is, is bedienaars, maar die meeste van hulle het gesins- of ander verpligtinge wat dit vir hulle onmoontlik maak om meer as ’n paar uur per week aan hulle bediening te wy. Duisende Getuies dwarsoor die wêreld het egter hulle lewenspeil verlaag sodat hulle hulle verminderde uitgawes met deeltydse werk kan dek, en hulle wy nou 1 000 uur of meer per jaar aan die bediening.
Die voltydse pionierbedienaars het weliswaar nie veel geld om aan hulleself te bestee nie, maar vir hulle is dit ’n manier om eers God se Koninkryk te soek. En hulle ontvang talle seëninge. Net om sowat 90 uur per maand met ander oor God se Woord te praat, is op sigself ’n aangename ondervinding. Die voltydse bedienaar verbeter sy vaardigheid in die bediening en het ook die tyd om belangstelling behoorlik op te volg. Dit lewer uiters bemoedigende resultate. Op materiële gebied het hulle wat hulle nodig het, en hulle waardeer werklik wat hulle het.—Mattheüs 6:33.
In Februarie 1943 het die Wagtoringgenootskap die Wagtoring-Bybelskool Gilead gestig. Die doel was om ervare voltydse pionierbedienaars op te lei om as sendelinge in die buiteland te dien. Die kursus van vyf maande bestaan uit ’n gekonsentreerde studie van die Bybel, Bybelgeskiedenis, Jehovah se organisasie en verwante onderwerpe om hulle vir diens in ’n vreemde veld voor te berei.
Die Genootskap betaal vir vervoer na die sendingtoewysing en verskaf gesonde maaltye en eenvoudige huisvesting in sendinghuise. Elke sendeling kry ook ’n klein toelae vir persoonlike uitgawes. Die sendelinge maak beurte om die huishouding te behartig deur inkopies te doen, maaltye voor te berei en huis skoon te maak. Danksy hierdie sorg kan die sendelinge minstens 140 uur per maand daaraan wy om van huis tot huis te preek en Bybelstudies met belangstellendes te hou.
Baie van hierdie sendelinge word na plekke gestuur wat duisende kilometers van hulle huis en familie af is. Hulle moes hulle aanpas by ’n ander lewenstandaard en kultuur, by nuwe eetgewoontes, ’n ander klimaat en ’n nuwe taal. Hulle doen hierdie werk omdat hulle mense liefhet en ’n opregte begeerte het om hulle te help om van God se Koninkryk te leer.
Van 1943 tot 1985 het die Wagtoring-Bybelskool Gilead 80 kursusse aangebied en meer as 6 000 sendelinge uitgestuur. Onder die toesig van die Genootskap het hulle baanbrekerswerk gedoen in die uitbreiding van Bybelonderrig deur die hele Afrika, Sentraal- en Suid-Amerika, die Ooste en die Suidsee, en hulle het baie werk gedoen in Europa.
Hetsy Jehovah se Getuies voltyds, as pioniers of sendelinge, of deeltyds aan die bediening deelneem, hulle dien sonder geldelike vergoeding. Hulle gebruik hulle eie tyd en geld, en hulle kragte, om ander te help om die kennis te verkry wat tot die ewige lewe lei.—Johannes 17:3.
• Hoe kry sommige van Jehovah se Getuies dit reg om voltyds aan die bediening deel te neem, en waarom doen hulle dit?
• Hoe word bedienaars vir die sendingwerk opgelei?
• Hoe word sendelinge in hulle buitelandse toewysing onderhou?
[Prente op bladsy 22]
Links: Klas in Gileadskool, Brooklyn, New York, V.S.A.
Regs: Sendeling verduidelik God se Woord in Papoea Nieu-Guinee
[Prente op bladsy 23]
Pionierbedienaars en sendelinge verkondig God se Woord in talle lande
Brasilië
Dominikaanse Republiek
Spanje
Sierra Leone, Afrika