Les 14

Hoe Jehovah se Getuies georganiseer is

Wanneer het Jehovah se Getuies hulle hedendaagse begin gehad? (1)

Hoe word vergaderinge van Jehovah se Getuies gehou? (2)

Hoe word uitgawes gedek? (3)

Wie neem in elke gemeente die leiding? (4)

Watter groter vergaderinge word elke jaar gehou? (5)

Watter werk word by hulle hoofkwartier en takkantore gedoen? (6)

1. Jehovah se Getuies het in die 1870’s hulle hedendaagse begin gehad. Hulle is aanvanklik Bybelstudente genoem. Maar in 1931 het hulle die skriftuurlike naam Jehovah se Getuies aangeneem (Jesaja 43:10). Van ’n klein begin het die organisasie gegroei tot miljoene Getuies, wat in meer as 230 lande met die predikingswerk besig is.

2. Die meeste gemeentes van Jehovah se Getuies het drie keer elke week vergaderinge. Jy word uitgenooi om enige van hulle by te woon (Hebreërs 10:24, 25). Die Bybel is die grondslag vir wat geleer word. Vergaderinge word geopen en gesluit met gebed. “Geestelike liedere” word ook by die meeste vergaderinge hartlik saam gesing (Efesiërs 5:18, 19). Toegang is gratis, en geen kollektes word opgeneem nie.—Matteus 10:8.

3. Die meeste gemeentes hou vergaderinge in ’n Koninkryksaal. Dit is gewoonlik eenvoudige geboue wat deur Getuievrywilligers gebou is. Jy sal nie enige beelde, kruise of dergelike dinge by die Koninkryksaal sien nie. Uitgawes word deur vrywillige bydraes betaal. Vir diegene wat graag ’n bydrae wil maak, is daar ’n bydraebussie.—2 Korintiërs 9:7.

4. In elke gemeente is daar ouer manne, oftewel opsieners. Hulle neem die leiding wat die onderrigting van die gemeente betref (1 Timoteus 3:1-7; 5:17). Hulle word deur bedieningsknegte bygestaan (1 Timoteus 3:8-10, 12, 13). Hierdie manne word nie bo die res van die gemeente verhef nie (2 Korintiërs 1:24). Hulle word nie spesiale titels gegee nie (Matteus 23:8-10). Hulle trek nie verskillend van die ander aan nie. Hulle word ook nie vir hulle werk betaal nie. Die ouer manne sien gewillig om na die geestelike behoeftes van die gemeente. Hulle kan gedurende moeilike tye bemoediging en leiding voorsien.—Jakobus 5:14-16; 1 Petrus 5:2, 3.

5. Jehovah se Getuies hou ook elke jaar groot byeenkomste. Tydens sulke geleenthede kom baie gemeentes bymekaar vir ’n spesiale program van Bybelonderrig. Die doop van nuwe dissipels is ’n gereelde aspek van elke byeenkomsprogram.—Matteus 3:13-17; 28:19, 20.

6. Die wêreldhoofkwartier van Jehovah se Getuies is in New York. Die Bestuursliggaam, ’n sentrale groep ervare ouer manne wat toesig hou oor die wêreldwye gemeente, se kantore is daar geleë. Daar is ook meer as 100 takkantore regoor die wêreld. By hierdie plekke help vrywilligers om Bybellektuur te druk en te versend. Leiding word ook gegee oor hoe die predikingswerk georganiseer moet word. Waarom besoek jy nie die takkantoor naaste aan jou nie?