Onluste kan die goeie nuus nie stuit nie
EENDAG verlede Februarie is Venezuela se langverwagte nuwe ekonomiese pakket aangekondig. Die pryse van basiese voedselitems soos melk, meel en brood is met meer as 100 persent verhoog. Petrolpryse sou met 90 persent styg. Magtiging is verleen vir die verhoging van vervoertariewe met 30 persent. Die land was verbyster. Skielik, op Maandag, 27 Februarie, het mense gereageer deur landwyd in oproer te kom.
Die volgende oggend het dinge ’n crescendo van vernietiging en plundering bereik. Geweerskote het op verskillende plekke weerklink. Jonk en oud het deur stedelike strate getier en ’n spoor van vernietiging agtergelaat wat soos ’n slagveld gelyk het.
Die land se president het daardie middag ’n noodtoestand afgekondig en grondwetlike waarborge vir tien dae opgeskort. ’n Aandklokreëling is tussen 6:00 nm. en 6:00 vm. ingestel. Die volgende dag het die minister van verdediging afgekondig dat die aandklokreëling tot verdere kennisgewing sou geld. Die leër het sy gesag gebruik om beheer van die strate oor te neem, huise sonder magtiging binne te gaan en mense voor te keer en te deursoek. “Tweehonderd dood en duisend gewond in drie dae van onrus”, het een koerant berig.
Hoe het dit met die gemeentes van Jehovah se Getuies gedurende die krisis gegaan? Die broers is aangeraai: Wees versigtig en vermy onrusgebiede. Reël vergaderingtye sodat die aandklokreëling nagekom word en moenie in groot groepe preek nie. Tog is daar voortgegaan met die verkondiging van die goeie nuus van God se Koninkryk.—Mattheüs 24:14; 28:19.
Omdat die ongelowige man van ’n sekere Christin bekommerd was oor haar welsyn as sy uit die huis sou gaan om te preek, het hy haar verbied om die huis te verlaat. “Jy besef nie dat ek ’n verpligting het om na te kom nie”, het sy vir hom gesê. “Kom dan! Ek gaan ’n Bybelstudie met jou hou!”
Dit was die eerste keer in hierdie vrou se 22 jaar as Getuie dat haar man bereid was om die Bybel te bestudeer. Hy het nogtans gewaarsku: “Nou goed, solank jy belowe om nie uit te gaan nie. Maar moenie vir my vrae vra nie, lees net vir my.” Die suster het nietemin anderhalf uur met hom gestudeer. “Dit was ’n modelstudie, die beste studie wat ek in my 22 jaar in die waarheid gehad het”, het sy met trane in haar oë gesê.
In ’n ander geval was ’n gewone pionier besig om die sypaadjie voor haar huis te vee toe ’n vrou wat gewoonlik nie luister wanneer die Getuies haar huis besoek nie na haar toe gekom het. “Ek het julle Getuies nie in die laaste tyd sien preek nie”, het die vrou gesê. “Moenie vir my sê dat julle nie meer gaan preek nie!”
Die suster het verduidelik dat hulle net gedurende die onluste opgehou het om van huis tot huis te preek. “Maar die dag sal aanbreek wanneer ons nie meer vir mense gaan preek nie, en dit sal die einde van die wêreld beteken”, het die suster gesê. “Jy behoort nou van die geleentheid gebruik te maak en ’n Bybelstudie in jou huis te aanvaar.”
“Wanneer kan ons dit reël?” het die vrou vinnig gevra. Daar is op die plek reëlings getref om ’n tuisbybelstudie te begin.
Gelukkig het die onrus opgehou, en landsake kon weer normaal verloop. Maar tydens sulke gespanne situasies is dit gerusstellend om te weet dat daar binnekort ’n nuwe wêreld van kalmte en veiligheid sal wees. God se Woord belowe: “Ons verwag volgens sy belofte nuwe hemele en ’n nuwe aarde waarin geregtigheid woon” (2 Petrus 3:13). En solank God dit toelaat, sal Jehovah se Getuies aanhou om die goeie nuus van die Koninkryk te verkondig.
[Prente op bladsy 31]
Onrus het Koninkryks- verkondigers nie gekeer nie
[Erkenning]
Foto: Publicaciones Capriles, Caracas, Venezuela