Jesus se lewe en bediening

Verdere afskeidsraad

JESUS en die apostels is gereed om die bokamer te verlaat. “Hierdie dinge het Ek vir julle gesê, sodat julle nie mag struikel nie”, gaan hy voort. Dan laat hoor hy die ernstige waarskuwing: “Hulle sal julle uit die sinagoges ban. Ja, daar kom ’n uur dat elkeen wat julle om die lewe bring, sal dink dat hy ’n diens aan God bewys.”

Die apostels is klaarblyklik baie ontsteld oor hierdie waarskuwing. Al het Jesus vroeër gesê dat die wêreld hulle sou haat, het hy nie gesê dat hulle doodgemaak sou word nie. “Ek het julle dit nie van die begin af gesê nie”, verduidelik Jesus, “omdat Ek saam met julle was.” Maar hoe goed is dit tog dat hy hulle hierteen waarsku voor hy vertrek!

“En nou”, sê Jesus verder, “gaan Ek na Hom wat My gestuur het; en niemand van julle vra My: Waar gaan U heen nie?” Vroeër die aand het hulle gevra waarheen hy gaan, maar nou is hulle so geskok deur wat hy hulle vertel het dat hulle hom nie verder hieroor uitvra nie. Soos Jesus sê: “Omdat Ek dit vir julle gesê het, het droefheid julle hart vervul.” Die apostels is nie net bedroef omdat hulle gehoor het dat hulle kwaai vervolging gaan verduur en doodgemaak gaan word nie, maar omdat hulle Meester hulle gaan verlaat.

Daarom verduidelik Jesus: “Dit is vir julle voordelig dat Ek weggaan; want as Ek nie weggaan nie, sal die Trooster nie na julle kom nie; maar as Ek weggaan, sal Ek Hom na julle stuur.” Jesus kan net op een plek op ’n slag wees, maar wanneer hy in die hemel is, kan hy die trooster, God se heilige gees, na sy volgelinge enige plek op aarde stuur. Daarom sal Jesus se vertrek voordelig wees.

Jesus sê dat die heilige gees “die wêreld [sal] oortuig van sonde en van geregtigheid en van oordeel”. Die wêreld se sonde, sy gebrek aan geloof in God se Seun, sal blootgelê word. Daarbenewens sal die feit dat Jesus na die Vader opgevaar het oortuigende bewys lewer van sy geregtigheid. En die feit dat Satan en sy bose wêreld se pogings om Jesus sy onkreukbaarheid te laat prysgee, misluk het, lewer bewys dat die owerste van hierdie wêreld veroordeel is.

“Nog baie dinge het Ek om aan julle te sê”, sê Jesus voorts, “maar julle kan dit nou nie dra nie.” Jesus belowe derhalwe dat wanneer hy die heilige gees, God se werkende krag, oor hulle uitstort, dit hulle tot ’n begrip van hierdie dinge sal lei, in ooreenstemming met hulle vermoë om dit te begryp.

Die apostels verstaan veral nie dat Jesus sal sterf en aan hulle sal verskyn na hy opgewek is nie. Hulle vra mekaar dus: “Wat is dit wat Hy vir ons sê: ’n Klein tydjie, en julle sien My nie; en weer ’n klein tydjie, en julle sal My sien; en: Ek gaan na die Vader?”

Jesus besef dat hulle hom wil uitvra, en daarom verduidelik hy: “Voorwaar, voorwaar Ek sê vir julle, julle sal ween en rou bedryf, maar die wêreld sal bly wees. En julle sal bedroef wees, maar julle droefheid sal in blydskap verander.” Die volgende middag, wanneer Jesus om die lewe gebring word, is die wêreldse godsdiensleiers bly, maar die dissipels is bedroef. Maar hulle droefheid word in blydskap verander wanneer Jesus opgewek word! En hulle blydskap duur voort wanneer hy hulle met Pinkster in staat stel om sy getuies te wees deur God se heilige gees oor hulle uit te stort!

Jesus vergelyk die apostels se situasie met dié van ’n vrou gedurende haar geboortepyne en sê: “’n Vrou het droefheid wanneer sy baar, omdat haar uur gekom het.” Maar net soos sy nie meer haar benoudheid onthou wanneer haar kind gebore is nie, sê Jesus: “Julle het dan ook nou droefheid, maar Ek sal julle weer sien [wanneer ek opgewek is] en julle hart sal bly word, en niemand neem julle blydskap van julle weg nie.”

Tot dusver het die apostels niks in Jesus se naam gevra nie. Maar nou sê hy: “Alles wat julle die Vader sal vra in my Naam, sal Hy julle gee. . . . Want die Vader self het julle lief, omdat julle My liefgehad en geglo het dat Ek van God uitgegaan het. Ek het van die Vader uitgegaan en in die wêreld gekom. Weer verlaat Ek die wêreld en gaan na my Vader.”

Jesus se woorde is baie aanmoedigend vir die apostels. “Daarom glo ons dat U van God uitgegaan het”, sê hulle.

“Glo julle nou?” vra Jesus. “Kyk, die uur kom en het nou gekom dat julle uitmekaar gejaag sal word, elkeen na sy eie toe, en My alleen sal laat.” Hoe ongelooflik dit ook al klink, dit gebeur nog voor die nag om is!

“Dit het Ek vir julle gesê, dat julle in My vrede kan hê”, sluit Jesus af. “In die wêreld sal julle verdrukking hê; maar hou goeie moed, Ek het die wêreld oorwin.” Jesus het die wêreld oorwin deur getrou God se wil uit te voer ondanks alles wat Satan en sy wêreld probeer doen het om Jesus sy onkreukbaarheid te laat prysgee. Johannes 16:1-33; 13:36.

▪ Watter waarskuwing van Jesus ontstel sy apostels?

▪ Waarom het die apostels Jesus nie uitgevra oor waarheen hy gaan nie?

▪ Wat verstaan die apostels veral nie?

▪ Hoe lig Jesus toe dat die apostels se situasie van droefheid in blydskap sal verander?

▪ Wat sê Jesus sal die apostels binnekort doen?

▪ Hoe oorwin Jesus die wêreld?