“Wortels wat nie uitgetrek kan word nie”

ONDER die wêreld se grootste en oudste lewende dinge tel die sequoiabome van Kalifornië. Hierdie kolossale wonders is by volwassenheid nagenoeg 90 meter hoog en kan meer as 3 000 jaar oud word.

Hoewel die sequoia ’n ontsagwekkende gesig is, is die onsigbare wortelstelsel ewe indrukwekkend. Die sequoia se wortels vorm ’n plat mat wat ’n gebied van tot 1,2 tot 1,6 hektaar kan beslaan. Hierdie reusewortelstelsel anker die boom stewig ten tye van vloede of sterk winde. ’n Sequoia kan selfs ’n kragtige aardbewing weerstaan!

Koning Salomo het in een van sy spreuke die sterk wortelstelsel van ’n boom in beeldspraak gebruik. “Geen mens kan hom deur middel van goddeloosheid vestig nie”, het hy gesê, “maar goeie mense het wortels wat nie uitgetrek kan word nie” (Spreuke 12:3, The New English Bible). Ja, die goddeloses is op wankelrige grond. Enige sukses wat hulle op die oog af behaal, is bloot tydelik, want Jehovah belowe dat “die hoop van die goddelose [sal] vergaan”.—Spreuke 10:28.

Dit is ’n waarskuwing vir diegene wat bely dat hulle Christene is, want Jesus het gesê dat sommige “geen wortel” in hulleself sal hê nie en sal struikel (Mattheüs 13:21). Daarbenewens het die apostel Paulus geskryf oor mense wat “geslinger en heen en weer gedryf [sal] word deur elke wind van [valse] lering” (Efesiërs 4:14). Hoe kan dit voorkom word?

Net soos die wortels van ’n sequoia hulle oor ’n omvangryke gebied in die aarde se voedsame grond uitsprei, moet ons met ons verstand en hart omvangryke navorsing in God se Woord doen en die lewegewende water daarin benut. Dit sal ons help om ’n diepgewortelde geloof te ontwikkel. Ons sal natuurlik die gevolge van stormagtige beproewinge ervaar. Ons sal dalk selfs, soos ’n boom, in die teenwoordigheid van teëspoed bewe. Maar as ons geloof goed gevestig is, sal ons ‘wortels hê wat nie uitgetrek kan word nie’.—Vergelyk Hebreërs 6:19.