’n Vervulling van Bybelprofesie

IN DIE Imperiale Oorlogsmuseum in Londen, Engeland, is ’n unieke horlosie en ’n elektroniese syferteller te sien. Terwyl die horlosie draai, klik die teller elke 3,31 sekondes. Met elke klik word nog ’n syfer by die totaal gevoeg. Elke klik, elke syfer, verteenwoordig ’n man, vrou of kind wat gedurende hierdie eeu weens oorlogvoering gesterf het.

Die teller het in Junie 1989 begin tel en die tellery sal na verwagting om middernag op die vooraand van die jaar 2000 voltooi wees. Teen daardie tyd sal die getal op die teller honderdmiljoen wees—die geraamde getal oorlogverwante sterftes gedurende die 20ste eeu.

Byna 2 000 jaar gelede het Jesus Christus ’n tyd voorspel wat gekenmerk sou word deur ‘nasie wat teen nasie opstaan en koninkryk teen koninkryk’. Gevolglik verkondig Jehovah se Getuies al lank dat die vernietigende oorloë van hierdie eeu, tesame met die tallose aardbewings, peste, voedseltekorte en ander verwikkelinge, gesamentlik bewys daarvan lewer dat ons in “die laaste dae” lewe—die tydperk wat volg op Christus se kroning in 1914 as Koning in die hemel.—Lukas 21:10, 11; 2 Timoteus 3:1.

Deur die Bybel as sy gesag te gebruik, verkondig Die Wagtoring die goeie nuus dat God se Koninkryk binnekort verdrukkers sal vernietig en die aarde in ’n paradys sal omskep. En wat van die toekoms van oorlogvoering? Die Bybel sê: “Kom, aanskou die dade van die HERE, wat verskriklike dinge oor die aarde bring, wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand.”—Psalm 46:9, 10.

[Foto-erkenning op bladsy 32]

Horlosie: By Courtesy of the Imperial War Museum