Verenig op die beste weg van die lewe
As die wêreldbevolking aanhou toeneem, sal daar binnekort sesmiljard mense op die aarde wees. Hoewel almal van dieselfde voorouer afstam, erken die meeste blykbaar nie dat hulle lede is van ’n aardwye familie en dat hulle teenoor ’n wyse en liefdevolle Skepper aanspreeklik is nie. Die verdeeldheid en onenigheid tussen nasies, rasse en kulture is ’n sombere bewys van hierdie droewige stand van sake.
MET die oog op huidige wêreldtoestande lyk wêreldwye eenheid dalk soos ’n onbereikbare doelwit. The Columbia History of the World sê: “Oor die allerbelangrikste vraag, naamlik hoe om saam te lewe, kan die hedendaagse wêreld nie met ’n enkele nuwe idee vorendag kom nie, nie een nie.”
Maar dit verg nie ’n nuwe idee om eenheid onder al die bewoners van die aarde teweeg te bring nie. Die weg na eenheid word in die Heilige Skrif uiteengesit. Dit draai om die aanbidding van die Een wat die aarde en alle lewe daarop geskep het. Ware eenheid van denke, voorneme en die manier waarop hulle lewe, bestaan reeds onder God se volk. Hulle is meer as vyf en ’n half miljoen in 233 lande en is verenig in hulle oortuiging dat God se weg van die lewe die beste weg is. Soos die psalmis bid hulle: “Leer my, HERE, u weg: ek sal in u waarheid wandel; verenig my hart tot die vrees van u Naam.”—Psalm 86:11.
Hierdie vereniging van mense in rein aanbidding is lank gelede deur die profeet Jesaja voorspel. Hy het geskryf: “Aan die einde van die dae sal die berg van die huis van die HERE vasstaan op die top van die berge en verhewe wees bo die heuwels, en al die nasies sal daarheen toestroom. En baie volke sal heengaan en sê: Kom laat ons optrek na die berg van die HERE, na die huis van die God van Jakob, dat Hy ons sy weë kan leer en ons in sy paaie kan wandel.”—Jesaja 2:2, 3.
Die eenheid van Jehovah se Getuies is uniek. In meer as 87 000 gemeentes regoor die wêreld ontvang hulle week na week dieselfde geestelike voedsel by hulle vergaderinge (Matteus 24:45-47). Van die middel van 1998 af tot vroeg in 1999 het die Getuies egter hulle eenheid op ’n ander manier getoon—deur byeen te kom by hulle driedaagse “God se weg van die lewe”-streekbyeenkomste regoor die wêreld. In 13 lande was daar baie afgevaardigdes van verskeie lande by hierdie samekomste wat internasionale byeenkomste genoem is. Ander is streekbyeenkomste genoem. Maar al hierdie byeenkomste het dieselfde program van geestelike goeie dinge aangebied.
Hoe aangenaam was dit tog om te sien hoe gelukkige, goed geklede byeenkomsgangers in ouditoriums en stadiums instroom om deur Jehovah geleer te word! Een afgevaardigde by die internasionale byeenkoms wat in Michigan, VSA, gehou is, het die gevoelens van baie uitgedruk. Sy het gesê: “Dit was ’n groot vreugde om te sien hoe ons broers van regoor die wêreld—die Tsjeggiese Republiek, Barbados, Nigerië, Hongarye, Engeland, Holland, Etiopië, Kenia en baie ander lande—mekaar omhels! Dit was pragtig om te sien hoe broers in eenheid byeen is en trane van vreugde stort weens die liefde wat hulle vir mekaar en vir hulle groot God, Jehovah, het.” Die volgende artikel sal die byeenkomsprogram bespreek wat miljoene regoor die aarde geniet het.
[Foto-erkenning op bladsy 3]
Mountain High Maps® Copyright © 1997 Digital Wisdom, Inc.