Koninkryksverkondigers berig

’n soeke na die ware God word beloon

IN DIE tiende eeu v.G.J. was die tweestammeryk van Juda deurtrek van valse aanbidding. Maar te midde van die afgodediens wat so algemeen was, het daar ’n man gelewe wie se hart reg was teenoor God. Sy naam was Josafat. Die profeet Jehu het oor hom gesê: “Daar [is] goeie dinge by u gevind, want u het . . . u hart daarop gerig om God te soek” (2 Kronieke 19:3). Op ’n soortgelyke manier het miljoene mense vandag in hierdie “kritieke tye . . . wat moeilik is om deur te kom” hulle “hart daarop gerig” om die ware God, Jehovah, te soek (2 Timoteus 3:1-5). Dit word bevestig deur die volgende ondervinding uit Togo, Wes-Afrika.

Casimir het na ’n Katolieke skool gegaan en het op nege-jarige ouderdom sy eerste kommunie gehad. Maar teen die tyd dat hy 14 geword het, het Casimir nie meer kerk toe gegaan nie. Dit het veroorsaak dat hy in vrees gelewe het omdat hy gedink het dat hy na ’n brandende hel, of ten minste na die vaevuur, sou gaan omdat hy nie die mis bywoon nie.

By die skool het Casimir by ’n groep jongmense aangesluit wat een keer per week bymekaargekom het om die Bybel te bestudeer. Hy het ook die Bybel op sy eie begin lees. By een geleentheid het Casimir in die boek Openbaring oor ’n skrikwekkende wilde dier gelees wat uit die see kom (Openbaring 13:1, 2). Toe hy die leier van die Bybelstudiegroep daaroor vra, is daar vir hom gesê dat dit ’n werklike dier is en dat dit letterlik uit die see sal uitkom. Hierdie verduideliking het Casimir gekwel, want hy het nie ver van die Atlantiese kus af gewoon nie. Hy was daarvan oortuig dat hy een van die eerste slagoffers van die wilde dier sou wees.

Casimir het sy geld begin spaar sodat hy na die woestyn in die noorde kon vlug om die wilde dier te vermy. Hy het ’n klasmaat van sy planne vertel. Omdat die klasmaat een van Jehovah se Getuies is, het hy hom verseker dat so ’n letterlike dier nie uit die see gaan kom nie. Kort daarna is Casimir na die vergaderinge by die Koninkryksaal genooi. Hy het die vergaderinge geniet en dit gereeld begin bywoon. Hy het ook ’n tuisbybelstudie aanvaar.

Namate Casimir met sy studie gevorder het, het hy gesinsteenstand begin ondervind. Sy gesin het vooroueraanbidding beoefen en het oorskietvleis van hulle offerandes geëet waarvan die bloed nie uitgeloop het nie. Toe Casimir beleef geweier het om die vleis te eet, is hy gedreig en gevra om die huis te verlaat. Casimir het kalm gebly, en die dreigemente is nie uitgevoer nie. Maar drie maande lank was dit die enigste soort vleis wat by die gesinsmaaltye bedien is. Dit was vir Casimir moeilik om genoeg te ete te kry, maar hy het dít en ander probleme verduur.

Casimir het aangehou om geestelike vordering te maak totdat hy hom kon toewy en laat doop. Hy is later as ’n bedieningskneg aangestel en het die vierde klas van die Bedieningsopleidingskool in Togo bygewoon. Op die oomblik doen hy vrywillige werk by die takkantoor.

Ja, hoeveel keer is die woorde van koning Dawid nie al waar bewys nie: “As jy [Jehovah] soek, sal Hy Hom deur jou laat vind.”—1 Kronieke 28:9.

[Prente op bladsy 8]

Casimir (regs) doen vrywillige werk by die takkantoor