Riglyne om goeie vriende te kies

JONGMENSE kyk eerder na hulle portuurs as na hulle ouers vir riglyne oor klere en musiek, sê ’n verslag in die Reader’s Digest. Dit is gevolglik baie belangrik dat ouers weet met wie hulle kinders assosieer en waar.

“Dit is jou verantwoordelikheid om ondersoek in te stel”, sê Esmé van Rensburg, senior lektor in die departement van sielkunde by ’n Suid-Afrikaanse universiteit. Sy voeg by: “Jou kind sal moontlik vir jou kwaad word, maar hulle sal afkoel.” Dan gee sy die volgende wenke aan ouers. Reëls moet logies en op bepaalde beginsels gegrond wees; luister na jou kind; moenie oorreageer nie, maar bly kalm en weet wat jy wil sê. As jou kind alreeds met ’n ongewenste maat vriende gemaak het, moet jy die aandag vestig op die onaanvaarbare gedrag wat deur die vriendskap bevorder is pleks van hulle net te verbied om verder met mekaar te assosieer.

God se Woord, die Bybel, gee lank reeds goeie raad vir ouers. Dit sê byvoorbeeld: “Wees [gou] om te hoor, stadig om te praat, stadig ten opsigte van gramskap” (Jakobus 1:19). Die Skrif gee ook hierdie goeie raad oor die keuse van maats: “Gaan met die wyse om, dan word jy wys; maar hy wat met dwase verkeer, versleg” (Spreuke 13:20). Hierdie voorbeelde toon watter wysheid beskikbaar is vir diegene wat die Bybel met waardering lees en in hulle daaglikse lewe toepas wat dit sê.