Voortreflike werke verheerlik God
DIEGENE wat God liefhet, probeer die geestelike lig van sy Woord, die Bybel, weerkaats. Sodoende gehoorsaam hulle Jesus se opdrag: “Laat julle lig . . . voor die mense skyn, sodat hulle julle voortreflike werke kan sien en heerlikheid kan gee aan julle Vader wat in die hemele is” (Matteus 5:16). Woorde sowel as regskape gedrag kan God verheerlik.
Jehovah se Getuies probeer God behaag deur in ooreenstemming met die Bybel te lewe en deur ander op geestelike gebied te probeer help. Hulle doen dit selfs in lande waar hulle openbare bediening nog nie wetlik geregistreer is nie. In die hoofstad van een van hierdie lande hou die Getuies jaarliks streekbyeenkomste wat deur tussen 6 000 en 9 000 mense bygewoon word. Vir hierdie samekomste huur hulle sale in ’n kompleks waar tentoonstellings gehou word. Soos in vorige jare het honderde Getuies voor hulle streekbyeenkoms in 1999 hard gewerk om die fasiliteite skoon te maak, ’n klankstelsel op te stel en duisende stoele te pak.
Al hierdie voorbereidings het nie ongesiens verbygegaan nie. Die bestuur van die kompleks het hierdie bedrywighede fyn dopgehou. Hulle het ook gesien dat alles vlot verloop het en dat die Getuies baie ordelik is, al het hulle ’n opkomshoogtepunt van 15 666 gehad. Die personeel was ook beïndruk dat alles daarna so deeglik skoongemaak is.
Die bestuur het hulle waardering vir alles getoon deur die Getuies op die voorranglys te plaas sodat hulle die eerste opsie sal hê om die gebou die volgende jaar te huur. Maar die bestuur het selfs verder gegaan. Op 15 Julie 1999 het hulle aan die byeenkomskomitee ’n toekenning van waardering gegee. Op die plaat is die woorde “die gemeente van Jehovah se Getuies” gegraveer—iets onverwags in ’n land waar daar beperkings op hulle Bybelonderrigtingswerk is.
In 2000/2001 sal miljoene mense regoor die wêreld na verwagting die honderde “Daders van God se Woord”-streekbyeenkomste van Jehovah se Getuies bywoon. As jy teenwoordig is, sal jy self kan sien hoe diegene wat hulle inspan om te doen wat die Bybel sê voortreflike werke verrig wat God verheerlik.