Wêreldvrede—Hoe?
IS WÊRELDVREDE op hande? Baie het vroeër so gedink, maar is nou skepties. Volgens ’n verslag wat die uitdagings van ons toekoms bespreek, wat in Suid Afrika se Daily Mail & Guardian gepubliseer is, “lyk voorspellings van ’n nuwe internasionale orde wat net 10 jaar gelede gemaak is, nou hopeloos te optimisties”.
Die skrywers bespreek die hoopvolle gees wat maar net ’n dekade gelede geheers het. Die Koue Oorlog het pas geëindig, en daar was nie meer ’n stryd tussen die supermoondhede nie. Aan die begin van wat mense gedink het ’n nuwe era sou wees, het baie verwag dat die mensdom betekenisvolle vordering sou begin maak om aan armoede, siekte en omgewingskwessies aandag te gee. “Daardie voorspellings lyk nou hopeloos utopies”, sê die verslag. “Nuwe konflikte het ontstaan in gebiede waarvan ons skaars bewus was; wêreldwye armoede bly toeneem. Daar is twee nuwe kernmoondhede. Die VN se reputasie is erg geskend deur sy onbevredigende reaksie op ’n reeks humanitêre krisisse. Die stemming verander van utopie na anti-utopie.”
Studente van die Bybel besef dat die mens se pogings, ongeag hoe edel dit is, nooit heeltemal kan slaag nie. Waarom nie? Want, soos die Bybel sê, “die hele wêreld lê in die mag van die bose” (1 Johannes 5:19). Terwyl die wêreld onder Satan se beheer is, kan dit nie herstel word tot die paradystoestand wat God daarvoor in gedagte gehad het toe hy dit geskep het nie.
Tog is daar ’n grondslag vir optimisme. Jehovah God belowe om wêreldvrede te bewerkstellig, nie deur hierdie stelsel van dinge op te knap nie, maar deur “’n nuwe aarde” tot stand te bring waarin “regverdigheid [sal] woon” (2 Petrus 3:13). Ja, deur middel van God se Koninkryk sal ons aarde in ’n vreedsame, gelukkige tuiste omskep word, waar die lewe en werk vir alle gehoorsame mense altyd genotvol sal wees. Daarbenewens belowe God om “elke traan van hulle oë af [te] vee, en die dood sal daar nie meer wees nie, en ook verdriet en geskreeu en pyn sal daar nie meer wees nie”. Hierdie beloftes is nie gegrond op die wankelrige voorspellings van mense nie. Dit is eerder gegrond op die onfeilbare Woord van die Skepper, wat nie kan lieg nie.—Openbaring 21:4; Titus 1:2.